Sa panahon kan Miercoles de Ceniza an banwaan nag aako kan abo bilang tanda kan pagpoón kan

Cuaresma. Sarô sa miembro kan familia makua nin benditadong abo sa parokya.

Sa laog kan harong mag-andam nin Altar na may Cruz asin kandila kun sain ibubugtak an
benditadong abo. Sa atubang kan inandam na Altar gigibohon kan familia an pagcelebrar kan pag-
imponer kan abo.

Rito sa Pagpoón
An magurang kaiba an miembro kan saiyang familia mapangurus. An namamayong magurang
minasabi:
Sa ngaran kan Ama, asin kan Aki, asin kan Espiritu Santo.
Gabos:
Amen.
An namamayong magurang pwedeng magtao kaining halipot na pataratara:
Satuyang pinopônan an panahon kan Cuaresma,
nagkakatiripon kita ngonian tanganing akoon niato
na kita parakasalà asin padagos na nagkakasala saiya.
An abo na aakoon niato ngonian
tanda kan satuyang pagsolsol sa mga kasâlan
na satong naginibo.
Sa pagpahiling niato kan satuyang kamundoan,
maherakan lugod kita kan Dios
asin maibalik lugod kita sa saiyang gracia.
Pamibi sa Pagpoón
Mantang an gabos toninong sa halipot na panahon, an namamayong magurang na ngangadyi:

A ma sa langit, an liwanag kan saimong katotoohan

nagtatao sa samong mata nin kalinawan
sa kadikloman kan kasalan.
Lugod ining panahon kan pakikipag-olian
magtao samo kan biyaya nin kapatawadan
asin balaog kan Diosnon na kaliwanagan.
Huli ki Cristo samong Kagurangnan.
Gabos:
Amen.
Pagbasa kan Tataramon kan Dios
Namamayong magurang:
Buksan niato an satong puso asin isip
para sa Tataramon kan Dios.
Sarô sa mga miembro kan familia angay na magbasa kaining Evangelio:
Pagbasa kan banal na Evangelio susog ki San Mateo.

”Kun nag-aayuno kamo,

dai kamo magpahiling nin mamundong lalawogon
arog kan ginigibo kan mga parasagin-sagin.
Nagpapahiling sindang garo gutom
tanganing maaraman kan mga tawo na nag-aayuno sinda.
Sa katotoohan sinasabihan ko kamo,
inako na ninda an balos!
Alagad kun nag-aayuno ka, manlabar ka asin manukray,
tanganing dai maaraman kan mga tawo na nag-aayuno ka.
An saimong Ama na dai nahihiling,
iyo sana an makakaaram.
Siya na nakakahiling sa hilom, an mabalos saimo.

Marahay na Bareta kan Kagurangnan.

Gabos:
Pag-omaw saimo, Cristo.
Angay na gibohon an pag-ontok sa halipot na panahon para sa paghorop-horop.

Pag-Imponer kan Abo

An Pag-imponer kan Abo gigibohon sa paagi kan pagbudbod sa bunbonan kan payo. Sarong beses
sana mataram an magurang kan formula kan pagpangurus na nakalaag digdi sa Rito. Asin an gabos
madolok sarô-sarô sa pag ako kan abo.

Asin an namamayong magurang masabi kan sarô sa mga angay na tataramon na minasunod:
Magsolsol, asin magtubod sa Marahay na Bareta.
O:

Giromdoma, tawo, na ika alpog asin sa alpog mabalik.

Pamibi nin Banwaan
Kun tapos na, isusunod an pagpamibi kan Pamibi nin Banwaan, an namamayong magurang
nagsasabi:
Sa pagpoón kan pagbaklay niato
ngonian na panahon kan Cuaresma,
mamibi kita sa langitnon na Ama,
na tabangan kita na magin maimbod sa Evangelio
asin tawan kitang kusog na magbaklay
sa dalan kan tunay na pagsolsol. Mamibi kita saiya
asin sa lambang pag-arang an satong simbag:
S. Maherak ka samo, Kagurangnan.
Kun papagkanigoon, angay man na gibohon an pagbasa kan lambang pag-arang kan sarong
miembro kan familia o sarô kada miembro kan familia.

1. Tanganing an Santo Papa, mga Obispo, Padi asin Diacono,

maogmang sabaton an Cuaresma bilang panahon nin
pagbabago sa paagi kan pagigin maimbod sa gibong pag-ayuno,
pagpamibi asin paglimos, ipamibi niato sa Kagurangnan.

2. Tanganing an mga nasa govierno madara sa tunay na pagbabâgo

sa saindang disposicion asin magsayuma sa gabos na klase kan
pangaabuso na minaratak sa dignidad kan katawohan, ipamibi
niato sa Kagurangnan.

3. Tanganing an tanda kan Abo sa sato magpagirumdom kan

satong kaluyahan bilang tawo asin tabangan kitang magbâgo sa
puso tanganing mabuhay kita sa kapakumbabaan asin lipotok
na paglingkod sa satong kapwa, ipamibi niato sa Kagurangnan.

4. Tanganing an huma kan COVID 19 matapos na asin mahiling

kan gabos an kamot kan Dios na naghihiro satô orog na sa
pagpakusog sa mga tinamaan kan helang na dara kaining
pandemia, ipamibi niato sa Kagurangnan.

5. Tanganing an mga paratubod na gadan makaduman sa paraiso

kan Dios asin kita man pakatapos niato sa buhay na ini maglaog
sa mga inandam na kwarto kan Dios satô, ipamibi niato sa
Kagurangnan.
Ama Niamo
An gabos durungan na nangangadyi kaining pamibion:
Hagadon niato sa Ama na patawadon
an satong kasâlan asin darahon kita sa pagpatawad
kan mga tawong nagkasala satô.
Mamibi kita sa mga tataramon na itinukdo satô ni Cristo:
Gabos nag-aawit o nagpapamibi:

A ma niamo, na yaon sa langit:

pabanalon an ngaran mo;
magdatong an kahadean mo;
mangyari an boót mo
sa dagâ nin siring sa langit.
An samong kakanon sa aroaldaw itao mo samuya ngonian,
asin patawadon mo kami sa samong mga kasâlan,
siring na pinapatawad niamo an mga nagkakasalà samuya;
asin hare kami pagdaraha sa sugot;
kundi agawa kami sa maraot.

Pamibi sa Pagtapos
Mantang an gabos toninong sa halipot na panahon, an namamayong magurang na ngangadyi:

K agurangnan,
suroga kami sa samuyang pakilaban sa karatan.
Pinoponan mi ngonian an panahon kan Cuaresma:
giboha na an panahon na ini magin banal
para samong familia, huli kan samuyang pagsikwal sa sadiri.
Huli ki Jesu Cristong Kagurangnan niamo, saimong Aki,
na kaiba mong nabubuhay asin naghahade,
kasarô kan Espiritu Santo,
Dios, sa gabos na kapanahonan kan mga panahon.
Gabos:
Amen.

Rito sa Pagtapos
An celebracion tataposon kan namamayong magurang sa mga minasunod na tataramon:
Bendicionan lugod kita kan Dios, agawon kita sa maraot,
asin darahon kita sa buhay na daing kasagkoran.
Gabos:
Amen.