Pambuka
sung saswita bilih pinanganten kakung kepareng
Awignamastunamahsidhi, sinidaha dera sang
murbeng rat, kang mangliputi sarate dene ulun
mangayun makirtya rikanang palupi. Rahayu sagung
dumadhi, rahayu a mring sagung dumadhi
Sanggya para tamu kakung sumawa putri ingkang tuhu
kinormatan, sampun dungkap wahyaning mangsa kala upacara
panggih pengantin nut gaggrak mantaraman. Ing mangke pengantin
putri sampun siyaga arsa miyos saking panti busana manjing sasana
wiwaha. Mekaten ugi pinangantin kakung sampun siyaga jengkar
saking sasana palereman manjing sasana wiwaha, jengkaripun
pinanganten kapiwadya kanthi gending ketawang puspawarna
yasan dalem Kanjeng Gusti Pangeran Adipati Aria Mangkunegara IV
Pengantin putri lumebet
Prabawaning swasana hambabar rasa hayom hayem
hangayomi, nalika samana ana titahing Gusti kang sa juga jejer priya
kang sawiji putri pinesthi jodho arsa anindakaken upacara panggih
pengantin nut gagrak trah mantaraman. Pinanganten putri wus
kakanthi dening bala paraga, kairing rama tuwin ibu mirah paraga
piniji manjing sasana upacara, hangantu rawuhipun ingkang raka
garwa kanthi kapurwaka beksanipun sang raden gunungsari.
Pengantin putra lumebet
Gantia ingkang winuwus ing paseban jawi hangungkung
umyak gumuruh. ana ingkang pada seba. Kakanti kalihan gending
lancaran bindri.
rawuh. Tan rinasa pinanganten kakung ing mangke wus ngancik
korining sasana wiwaha. Gandek nggennya lumaksana ing
sangajenge kori sasana wiwaha.
Kairing kanti lampahira sang raden gunungsari ingkang
ngemu pralambang bilih sang raden gunungsari wujud
manunggalipun kenya klawan kakung, sang gunung sari nadyan
sinatriya bagus prakasa, hananging alus budi ugi pakertinipun, ugi
sang raden gunungsari minangka pralambang bilih nyawijinipun rasa
lan karsa. Mekaten ugi sang penganten kekalih mugya ing mbesuk
dadosa contho tumprap putuwayahipun,
Balang gantal
Dupi wes samya cecaketan, mila pinanganten kakung
hamurwakani ambalang gantal mring pinanganten putri, kinarya
pralambang katresnanipun ingkang kasuntak datheng pinanganten
putri. Mekaten ugi pinanganten putri hambalang katresnan
dhumateng pinanganten kakung, kumlawe astane pinanganten
kekalih abebalangan gantal ingkang winastan gondang kasih dalasan
gondang tutur.
Kembar mayang
Kapurwakan saking salebeting sasana paraga ingkang piniji
hangasta kembar mayang wus hangrumiyini lampah. Kembar
mayang kayune purwa jati, oyot e bayu bajra ingkang
hanggambaraken wahyuning jodho. Ka ajab mugi dauping sri
pinanganten sarimbit, manggih niskala uwal saking salwiring panca
baya. Mila ing mangke anggambaraken kembar mayang ya
kalpataru dewa ndaru. Kasempyokaken ing pamidangan
pinanganten. Tumuli arsa kabucal ing marga catur. Saya dangu saya
caket nggennya lumaksana pinanganten kekalih.
Panggih
Gya ngadani upacara panggih temanten kairing larase
gending ladrang kebo giro. Wus ngancik mangsa kala dumawahing
kodrat, pinesthining jodho bagus,IMAM ABU YAZID AL BUSTOMI
atmaja kakung saking bapa SUTRISNO dalah biyung NGATMINI arsa
daup kalihan dyah ayu EKA SILVIA RINDAYATI atmaja putri kinasih
bapa MOKHAMAD IRIN dalah biyung SITI MUSYAROFAH
pinanganten kekalih arsa jumangkah tumuju ing sasana panggih.
