YA KATA'L Q'IISOOM

Xub'an juun alaa' jeej chpaam tnamit Chiya' Titán (Atitlán), jará alaa' qa ajni'la
xrajo' juun xtan, jk'a xtan xrajo' ,jara' qas saq laj xtan, qa nmaq chqaaa' qas q'an
rismaal rwa'.
Jara' alaa' an q'iij q'iij niruwila' xtan chiya', an jiik rutqiin chik achnaq rijtaal tqajq'iij
nirma' ruyaa' jara' xtan chiya', nkara' nub'an taq nipona jaa' xtan chii' ya', jaa' alaa'
an jiik tz'b'ul chik parwa' juun ab'aj k'ola chla'.
Taq ntz'ata kima'k je' wnaq, jara' alaa' an jiik ja'okara' xtan nrajo' chqaa' qas
nitrib'eej xab'aar nb'awa', k'ola jmeej xtz'a'ta kima'k wnaq an jiik ntz'ub'aaj ruchii'
xtan chiya', jk' jara' wnaq an jiik junwa' xkina' ramal jara' alaa'.
Ruka'k juun wa' xkina' jara' wnaq, j'ee' kitz'oon chjara' xtan an chaq ab'aar nb'i'm
wa' ptaq chaq'a', chqaa' j'eera wnaq kitz'otoon chik chjara' xtan ne'la ptaq nik'aaj
taq aq'a' q'ajqu'm chqaa' jiik juun rilaj syaaw nupo' ilwa' rii' taq nb'a.
Taq nb'a ptaq b'eey jiik ik'ola nik'aaj rixb'iil nki ik'mowa' rxiin, jk' rixb'iil jara' ajni'
chka wajkax, tz'e',wyaaw, karnee'l, chqaa' rilaj taq a'q, mkiyoonta ixqii' i oknaq ta
chqaa' ipinaq je' achi'ii' chkikojol, ik'ola j'e k'jolaa' q'isomaa' kipoonta kii' je' achi'ii
taq syaaw.
Jar' je' syaaw jiik nik k'aqk'a kii' chutaq jaay ruk'iin Ya Kta'l taq nki'ula, jk taq nkib'a
ptaq b'eey qas jiik nik kayeej ptaq ruqul Ya Kta'l, kara' chqaa' jaa' Ya Kta'l n jiik
nkayeej ptaq kiqul je' achi'ii' taq syaaaw taq jaa' jara' juun rilaj ixoq syaaw
rip'oonwa' rii'.
Jara' renjelaal kitz'toon j'ee' wnaq tzriij Ya Kta'l, xub'an jmeej xipona jaa' alaa' chii'
rub'eey Ya Kta'l jara' tqa'j q'iij majo'n jaa' Ya Kta'l chu ruchooch, xipiit j'ee' wnaq
tzra' xikb'iij tzra jara' alaa' chmajo'n ntzojb'ej chta Ya Ktal', jara xtan ax qisoon, jk'a
ptaq chaq'a' an jiik juun rilaj syaaw nupo'wa' rii', chaqa xkichol tzra alaa' taq jaa' Ya
Kta'l taq nb'a ptaq b'eey an jiik nkayexa ptaq ruqul kima'k je' achi'ii' taq syaaw.
Taq jaa' alaa' xk'axaaj jawra tziij, jiik juunwa xuan' ranma, qas k¿ota xrajo' xk'axaaj
tzra xtan, qas xk'axaaj ta chka wnaq, jara' ruma'k jara' jiik majo'n chik naq kara
xub'an an xajni' xturtaja ruq'a' rwa' xuna' taq xb'ix kara' tzra.

Ana Marleny Alba Calgua “2”