El baladro del sabio Merlín con sus profecías (1498)

E agora vos dixe la significança de mi muerte, e no vos la dixera tan abiertamente si yo

tanto en vos no me fiase.
E Blaysen le dixo: —¿E como es esto que vos conoces las fines delas otras gentes, e dela
vuestra no sabes verdad?
5 Esto vos dire yo bien —dixo Merlin—. Muchas vezes auiene que el arte aprouecha a
muchos e no aprouecha al que la sabe, antes le empece. Esto vos digo por mi, que ayude a quantos
quise e agora no puedo ayudar a mi en esta auentura, ca no plaze a nuestro Señor, antes quiere
que muera como otro ombre mortal, e aun de peor manera.
Quando Blaysen esto oyo, començo a pensar e dixo a Merlin: —¿Do pensays vos que es
10 aquella donzella por que vos aues a tomar muerte?
Yo vos digo —dixo Merlin— que no puedo ver mas ni saber, ca vos digo que no plaze a
Dios que yo la muerte escuse, e por que se verdaderamente que morre.
—¿E delas otras cosas que han de venir, soys cierto como soliades?
Dixo Merlin: —Si, de todo. Mucho me tardo de yr al reyno de Londres; esme dañoso. Mas
15 antes que alla vaya, os dire vna marauilla, do no ay sino verdad: que si yo luengamente pudiese
viuir, valdria mucho al reyno de Londres e ayudarlo ya a todo mi poder; mas por que mi ayuda le
fallescera por la muerte que ha de venir ayna, penso nuestro Señor, como padre de piedad,
marauillosamente dela tierra, ca en aquella ora que en vision vi mi muerte, en aquella ora nascio
dela muger del rey Van, el ochauo Nacian, e [de] aquel que nascio, sera el buen cauallero que
20 dara cima a las auenturas que, por marauilla del sancto Greal, auernan en el reyno de Londres, e
sera aquel buen cauallero esforçado, el noueno del linaje de Nacian.
—¿E aquel cauallero —dixo Blaysen— que vos decides que esta noche nascio, podra
alguna cosa valer o ayudar al reyno de Londres?
—Si, —dixo Merlin— ca el sera tan marauilloso cauallero e de tanta bondad en armas, que
25 todos los que le vieren le temeran mucho. Tanta gratia le porna Dios e tanto valdra por bondad de
armas, que por el se remediara algo que perdido ternan, e seran onrrados e temidos. Agora podes
saber —dixo Merlin— que nuestro Señor faze nacer aquel ombre de quien vos yo fablo, en lugar
de mi, e por su bondad e caualleria ha de conplir lo que yo cumpliera por mi seso; mas asi como
nuestro Señor me mostro que seria mal trecho por muger, ansi sera el toda via en trabajo e en
30 cuyta e en verguença por muger.
E Blaysen le pregunto: — ¿Como avra nombre? —Lançarote del Lago —dixo Merlin—.
Este sera el cauallero mas amador e mejor guereador que avra en el mundo, saluo su fijo Galaz.
E todo esto que Merlin dixo, metio Blaysen en scripto. E dixo a Merlin:
—Pues os partis de mi fazienda e de mi, fazedme entender si aueys de morir tan cedo, e
35 otrosi me aconsejad que podre fazer, ca vos me aconsejastes a fazer e escriuir la ystoria del sancto
Greal, e me dexistes que me dariades la cuenta muy por estenso delas auenturas que auernan en
el reyno de Londres. ¿Pues como podre de esta obra dar fin, quando no supiere la verdad? E
comence mi libro e no sera acabado.
—A esto vos respondere —dixo Merlin—: No ha cosa que no aya fin, e esta obra que vos
40 començastes es de tan alto fecho que en mi vida ni en la vuestra no sera acabada, mas despues
sera acabado por otro, e yo vos digo —dixo Merlin— que por que esta obra començastes, seres
ayna bendito de muchas gentes.
E Blaysen le dixo: —Agora me dezid, pues hos quereys yr al rey, si os vere nunca.
E Merlin dixo: —Si vos quereys seguir tras buestro libro e verme, yd en pos de mi ala
45 Grand Bretaña.