Ngunjuk tirta
sri pinanganten sarimbit ngunjuk toya wening, kang
kapancuraken saking kendi minangka tirta amerta, nun inggih
kadya ta tirta panguripan dadi pratandha, kalamun risang
pinanganten badhe necep maduning asmara janma,
manunggalaken ing rasa, satemah mijilaken kama warni seta
saking pokaling bapa, miwah kama warni rekta saking pokaling
rena, ing tembe saged mbabar putra kang minangka rerengganing
balewisma,
Ngunjuk toya wening ugi dados pratandha, kalamun sedaya
tumindak miwah muna muni, badhe kapenggalih kanthi weninging
nala, satemah amung rahayu kang bakal tinemu, kados unen –
unen, ajining dhiri gumantung lathi, ajining raga gumantung
busana, lan ajining awak gumantung saka tumindak.
Pecah antaga
Sang pinanganten kakung hanglolos ponang cantela
hamerpeki ponang antiga tinampahing pada pecah sa nalika kinarya
pasemon bilih pinanganten bade uwal saking pangguluan rama ibu
arsa madeg mandiri ing pribadi nerasaken garis soroh sirahing
aluhur nyambung tumuruning wiji.
Hambasuh suku
Daya daya pinanganten kakung hanglolos ponang cantela
minggah ing ranu padha, temanten putri gya anjengku sarwi
sumembah, tumuli badhe hamijiki samparanipun ingkang raka
garwa kinarya pralambang prasetyanipun pinanganten putri
nggennya nedya setya bekti mring gurunadi ngantos salami laminya,
ugi mracihnani hangilangi salwiring sukerta ingkang sinandhang
murih lurus raharja manggih mulya. Samparanipun ingkang raka
garwa wus pinijikan dening pinanganten putri. Sasampunipun purna
kepareng ponang cantela den agem malih. Pinanganten putri tumuli
arsa linanting jumeneng hanggambaraken hanjunjung drajading
wanita wit sajroning bebrayan, murih amanggih kulawarga bagya
mulya ayem tentrem suka klawan raharja. Marem jroning penggalih
pinanganten kakung sigra ngasta astane pinanganten putri,
kajumenengaken jejer ing sisih kering.
Paripurna gatining panggih
Satuhu wistrep pinda curiga manjing jroning warangka, ing
mangke sang jejaka miwah sang Kenya bade nilar donyaning jaka
miwah Kenya. Jumbuh kalih pangandikaning para sujana sarjana
linangkung ‘’gegaraning wong akrami, dudu banda dudu rupa,
mung ati pawitane, luput pisan kena pisan, yen gampang luwih
gampang, yen angel angel kalangkung, sadaya tan kena tinumbas
artha”
Bobot timbang
Menika winastan upacara bobot timbang pinanganten
pinarak wonten jengkunipun rama aris aturipun ingkang ibu
“ kados pundi bapane awrat putra putri
napa putra kakung”
“wah ibune kabeh pada abote”
Sigra jumeneng saking madyaning sasana rinengga,
kalajengaken sang bapa halenggahaken pinanganten, punika
winastan upacara tanem. Upacara tanem kinarya wujud pandonga
paminta dhumateng Gusti kang maha yekti mugi kulawarga ingkang
winangun dening pinanganten saged ta baguh kukuh prekuh lan
prakosa, mboten gampil kasempyok ing aradan
Kacar kucur
Purna upacara tanem daya-daya juru pangedi busana
nyawisaken ubarampe kagem ngadani adicara kacar-kucur,
ubarampe kacar kucur lamun tinalithi, lamun kapriksan dumadi
saking kacang kawak, dele kawak, artha receh wos jeneng kinarya
pralambang kasiling guna kaya saking kakung. Ubarampe kacar
kucur sigra kasuntak tuntas tapis kanthi telas ing pangkonipun
pinanganten putri, menika kinarya gegambaran bilih khasiling guna
kaya bade kaparingaken dhumateng garwa, mboten wonten
sumingit wonten satunggiling papan. Sampun katampi tumuli
kabundelan menika kinarya gegambaran bilih hanggenipun
ngecakaken hasiling guna kaya kanthi gemi nastiti ngati ati murih
raharjaning kulawarga. Sampun binundelan dening pinanganten
putri mila bade kaaturaken dhumateng ingkang ibu.
