RIPUSHANKICHU TAYTALLAY

Juan Antonio Manya Ambur

RIPUSHANKICHU
TAYTALLAY
Maytan rinki, mana alao nispa
khullupampa ruruykikunata,
ch'aska ñawi masiykita
wihch'urparispa ... ?

Maytan rinki, chiri wayra hina,

yana llaqollawan llaqorukuspa,
misk'i qhawakuyniykita
pakaruspa ... ?

Maytan rinki, phiru mayu hina,

mana astawan kutimoq,
mukmu, mukmu simiykita
wataruspa ... ?

Maytan rinki, usqhay, usqhay,

yana phuyoq ñan kicharisqan,
qori, qolqe sonqoykita.
q'epiyukuspa ... ?

Maytan rinki, mana rimarispa,

qantu t'ikawan pillurusqa,
mana pi maypa
phiñachisqan ... ?

Maytan rinki, phiña runa hina,

k'allmaykikunata musphachispa,
cheqaq chaninchasqa q'esaykita
saqerispa ... ?
Maytan rinki, mana intiq taripasqan,
ch'aska qoyllurpa qhawapayasqan
apu kunaq khuyakuyninta
upallachispa ... ?

Maytan rinki, mana munakoq hina,

yawarniykiwan t'uruchasqa wasiykipi,
waqayniykiwan qarpasqa chakraykipi,
qonqayta seq'eruspa ... ?

Maytan rinki, kallpasapa taytallay,

qhencha "yana auqaq",
nina qallokunaq chaupimpi
qonqarpariwaspa ... ?

Maytan rinki, llanthullay,

qharikaypi rikukuspa,
cheqaq ñampi qhawaykukuspa
waqyashaqtiy ... ?

Yakiña chinkarinki chayqa,

uyarimullawanki kunkayta,
qhawarimullawanki kausayniyta,
qanwan tinkunanchis kama.

Publicaciones:
*Allpanchis 1970
Instituto Pastoral Andina
*Antología de la Poesía Quechua
Julio Noriega Bermuy 1993
Ediciones CEP