LÁMINA 20

Sepan quantos esta carta vieren cómmo, estando el muy alto e muy noble
sennor rrey don Fferrando en Medina del Canpo, / con inffantes, rricos omnes,
inffancones, caualleros e otros omnes bonos de las villas e de otros lugares de su
sennorío, el onrra/3do padre e sennor don Goncalo, arcobispo de Toledo, primado
de las Espannas e chanceler de Castiella, dixol' assí: «Sennor, / bien sabedes en
cómmo uos auemos mostrado muchas uezes en Valladolit e aquí, en Medina, el
mandado que auyemos nos / e el obispo de Sigüenza de nuestro sennor el Papa en
que tractássemos paz e concordia entre uos e uuestros cormanos, don Alffonso / 6
e don Fferrando, fijos de uuestro tío el inffant don Fferrando; e uos rogamos e
uos pedimos por mercet que quisiéssedes que viniessen / a la uuestra mercet e al
uuestro senorío morar, e uos que les fiziéssedes bien, en guisa que ellos
pudiessen uyuyr onrradamient en uuestro / sennorío e a uuestro seruiçio. Et uos,
sennor, dixiéstesnos que lo ueríedes aquí, en Medina, en uuestras Cortes que
auýedes ý a fazer, e aurýe/9des uuestro consseio sobrello e que nos lo diríedes. Et
agora, sennor, esso mismo uos dezimos e uos pedimos por mercet que lo
ten/gades por bien e que lo querades fazer; lo uno, por onrra de la Eglesia de
Rroma e por amor de nuestro sennor el Papa, que tanto / uos ama e tanto a ffecho
por uos; lo otro por fazer bien, que son uuestros naturales e uuestros parientes; e
que nos desdes respu/12esta dello».
§ Et luego el rrey respondiol' assí: «Arcobispo, verdat es lo que uos
dezides, et mi uoluntat era / de recebir el ruego del Papa e de fazer toda cosa que
fuesse guisada porque ouyéssemos todos paz e bien; mas / dixiéronme después, e
so çierto que assí es, que ellos, non temiendo ni auyendo uergüença de Dios nin
del Papa, que en /15 periglo de sus almas passáronse a los moros e vienen con
ellos a correrme la tierra e córrenmela. Et por ende, / con omnes que assí andan
en deseruiçio de Dios e mío yo tengo que non me estaríe bien en fazer paz con
ellos. Mas ruégo/uos, arcobispo, que me dedes testimonio que non finca por mí e
que lo enbiedes dezir assí al Papa, et desto demando / 18 a esse escriuano público
que está ý que me dé público instrumento».
§ Es estonçe el dicho sennor arçobispo dixo: / «Sennor, esso mismo le
demandamos nos».
§ A esto estauan ý presentes los nobles sennores inffantes don Johán, / fijo
de don Alffonsso, rrey que fue de Castiella, e don Alffonsso, fijo de don
Alffonsso, rrey que fue de Protogal, don /21 Johán Núnnez, don Ferrán Rodríguez
de Castro, don Johán Fferrández e Johán Alffonsso, su hermano, e Johán
Fferrández, su fijo, don / Alffonsso, fijo del inffant don Alffonsso, Rroy Gil de
Villalobos, Esteuan Pérez Floreán, Pero López de Padiella, / Pero González de
Aguilar, Rrodrigo Rodríguez Carriello, Sancho Pérez, fijo del inffant don Pero,
Alffonsso Sánchez, hermano /24 del rrey, Lope Alffonsso de Torquemada, Ferrán
Romero, Goncalo Royz e Pero Fferrández, alcaldes de Toledo, Áluar Martínez / e
Balascáluaro, su fijo, de Áuila. Et otros muchos clérigos e llegos que se ý
acercaron.
 Esto fue fecho veynt / e vn día de junio, era de mill trezientos e quarenta
annos, en el anno ochauo que el dicho sennor rrey don / 27 Ferrando rregnó en
Castiella, en León e en los otros sus rregnos.
/ Et yo, Domingo Xeménez, notario público en la corte del muy noble
sobredicho sennor / rrey de Castiella, fuy present a esto e escriuí ende esta carta
en que fiz /30 este mío sig(signo)no en testimonio.