‘’Ibu kula nderek titip paringipun hasile gunakaya saking
rakamas’’
‘’ ya nduk dak tampa, dak simpenake ing padaringan”
Upacara kacar kucur sampun paripurna kalajengaken
adicara dhahar walimah
Dhahar walimah
Ubarampe dhahar walimah sampun sumadya dumadi saking
boja tumpeng. Ingkang kakung handulang ingkang putri
salajengipun ingkang putri handulang ingkang kakung. Menika
kinarya gegambaran manunggaling cipta rasa karya lan jaya pait
getiring bebrayan, bade sareng-sareng karaosaken bebasan bungah
susah nedya den temah, rekasa pada disangga, mukti pada den
nikmati.
Ngunjuk toya
Tumuli hangunjuk tirta wening sampun kaasta dening
pinanganten kekalih. Hangunjuk tirta wening sayekti ugi kinarya
gegambaran bilih sedaya pakarti kang arsa linampahan kanti
linambaran weninge manah satemah hayu hayu kanthi rahayu
nemu kulawarga ingkang winangun dening pinanganten. Sampun
hangunjuk tirta wening purna.
Besan tumuju ing sasana
 Daya daya sampun wonten sasmita bilih besan sarimbit
panjenenganipun bapa SUTRISNO dalah ibu sampun kepareng bade
manjing sasana upacara handamel gambira jroning wardaya.
Tumrap bapa MOHAMMAD IRIN cinandra yayah tirta sinangking ing
kencana myat jengkar saking sasana palenggahan. Panjenenganipun
bapa MOHAMAD IRIN sekalian ibu SITI MUSYAROFAH dupi
hanguningani bilih besan sarimbit panjenenganipun bapa SUTRISNO
dalah sang ibu NGATMINI sampun kepareng manjing ing sasana
wiwaha. Grapyak sumanak panjenenganipun bapa
sekalian ibu, anggenipun hangacarani rawuhipun besan sarimbit
mila, salajengipun daya daya bade kaderekaken manjing wonten
sasana wiwaha. Pinanganten sarimbit titi wanci punika prasasat
kajugrukan ing aldaka, sekar kablabar sekanten madu pindhane dupi
hamirsani pranyata titi wanci punika .
Pepunden catur sampun kepareng nyawiji arsa hangembani,
handampingi lenggah wonten sasana pinij. Prapta ing sasana piniji
daya daya panjenenganipun bapa MOHAMMAD IRIN hangaturi
dumateng panjenenganipun bapa SUTRISNO dalah ibu pinarak
lenggah
Sungkeman
Wus lenggah ing sasana piniji kanan kering sasana rinengga.
Mila bade ngadani upacara sungkeman. Kawistara paraga ingkang
anglolos dhuwung sampun siyaga, dhuwung sigra linolos dening
paraga piniji. Arsa ngaturaken sungkem pangabekti dhumateng
rama lan ibu,lukar ageman canela tumungkul ing bantala wedanane
angusla jengkunipun rama. Mangkana pangudasmaraning driya
“rama kula ngaturaken sungkem pangabekti katur
dumateng rama. Nyuwun pangapunten duk rikala kula tasih timur
tansah damel ribetipun rama”
“nduk/ le cah ayu/ wong bagus aja mbok bacutke aturmu,
pancen mangkana kuwajibane wong tua marang anak”
Tumuli ngaturaken sungkem dhumateng ingkang ibu
“ ibu kula ngaturaken sungkem, ngaturaken gunging
panuwun ingkang sampun kepareng ngesepi kula satemah kula
saged waluya jati, jati temahan nirmala”
“ anakku ngger sak loro rama lan ibu wus lega, wus lila ya
nduk, ya le lamun sira sak loro bakal omah omah dewe. Mung wae
ya nduk ya le senajan jeneng sira bakal omah omah dewe, mbesok
kuwi poma bapa lan ibu kuwi tilikana ya nduk ya le marga swargane
wong tuwa ngana lamun dirubung anak putu kabeh”
Pinaringan puja puji astute wewarah saking rama ibu,
panjenenganipun bapa MOHAMMAD IRIN dalah ibu SITI
MUSYAROFAH , mila daya daya pinanganten bade ngaturaken
sungkem puja bekti dumateng panjenengaipun bapa SUTRISNO
klawan ibu NGATMINI Tan prabeda patrape tumungkul ngaturaken
sembah manah, mangkana pangudarasane driya
“ngger anaku jenengsira sak loro dak pepuji bisa a gede, ya
nduk ya le nanging aja ngebot-boti marang sapada-pada, jenengsira
sak loro dak pepuji bisa a sugih, nanging aja gawe rugi, jenengsira
dak pepuji bisa a landep nanging ora natoni, uga bisa a padang
nanging ara mblerengi, pamuji rama lan ibu ya nduk, ya le. Lan
kepara bisa dadi rahmating tawanging ilahi rabbi mring sapada
pada”
Padang trawangan jroning wardaya, pinda tindak ing wanci
dalu pinanringan obor sewu bebasane. Pinanganten dupi
kasembadan ngaturaken sungkem pangabekti dumateng rama ibu.
