HISTORIA DI DOMINIO I LIBERTAT

Mi ke kontabu den purá

kon a mete ku dominio,
libertat i dependensia
den kurso di historia
pa purba mira e prinsipio
òf deskubrí mihó strategia
p’un nashon ku ta depediente
tòg eksperensiá hustisia.
Nos ta kuminsá ku Musulman
ku promé k’a pèrdè “Reconquista”
a dominá gran parti di Spaña
durante kasi mil aña.
Franses a dominá Inglatera
asina tantu tempu
ku gran parti di palabra ingles
ta di desendensia franses.
Hong Kong a bai bek pa China
despues di un siglo di dominio Ingles
p’asina e pueblo por a mira
ku ta di hür libertat tabata promé.
I durante bastante siglo
teritorianan k’a forma Hulanda
a pasa di man pa man
di emperador, rei i bandidu
te nan uni pa finalmente bira
Reino di Paisnan Baho.
Merka tabatin habitante
prosedente di Siberia
ku no tabata konsiderá nan mes
doño di e tera
te ora europeonan a bini pa deskubrí
loke nan a kere tabata India
pa disidí k’e tera ta di nan
i ku habitantenan ta indjan.
Despues ingles nasé na Merka
a fada di hòrta pa Inglatera
i a bringa pa haña libertat
p’asina nan mes keda ku kos hòrtá.
Sklavitut na Kòrsou ta prohibí
apénas shentisesenta aña
despues di tabata siglonan permití
i te ainda poko hende por komprendé
kiko e outonomia ku e isla a haña
berdaderamente ke men.
Ora nos opservá nos ta realisá
ku no tin fórmula òf strategia ideal
riba rumbo pa libertat
sin hopi poder òf forsa;
mester spera di por konta
ku komprenshon i sosten di otro
i ku propio kreatividat i liderazgo
p’esei porfin por logra.
(DPI 2021)