ESCOLINOS 12 DE XUNU

Sección: axenda
Los neños de Samartín cellebren na so llingua la cultura urbano

Esti ye un mes bien gayoleru pa la reciella de Samartín del Rei Aurelio: si la fin de
selmana pasada les neñes y neños del conceyu fonon quien a esfrutar la quinta edición
del «Festín», un festival qu’entemeció maxa, baille, música y teatru, esta selmana van
poder facer lo mesmo cola cultura urbano.

El III Festival de Cultura Urbano de Samartín, qu’organiza l’asociación Que nun apare,
nun ta empobináu esclusivamente a los críos, pero sí tien una bona parte de la so
programación pensada pa ellos. El festival entama esti vienres día 14 na plaza de la
Ilesia de l’Entregu, y el día grande va ser el sábadu nel Parque del Florián. Asina, por
exemplu, el vienres va haber yá un taller de bombes de semientes impartíu polos
especialistes de la Güerta Escuela la Llera de magar les 18:30 hores.

El festival ufre esti añu la posibilidá d’acampar ende, y amás organiza un mercáu
qu’empecipia’l sábadu. Esti día va haber actividaes empobinaes a la reciella, como los
hinchables que podrán esfrutase de baldre de 12 a 14 hores, con dalgunes pensaes pa los
neños que se manden del asturianu, como los xuegos y deportes tradicionales que
proponen dende «6 conceyos».

Amás, ente munchos otros talleres y conciertos d’interés, los escolinos d’asturianu van
ser a deprender munches coses sobre’l venceyu énte feminismu, música y cultura
tradicional cola sesión vermú de les pandereteres de «Nun tamos toes», a les 13:30
hores del sábadu, o col conciertu de Fontoria la nueche anterior.
Sección:axenda
«El viaxe de Covaletti» aporta a la Feria del Llibru de Xixón

La Feria del Llibru de Xixón ye una iniciativa necesaria qu’apaeció hai dellos años col
envís de ameyorar el mundu editorial y cultural asturianu. Poro, nun ye d’estrañar que
na edición de la FeLiX19 qu’empecipia esta selmana se faga un apueste poles actividaes
infantiles n’asturianu. Asina lo amuesa la representación teatral de la obra El viaxe de
Covaletti, que va tener llugar el xueves 13 de xunu de magar les 18 hores nel Paséu de
Begoña.

Esta obra, representada por Higiénico Papel Teatro —acabantes de ganar el II Premiu
Nel Amaro de Teatru Profesional n’Asturianu por Hansel y Gretel— ta escrita y
dirixida por Laura Iglesia, y en 2014 ganó’l premio Oh! de les artes escéniques
d’Asturies al meyor espectáculu pa la reciella.

La obra ya se tien representao con éxitu demientres esti mesmu cursu n’otros conceyos
asturianos, como Avilés o Cangas del Narcea, y ta protagonizada (según rellaten dende
la Oficina de Normalización Llingüístia de Xixón) por «l'emplegáu d'una gasolinera en
metá de ningún llau, qu'enxamás viaxó, nin conoció más sitios qu'esi» y que davezu
«alcuentra na llectura evasión y entretenimientu, y ensin salir de la so gasolinera, viaxa
colos personaxes de los llibros a mundos desconocíos y exóticos, nesti casu a Hermetia,
una islla perdida del mar Mediterráneu, onde vive Pippo Covaletti, el rapaz protagonista
d'un viaxe per tierra, mar y aire enllén d'aventures y descubrimientos...».

Sección: esto presta

Reciella: families pol asturianu conoz l’Entrialgo d’hai cien años

El pasáu sábadu l’asociación Reciella: families pol asturianu —formada por dellos
grupos familiares interesaos na tresmisión interxeneracional de la so llingua— llevanon
a cabu la so actividá mensual, cola que faen por que los neños puedan interactuar con
otros críos asturfalantes. Nesti casu, l’actividá desendolcóse nel pueblu de nacencia del
escritor Armando Palacio Valdés, Entrialgo, nel conceyu de Llaviana.

Foi precisamente énte la so casa natal onde entamó una visita organizada por la Güerta
Escuela La Llera, que ta asitiada nel cercanu llugar de Puente d’Arcu. La idea yera
desplica-yos a los guah.es la conexón que tien la llingua que falen cola sociedá y les
persones que la orixinanon, caltuvienon y tresmitienon, esto ye, cola cultura tradicional.
De xuru, consiguir qu’esti filu nun ruempa ye’l llabor más importante que puede facese
pol futuru del asturianu.

El día empecipió, asina, con un paséu interpretáu nel que los más nuevos pudienon
conocer como yera la vida n’aldea tradicional: cómo se organizaben el tiempu y
l’espaciu, cuáles yeren les costumes, etc.

Depués vieno una breve posa, y d’arréu entamanon los xuegos populares y los talleres
de güerta, nos que la reciella pudo vivir la esperiencia de trabayar el campu en grupos
estremaos según la edá, ya integrando a los críos nes tarees que se desendolquen nesi
momentu na güerta.

El día acabó con un xuegu colectivo qu’implicó mesmo a les madres y padres qu’a los
fíos, pa llueu dir a xintar.