1.

-Xtikhu ikhùún
Kuthù: Rigajma
Tsigù: majun

Ikhùún mbijiu Merced Rodríguez Cantú nigumuú ná mbá xojin mitsíçya rí mbiçjiu Miýuíí
naçthañajuù mbàà tsiakhì, nigumù mbiçji mbá xkiñù akhu rí gùç mijna gùwàç tsígu akhu
ñúmbàà gùwàç nítsu skíñú akhù skíñú majun.

Rudu mbiçjiu Filogonia Cantú Guzmán anu mbiçjiu Aurelio Rodríguez Cantú, rudu
nigumàa na xojin rí mbiçjiù Xaniñáá nga anu niguma na Matha Tsiwí, niwadíín juwiin ijììn
akhu gùçju nga atsúun xabekha, ikhuun ñajù açda ndarigu.

Nenigajma ri kuthu gini, trigajma jma rigatsu na xogi Miýuíí, rí kuthu trigakhú neni gajma
na krajáá Mba tsíakhíí.

Akhu tsigùç niñaju na xojin rí mbijiu Digáá nathajúù Miýuíí nga mijna gùwàç tsigu iñaju
xùni mansgúù ijíín tsu nunigajma na kuthu rigajma na xojin rí mbijiú Xkua Lupi
nathañajúù Miýuíí, ikhi ma xta xugi.

Merced Rodríguez Cantú

2.-Ajmúú

Kuthù: Rigajma
Tsigù: majun
Ajmu Miýuíí
Mitsiya xojiù Miýuíí

Nakha xugi mani ajmáwa.

àjmà mañu iñawa.

Mamba mbiçji tijua

kithagujua ginitsu.

Ajmáu ìjìn
Gùwàç nitsuun ìjìn esguun

Xu ajmau ñùçju jani anjgun

Xogiin phu migagi akuñii

rinjdo nunigajma iyii.

Phu mitsingua júwa tikhuun

Kajngo wakha ngrigùun.

Merced Rodríguez Cantú

Ajmau Rikijua

Rikijua rikijua phu mitsiçñaa

xtá na xoji Miýuíí

Najma naguma iya thau

Manga naçphaa mbawiin

Naguma guwa manga.

Gima muçdu rikijua

Mu ri muphuu tseçtsí

Mba ginitsu ñaju

Rì nexna lú ana lú mekhuíí.

Merced Rodríguez Cantú

3.-Ajngaa rí naríçtha edi lu

Kuthù: Rigajma
Tsigù: majun

Phu ndaxkun mitsun jma xogi yaduun

Maxa rí xtó nga miçxa awu.

Tsa ñajùn ithaya rá.

Limu gaç

Nagu mbadaçkhòò, xtaçdun gujua

Narìkhùù idu xu jaçni eka idu açkhà

Mu najudi la inu, xtáá tsú maçkha araxin la ithìì

Tsa ñajùn ithaya ra.

Mixtùùn

Jua guç xtaá, naçkha lo guç tiwitsù

Nadxùn xàbù rijndo nákha lo,

Mu rí nugidi mudi exí, rákha jma yaja.

Namaxaç la numbàà

tsa ñajun itha ya ra.

Rùçjua Merced Rodríguez Cantú

4.-Anjgaa tsimáá

Kuthù: Rigajma
Tsigù: majun
Rudù

Ikhaán ñajua mba riçji tsu ithaan mitsíçña

Xuç ni ajmau ñuju ajngaa

Xogiin ijia nandúún juya

Nduñali rijndoo tsidxawiin ajngaa.

Kajngoo mbiçji rigiç nathaa

Nadxu atiun mu ri xtaá jma nindxu

Ndo ana lú mekhui ndayo xogi ri nidxu

Jma numù tsu nanda xtañùu.

Merced Rodríguez Cantú

5.- Anjgaa rí nangraçjo rujua lú

Kuthù: Rigajma
Tsigù: majun

Rudú naçdu rúbú rudu

Rudì guç edu rúbú rudú

Rigu rumadi naçgaa rúbú

Mamba mbiçji najmidi rìçjì

ìjìn nutsìçjmu rìçjì, Ná riga içjin

Mbaçjiin ìjìn kuaçda rìçjì.

Nakhu guma gukú

Naçni gùkùún rijndo nakhu guma gukú

Khu, khu ikhu guma gukú.

Merced Rodríguez Cantú

6.- Anjgaa rì kithamaja

Kuthù: Rigajma
Tsigù: majun

Xuwa jami xàbù

Nexta mbá xàbù tsu giçdiin àjmìi xuwa na gujo, mbá mitsu neka añaju xàbù nga
rajagun xuñù neke, rijndo nekhànule gùçjo wamba xogi ginitsu.

Imba mitsu mbujù nigajnu xabu, nekhanu le ikha niginu mbujù, muri xta mba xuwa
tsu nanimboo xogi rí naçthun, nga tsu imba nangua inimboo, akhui tsu xàbù,
nixkariya xuwa tsu tsinimboo mu ri nijumu rí ikháá neçni.

Nigajnu rí rigatsu nuthu, ikhaa ma niginù mbuju, akhue ndeyoo rí phu rakhí neçni
nixkariya xuñu.

Kajngo gima mithaya mejaç tsá açkhuun rijndo rí miratha.

Merced Rodríguez Cantú

7.-Anjgaa kithraja

Kuthù: Rigajma
Tsigù: majun

GÙÇ

Naçni la atiun rijndo nakhanu ri mikhina

Mu rí nayangoo rijma nga ndayo inà

Ikháan ñajua rí neçni analu mekhui

Mitsiçñáan ikujmáá rijndo xta tikhuiì

Mixa, jami minujndíin rijndo phu nanigu ithani

Nathambañu xàbù manga mudi ginitsu

Nadxu ratrikhumina xù ni jaçniin

Tsithaçtsigù mbawu nimba miçtsù

Merced Rodríguez Cantú

8.-Anjgaa juma
 Kuthù: Rigajma
Tsigù: majun

Mu rì nithañajui xaxta araçthiin ma midala yàà.

Rijndo nawa eka itsí ná mañu xu tsithadxawin ithani.

Xithamindùùn tsu andià athamindumina ikhàan.

Merced Rodríguez Cantú