LÁMINA 12

Sepan quantos esta carta vieren cómmo nos, don Sancho, por la gracia de
Dios, rrey de Castiella, de León, de Toledo, de Gallizia, de Seuilla, de / Córdoua,
de Murçia, de Jahén e del Algarbe. Por ffazer bien e merçed al monesterio de
Sant Estéuano de Rriba de Sil rreçebímos/3le en nuestra guarda e en nuestra
acomienda a él e a todas ssus cosas, et tenemos por bien e mandamos que aya
todos ssus cotos e ssus comiendas / e ssus vassallos e todos los otros ssus
derechos bien e complidamiente, assí commo los ouo en tiempo del rrey don
Ffernando, nuestro auuelo. Et de/ffendemos ffirmemiente que ninguno non ssea
osado de ffazer y ffuerça nin tuerto nin otro mal ninguno, nin de yr nin de passar
contra esta mer/6ced quel nos ffazemos, ca qualquier que lo ffiziesse pecharnos
ýe en pena cient maravedís de la moneda nueua, et al abbat e al conuento / desse
mismo logar todo quanto danno rreçebiessen doblado. Et ssobresto mandamos al
adelantado e a los merinos que andudieren y por / nos en essa tierra que non
conssientan a ninguno que les passe nin les vaya contra esta merçed quel nos
ffazemos e non ffagan ende ál por /9 ninguna manera. Et destol mandamos dar
esta nuestra carta sseellada con nuestro seello colgado. Dada en Burgos, veynte e
seys...