Mila arsa tumuju papan sakawit duwung kaagemaken malih dening
paraga piniji,…
sampun purna anggenipun panggih temanten kang
babonipun wonten karaton surakata hadiningrat, lan ngayogyakarta
hadiningrat,… mugi tansah hayu, hayu, sarwa hayu.
Kirab Kanaredran
( Binarung ungeling Gendhing Ketawang Langen Gita Sri Narendra
Pelog Barang)
Rampak runtut swaranya anganyut-anyut, lah punika ta wau
swaraning pradangga, ambabar Ketawang Langggeng Gita Sri
Narendra, umiring tindakira sekaring pawiwahan, anenggih sang
pinangantyan kekalih, ingkang arsa kirab, nulad adi endahing
budaya.
Penganten kakung angagem makutha awarna kresna pinalipit ing
rukmi, asesumping sekar kanthil. Dhasi munggwing jangga lir
ginupit, amimbuhi pekiking penganten kakung, dahat adi dahat
luhung. Atela awarni langking sinulam benang kencana pinentha
roning gadhung amalengkung, prabane ngenguwung. Sangsangan
rukmi carup wor kalawan sangsangan sekar mlathi rinonce
munggwing pamindhangan kanan miwah kering, angalewer
tumibeng jaja cinandra kadya taksaka ngulet rumambat.
Sinigeg gatnya kang winursita, kuwung-kuwung akekuwung ambar
teja manda maya, tejaning rising suryeng ratri, pranyata lamun tan
kucuwa memanise. Meloking wadana sumunar agilar-gilar angelam-
lami pindha kencana binabar.
Kirab Kasatriyan
(binarung ungeling Gendhing Ketawang Subakastawa Slendro 9)
Wus tinarbuka wiwaraning sasana busana, kumenyar asung
prabawa, kentar-kentar angambar kongas gandanira marbuk arum
awangi, sumirat-sirat teja maya-maya. Saya dangu saya milangoni,
saya celak saya angranuhi. Sanyata tejane sang pinangantyan, mijil
saking wisma wiwaha.
Wus lukar busana katong angrasuk busana satriya, sangsaya
ngenguwung prabane, sang saya mencorong guwayane, sangsaya
manteb panggalihe, cinandra kadi Bagus Danang Sutawijaya
atmajanira Ki Gedhe Pamanahan, akekanthen asta kalayan Rara
Dewi Semangkin Atmajanira Sri Sultan Drawa ing Kalinyamat, lagya
angenggar-enggar driya ameng-ameng aneng udyana, mriksani
panjrahing sari puspita, ingkang nendheng mangudhar wewangi.
Sang senopati kembar kadi Sang Suwandageni atmajane Ki
Demang Sangkalputung kalawan Sang Agung Sadayu, yoganira Ki
Sadewa, kekalihipun tus wijil saking tlatah jatinom.
Kang Apindha Putri astha sata anglur selur dalidir kadya putri
boyongan saking wewengkon Predikan ing Toyabiru Sadaya berawa
sarta mempen ing puja puji santi astute santi, basuki kang kaudi,
lestari kang kaesthi.