MAKAMBALISASHON

by Dwight Isebia
Palabra bieuw ta hiba
na palabra nobo
Loke promé tabata pika,
despwés por haña gran akoho
E palabra makamba
ya mas no mester wordu mirá
komo palabra insultoso
y pesei awor nos por papia
di proseso di makambalisashón

Makambalisá kier men,

adapta na systema konsiderá
komo apropiado, komun of korekto
sigun systema of kultura di Makamba
Makamba moderno , otro for djesnan
den pasado lew di Afrika,
en general tin un koló kla ku parse blanku,
a nanse of lanta na Hulanda,
tin Hulandés komo promé idioma
y ta sinti su mes hulandés Eropeo
y parti di Hulanda su kultura

Makambalisashon por tin aspekto positivo,

pero mester di paga tinu
ku maske kon makambalisá
bo por kere bo ta,
hende no sa bira makamba
dor di studia makambismo
pero ta prudente si pa siña
kon pa trata ku makamba
ya kun nos pais ta makambalisando

(DPI 2011)