Spich di Frakshon di MFK pa Dia di Bandera – 02 di yüli 2019

Awe 2 di yüli 2019, ta selebrá dia di bandera i nos ta bini huntu den e sala aki den
un reunion solèm pa reflehá riba e nifikashon di nos bandera i pa selebrá e fecha
importante aki.

Un saludo i felisitashon komo un yu di Kòrsou riba e dia aki pa lider polítiko di

MFK señor Gerrit Schotte, tene duru nos amigu, no laga nan kibra bo.

Señor Presidente kiko tin di selebrá awe?

Kon nos por selebrá awe, kaminda ta trata ser humanonan den nos prisòn di
forma inhumano. Kier tene nan 21 ora será den un sèl i ora ku e informashon bira
públiko kier desmentí esaki. Tristu ta ku e direktor di prisòn te ainda ta na
trabou....

Kon nos por selebrá dia di bandera, kaminda tin siudadanonan ku no sa kon nan
lo yega na e desayuno aki ratu, pa nan yunan. No papia mes di e kuminda di
mèrdia i anochi. Pasobra tata i mama a pèrdè trabou den un ekonomia ku ta krimp
kada dia i sigui kobra víktima. Esaki pa motibu di e mal maneho di Gabinete
Rhuggenaath.

Kon nos por selebrá awe señor Presidente, ku nos tin mas ku 40 mama i tata di
famia ku a pèrdè nan trabou na hotèl Otrobanda i Casino i tantu hende ku a pèrdè
trabou na hotèl Holiday Beach hotèl?

Kon nos por selebrá awe kaminda ku negoshinan ta keda sera i nos hendenan ta
pèrdiendo trabou? Na entre otro Insel Air, Howard Johnson Hotel, Paleis Hindu,
Aventura, Wilson & Wilson, etc.

Señor. Presidente, kon nos por selebrá awe kaminda negoshinan manera
bankonan, kompanianan di seguro, UTS, Offshore etc. a manda tantu hende kas i
krimp na aktividatnan.

Señor. Presidente, kon nos por ta selebrando awe nos bandera, kaminda kasi tur
trahadónan di kontratista den Refineria Isla a ser mandá kas, pasobra no tin trabou
pa nan?

Kon nos por ta selebrá señor Presidente, si awe mas ku 3000 tata i mama di famia
ku ta traha den i rondó di nos Refineria no sa kiko lo para di nan futuro. Refineria
lo sera? Refineria lo no sera? Esei ta e limbo ku e trahadónan di refineria ta biba
aden i ku ta yena ku hopi stress señor Presidente.

Kon nos por ta selebrando awe señor Presidente Kaminda desempleo bou di
adulto ta riba 16% i bou di hubentut desempleo un sifra espantoso di riba 30%?
Señor Presidente, kon nos por ta selebrá awe ku un gobièrnu ku a drenta i haña un
surplus di 16 mion florin na kuminsamentu di aña 2017 i a konbertí esaki den un
défisit di 300 mion florin den apénas 2 aña i ainda nan tei sinta i no ta tuma honor
na nan mes... Gobièrnunan ku for di 2012 bin ariba a plunder e kapital propio di
Kòrsou di 512 mion florin i tambe gasta tur sèn ku tabatin den “Schommelfonds”.

Kon nos por selebrá awe señor Presidente, kaminda tin hopi kasnan di famia ku ta
bai findishi pasobra e doño nan no tin entrada pa sigui kumpli ku nan Hypotheek.

Kon nos por ta selebrá awe señor Presidente miéntras ku na Droga Basis Parrera
(Despensa Marine Basis Parrera) makambanan ta yena kònteiner ku droga pa kla
pa sali bai Hulanda.

Kon nos por ta selebrando awe señor Presidente, si 9000 Km for di aki, Den Haag
kier dikta kiko tin ku pasa den nos Pais. Miéntras ku tin un par di hende den
gobernashon di Kòrsou ku ta laga Hulanda hasi esaki tambe. Mi ta referí aki na e
posibel “Aanwijzing”, ku nan lo dun’e un nòmber nobo kual ta ”Samenwerking
Regeling, Protocol”, òf ki nòmber ku bo ke dun’e. Anto nos gobièrnu no tin e
kurashi pa pone e makambanan aki nan kabes na “Waterpas”.

Señor Presidente, nos no por keda sin menshoná e proposishon diktatorial di e

areglo di disputa presentá pa Kònòpis..., un falta di rèspèt total pa nos 6 islanan.

Señor Presidente, kon nos por ta selebrá awe, miéntras den kushina na Fòrti ta
preparando medidanan kruel ku lo kaba di masakrá nos pueblo?

Señor Presidente, kon nos por selebrá awe si nos mester a traha un hospital pa 200
mion i awe e Hospital ta kostando mas di 600 mion florin? Pa kolmo a tuma un
desishon den e sala aki pa kuminsa ku un enkuesta Parlamentario, pero bo persona
komo Presidente di Parlamento no a tuma ningun akshon te awe pa kuminsá ku e
enkuesta Parlamentario aki, ta kiko tin di skonde?. “Wake Up” señor Presidente…

Kon nos por selebrá awe señor Presidente si nos tin un Ministerio Públiko ku ora
ta trata di kontrinkantenan polítiko ta persiguí nan i tene redada den nan kas ku
militarnan i polisnan ku kapuchon, pero ora ta trata e polítikonan ku nan kier
protehá, ta sera e kaso ku un “Voorwaardelijk Seponering”…. Wel wel señor
Presidente.

Kon nos por selebrá señor Presidente si nos frakshon a pidi, pa den union nos
ban traha riba lei di “screening”, pero den e sala aki a demostrá poder i pasa un
moshon ku 12 voto pro, no lubidá ku e lei di screening no por wòrdu kambia ku
12 voto koleganan.

Señor Presidente, kon nos por ta selebrá awe si nos enseñansa ta den problemanan
hopi serio. Mantenshon di skolnan ta defisiente, e ambiente higiéniko na skolnan
ta teribel. Maestronan tumando retiro pa bai traha na Boneiru i Hulanda, lokual tin
algun direktivanan di skol ku man na kabes.
Kon nos por selebrá awe, si ni kuler no tin na na masha hopi skol, señor
Presidente Danki Dios ku Parlamentario Gilbert Doran di MFK (no por ta otro)
personalmente ta kontribuyendo ku su granito riba e parti aki.

Señor Presidente, manera bo mes por a skucha, no tin nada pa selebrá awe.

Si kier selebrá algu awe, ta mihó nos selebrá awe ku apesar di tur e defisiensianan
den nos enseñansa, hóbennan a pasa nan eksámen òf nan a bai over ku éksito.

Ban selebrá ku tur nos muchanan ku ta saka kara di Kòrsou den eksterior riba
tereno di Arte, Deporte i den diferente otro disiplina.

Ban selebrá BIDAAAAA aweee…., pasombra nos bandera ta di luto pa tur e

motibunan ariba menshoná.

Pueblo di Kòrsou e bèrdat mester wòrdu bisa riba e dia tan importante aki.