uk sipaschas kasqa pasñatukusqachallaña hinaspansi sumaqllataña

pachakusqa pasñapaqa sutin kasqa, “justinacha”; uklaw llaqtachapis huk

maqta tiasqa, kay maqtapa sutinsi kasqa “Sunqu suwa”, paysi justinachataqa

rimapayakusqa; kayna nispa, - ¡anchata kuyaykuway!; Justinataqsi sunqumpi

pinsaparparikun, kay maqtaqa ancha supay llullapas kakunman, qaika

warmikunamanñacha chayna nispan waqachin, mana mana ñuqamampas

chayna waqachiwanmanmi, hinaspa sunqu suwataqa saqiratamusqa; waqa

waqayllataña wasinman chayaruptinsi, maman hawan Sunqu suwata.

Hawaruptinsi maman llakikuyta qallarirun, hinaspa nin maymanmi riranki

imapin purinki kunankama yaw maqta; Sunqu suataq nin mamanman

justinachaywanmin kunankama kakurani, mamanñataq nin chay pasñawanchu

purichkanki yaw maqta manan allintapas tulluykipas sayarimuchkanchu

chaypiña purichkanki, manan rabiachikunkichu papaykitan willaramusaq

asnupa surriagunwan panaparusunaykipaq.

Iskay punchawmantaña Sunqu suwa tapukamusqa maypi tiasqanta

justinachan, chaysi willarusqaku chay justinachaykiqa tian, don Cirilupa

haciendampis; chay haciendapa imataq sutin, chaypa sutinqa Pariabamba;

chaysi; chaypi pay mandakachakamuchkam justinachaykitaqa; paysi ancha

piñallañas purin paypa munasqantas ruwananku; justinachatapas

munapayachkanmi warmin kananpaq, paypaqsi rantichin musuq pachakunata

allinta pachakunanpaq sumaq sumaqcha rikukunanpaq chay Paribamba

haciendadupaq ñawillanpaqsi kananpaq. Chayta uyariruptin Sunqu suwaqa

yaqachalla wañurunpas, warmacha hina waqachkara pampakunata panapaspa

mana imatapas atinchu ruwayta manchakuyllamantaña don Ciriluta, chay

yacharuspanña wasinman kutirukun hinaptinsi mamanman willan; chaysi

maman nin chaymi nichkayki mana chay warmitaqa kuyaychu, chay warmiqa

Ciriluchawanmi purichkan, chayqa waqachinqan; waqa supaymi chayna

warmikunata waqachin; waqa allqum; llapa warmikunawanmi kakura , qanri

mamay imaynanpin rabiachkakiri , imatataq ruarusuranki, mamanñataqsi

waqaspa nin ñuqawanpas kakura, chaimi riksini chay runataqa, chaymi

ñichkayki wak pasñatapas ñakarichinqan, chaymi mana waqayñachu

paymantaqa.

Sunqu suwa, iskay watamanta tarirukusqa justinachawa huk

warmachayuqña kasqa qaricharaqtaq, kuchichallañam purichkaraku, Sunqu

suwa waqtanman anchurun, rimapananpaq; chaysi justinachqa rikuruspansi

pinqaymanta waqaparparikamun, chaysi nin Sunqu suwa sapallaykiraqchu

kachkanki; Sunqu suatañaqmi ni manan justinallay kasarakamuniñan;

justinachataq nin sirtuchu niwachkanki amaya llullakuychu, ñuqaqa sapallaymi

kachkani, sunquyqa inallan kuyakuchkasunki; manan Justina sirtupaqmi

ñichkayki mana llullakuchkanichu ñuqapapas kachkanmi warmachay; chayna

nispan pasarukun Sunqu suwa; justinachataq qiparukun waqaspa umanta

qapikuspa pinsapakuspa, paywanmi kasararukuyman kara upa kakuranicha

wak viqu runawan kanaypaq, pachan raykuchu kasararukuni wañu wañu

runawan mana ni purytapas atichkanchu, ¿haa paypas sufrichkanmi,

waqachkanmi, tukuy ruasqantan kutichikunqan kunan.

DE LA: I. E. S. M.”JUANA AMBIA LUDEÑA” de HUANCANE- URANMARCA.

AUTOR: PROF. Jefferson Solino ALARCON HUAMANI.
 Iskay mamakuchakunas kalawasa apitas yanukusqaku, hinaspa

tukuruspanku huknin tablamanta repisampis churaykusqaku, chaytas

ukuchkachaqa rikurusqa apichanta churakusqanta, hinaptinsi yaykurun wasin

ukuman, ukuchkachaqa mikurukun apichanta; hinaspa ukuchka mikuchkatinsi

mamakuchakunaqa musiarparinku, apurayllamansi qatarirunku.

