SALMOS 121

Li nimajcual Dios, aꞌan li ta̱ilok a̱cue

1Nak nacuil li tzu̱l, nincꞌoxla ut ninye saꞌ inchꞌo̱l: ¿Ani ta̱tenkꞌa̱nk cue? 2Li
nimajcual Dios, aꞌan li ta̱tenkꞌa̱nk cue. Aꞌan li quiyi̱ban re li choxa ut li
ruchichꞌochꞌ. 3Aꞌan ta̱tenkꞌa̱nk a̱cue re nak incꞌaꞌ tattꞌanekꞌ. Aꞌan incꞌaꞌ nacuar.
Junelic yo̱ cha̱cuilbal. 4Aꞌan incꞌaꞌ nacuar chi moco nachal xcuara. Aꞌan li nacoloc
reheb laj Israel. 5Li Ka̱cuaꞌ, aꞌan li na-iloc a̱cue. Aꞌan cuan a̱cuiqꞌuin junelic ut
aꞌan natenkꞌan a̱cue. 6Ma̱cꞌaꞌ ta̱cꞌul chi cutan chi moco chiru kꞌojyi̱n xban nak li
Ka̱cuaꞌ ta̱ilok a̱cue. 7Li nimajcual Dios, aꞌan ta̱colok a̱cue nak xiu xiu cua̱nkat ut
aꞌan ta̱colok re la̱ yuꞌam. 8Li Ka̱cuaꞌ, aꞌan ta̱ilok a̱cue yalak bar tatxic ut aꞌan
ajcuiꞌ ta̱ilok a̱cue nak tatsukꞌi̱k chak. Aꞌan ta̱ilok a̱cue chalen anakcuan ut chi
junelic.