UNA VIDA CUNTÁ PER NAVIDADES

Sacó el “Roskof-Patent”. Miró la gora:

¡Cordia, ya son les once y toy sin suañu!
Tal díe como hoy, ya nin sé de qué añu,
abrí los güeyos al ñacer l’aurora...

La primer alcordancia soñaora

ye tar xunto mió güelu ‘n el escañu
esbillando castañes... Y el marañu
del árgoma ‘n el llar, murmullaora...

Saltaben en rellumu de pocella

les chispes, falucando d’una estrella,
ente tanto arroxaben la borona...

Y de farina y miel, diome mió güela

una torta con llechi y con canela
que me trixo el sabor a Nochi Bona.

Ansina un añu y otru foi pasando

la mió niñez, cuntá per ñavidaes.
Entá el viento me trai les cantaraes
que la xente d’entós diba cantando.

Cantando ‘l aguinaldu y repicando

los panderos, dexando en sos tonaes
un allegre dím-dóm de campanaes
como si el valle tou tuviése rezando...
 Y blincar per Requexu y la Pasera,
y la Villa y Arroxo... Aquello yera
un llocu palombar de corazones...

Y lluego, el veme roxu de vergüenza

baxo la lluna, al cagar la trenza
per tirar, de fartura, los calzones.

El tiempo, ya se sabe, non s’apara;

y dexé de ser neñu cuando un día
diba, p’ente la ñeve que cayía,
xunto mió pá, camín de Baltasara.

¡Gozu, el gozu del besu na mió cara

que’l viento co la ñeve me facía!
Yera, d’una espinera florecía,
un filandón que’l cielo esparramara.

Y al baxar fasta el tayu de la mina,

aquel tiemblor medrosu d’andarina
que sintiese na xaula perdíu el vuelu...

Y aquellos garapiellos de pocelles,

que son les llámpares suañando estrelles,
en un Belén que tien de tierra, el cielu.

Vino la mocedá. Foi mozu reciu.

Non m’asustó el trabayu. Tevo amores...
Per entós yo viví los díes meyores,
y ensiñome ‘l amor que non tien preciu...
 Y en sin facer a nadie menospreciu,
non hebo en tós aquellos alreores,
d’ente los ixuxús cortexaores,
otru que’l míu, oyíu con más apreciu.

Caseme con la neña más galana

que viere el sol en el publín de Xiana;
y anque yéramos d’ambos muy prubinos,

per mor de los amores y del suañu,

¡ñacíamos un guajín añu tras añu,
fasta axuntar catorce rapacinos!

¡Cuánto trabayé entós! Tá non riscaba

el alba con solluz l’amanecía,
cuando, candil encesu, ya subía
allumbrando el sendero que pisaba.

La fame a la mió puerta, si llamaba,

nunca la dexé entrar. La minería
trabayaba de firme, y non podía
la probeza con xente recia y brava.

La mujer afanaba, la prubina,

entá más que-i mandare la dotrina,
desque apuntaba el sol, a les estrelles...

Foi la primera vez que a mió reciella

viemos rucar turrón, y a mín y a élla
vivir les Ñavidaes más aloreyes.
 Lluego, tamién les penes...La tayuela
que taba cerque el llar, quedó en sin amu.
Ya nadie del lloreu esparcía el ramu
como anantes hicieren güelu y güela.

Y aquel fiyín cieguen pe la viruela;

y el otru, pa`l que`l río foi reclamu
al ofece-i la lluna na quel tramu
onde un troncu facía de pasarela...

Y la mina, que escueye los meyores.

llevome, ente la flor de los picaores,
al fiu que mimu de so madre yera...

Ella morrrió de pena, la prubina,

¡y el mió llar ya foi ñeru d´andarina
que non tuviés verano y primavera!

Sacó el Roskof-Patem”. Miró la gora:

-Cordia, van ser les doce... Dame el suañu...
Y oyendo `l aguilandru aquel d‘antañu,
ciarró los güeyos al ñacer l´aurora!