Huknin mamakuqa punkuta kichaykuqtinsi ukuchkaqa pawarparin,

mankan ukunmanta,mamakuchaqa mankanta qawaykuptinsi kalawasa apinqa

kasqañachu ukucha tukurusqa chaymi mamakuchakunaqa huqniraqta

phiñarukunku chaymi willanarukunku. ¿Manachu chay ukuchkachataqa

qapiruchwan? ¡arí¡ uknin mamakucha nin, hinaspansi quknin mamaku nin

¿hinaptinqa imatataq churasun qapinanchiqpaqri?. Ñan yacharuniñan ima

churananchiqpaqa, ñañaytan tapukurani hinaptinmi niwarqa hapirunaykipaqa

vininutaña kalawasa apipi churaruychik chaymi mamakuchakunaqa churarunku

huk matichapi, apita vininuyuqta churarunku ukuchkachapa hanay husquchapi

mana mishi rikunanpi manachayqa mikurunmanmi chay venenuta, chayta

churaruspanku yapamanta puñunanman pasaykunku chayna segurullaña

qamuchkatin chay venenu churasqankunaman, ukuchkachaqa uklawman

asurparisqa, manam ukuchkachaqa mikusqapaschu venenutaqa,uklawman

suchurusqa, kuyaspansi mishichanta, hinaptinsi mishichaqa mikurusqa,

paqarisnintaqa wañurusqa mamakuchakunapa kawitu waqtampiraqmi,

qatariykuptinsi mishichanta manchachinku ¡ha mishiqa pawanchu!,

llapcharuptinkuqa chirillaña kaykuchkasqa mamakuchakunaqa waqaykunku

tukuy punchaw mishichanmanta, kunanmanta pacha aswanmi piñarukunku.

Yapamantan ukuchkaqa yaykuramuspansi makichanpi, ukuchkaqa apinta

urqurakuspanmi wawachankunaman aparun; manaraq wasinman ukuchka

chayachkaptinsi, ñampi atuqwan tupanarukunku hinaptinsi atuq nin

ukuchkachata kunanmi ichaqa mikusaykiña, hukniraqtan yarqaykuwachkan,

ukuchkañataqmi nin amaya atuqchallay mikuruwaychu; ñaupaq kalawasa

apichayta mallichisayki, hinaptinsi ukuchkachaqa, mallirachin makichampi

wawachankunapaq apachakusqanta chaysi atuq miskillataña mikuchaykurusqa

kalawasa apichata, tukuruptinsi yapachanta mañan atuq, ukuchkachata;

ukuchkachaqa nin. ¿Manan upachu kani kay atuqta maqarachimusaq

mamakuchakunawan yachakunampaq? Atuqñataqmi nin maypitaqri

tarikamuranki kay apichata.

Ukuchkachataqmi nin iskay mamakuchakunan yanusqaku hinaptinmi

suwarakamurani, atuqñataqmi ninpunitaq maypitaqri chay wasiri pusaruway,

chaysi ukuchkachaqa pusarun atuqta mamakuchakunapa wasinman, hinaptinsi

yaykurachin ukuchkachaqa atuqta uchkunta; hinaptinsi atuq mikuyta qallarparin,

chaysi mamakuchakuna musiaramunku, allquchus hina laplapiykamuchkan

mankata; hukninman nin mamakuchaqa; hukninñataqmi nin qakuchik

upallachalla, mamakuchakunaqa upallachalla punkuta kicharamunku, hinaptinsi

atuq musianchu imaniraqtapas, chaysi mamakuchakunaqa ratu raturaq

pinsaykusparaqmi ninku ¿Imatan ruarusun kay aqarway atuqtaqa?

pinsaruspaña ninku kaspiwan panaparparisun; chaysi mamakuchakunaqa

kaspiman rirunku, hinaptinsi atuq, mamakuchakunataqa kaspiwan amuqta

rikurun, hinaptinsi atuq pawayta atinchu ni maynintapas lluksiyta atinchu; chaysi

huknin mamakucha punkuta wichqarparin; atuqchataqa iskaynin

mamakuchakunamanta panaparparinku kaspiwan wañunankama chaymanta

pacha mamakuchakunaqa aukalla tiachakunku wasichampi imapas chinkanchu

atuqta wañuchisqanmantapacha; ukuchkachapas chaita rikuruspan raski

chinkarparin manchakuymanta rimakusparaqmi manañan suasaykichikchu;

manaña suasaqchu pitapas kananmanta pacha.

DE LA: I. E. S. M.”JUANA AMBIA LUDEÑA” de HUANCANE- URANMARCA.

AUTORA: ALUMNA, Elizabeth PERALES SILVERA del 3er GRADO.