Remarkenan

tokante Sanctielandsverordening frakshon di MFK na 2014/2015

1. Remarkenan general.
Sanshonnan den e mundu di awendia a bira kasi komun I koriente.
Espesialmente den kuadro di Nashonnan Uni no ta pasa un siman òf un
luna òf bo ta tende di sanshonnan ku Konseho di Siguridat di ONU ta
konsiderando òf hasta aplikando.
Di un sierto punto di bista esaki ta algu bon, bo por bisa. E ta nifiká
namenlijk ku komunidat internashonal òf un pais ,ora e ta di opinion ku un
otro pais ta violando reglanan internashonal, no ta disidí di apliká e sanshon
di mas pisa, ku ta bai guera ku otro pais, pero ta disidí di ehersé un preshon
mas leve (sanshonan ekonomiko) pa forsa kumplimentu ku reglanan
internashonal. Pa e motibu ei tabata nesesario pa adaptá e lei bieu di
Sanshon di Antia di 1997. E lei ei tabata hasi solamente posibel, pero no
obligatorio pa Antia bini ku sanshon, ora komunidat internashonal, leinan,
desishonnan akuerdonan internashonal ta eksihí esei. Den sierto sentido
Antia di e manera ei tabata apartá su mes di e komunidat internashonal.
Kaminda p.e. ONU (Nashonan UNI) tabata eksihí pa tuma medidanan di
sanshon I ademas nos a tuma e obligashon ei riba nos komo pais, den nos
Sanctielandsverordening eigenlijk nos tabata bisa komunidat internashonal;
nos ta bai wak si nos ta bai bini ku sanshon. Esei eigenlijk no por I p’esei ta
un bon kos ku ta bai adaptá nos lei na obligashonnan ku ya ta eksistí serka
nos komo pais.

2. E parti di e lei kaminda nos ta enkargá nos mes boluntariamente, sin ku
ningun lei of akuerdo ta obligá nos pa hasi esei, pa tuma over Sanshonnan
di Union Europeo, si partido MFK no por bai di akuerdo ku n’e.

a. EU ta un organisashon regional, konsistiendo di 28 pais na Europa ku
konhuntamente ta tuma desishon pa EU apliká sanshon den sierto kaso.
Mayoria ni konosé Kòrsou ni tin e gana ni deber pa tene kuenta ku nos
interesnan ora nan disidí pa bin ku sanshonnan.

b. Kòrsou no ta miembro di EU, ounke nos ta asosiá ku EU.

c. Kòrsou por sufri daño konsiderabel a konsekuensia di sanshonnan di EU

Ehempel: E kaso si bin sanshonnan di Merka sigui dor di EU kontra di
Venezuela esaki lo ta e kaso sigur.

d. E proseduranan deskribí den e Memorie van Toelichting i e Nota n.a.v
het Verslag pa Kòrsou keda librá di daño a konsekuensia di sanshonnan
di EU no lo funshoná.
- Overleg ku Hulanda prome ku EU tuma sanshon no ta yuda. Ta e 28
paisnan ta tuma medida despues di kual Hulanda ta unu so, i pa
kolmo un pais chikitu
- Tampoko prosedura den Rijksministerraad lo yuda ora medidanan a
keda tumá kaba (geschillen regeling no ta in place)
e. Eigenlijk nos ta entrega dor di e lei aki un parti di nos outonomia atrobe,
manera nos a hasi esei kaba riba e tereno di e consensus rijkswetten I
manera Hulanda kier a hasi riba otro terenonan tambe, manera
toelating en uitzetting di estranheronan. Awor aki ta trata di buitenlands
beleid ku ta Hulanda mester determiná I ku konsekuenshanan direkto pa
por ehèmpel nos ekonomia.
f. No ta komprendibel kon un Gabinete Asjes por bini ku e proposishon di
lei aki. Den e akuerdo di Gobernashon ta para ekstensivamente kon e
Gabinete ke amplia nos pais su espasio pa hiba un maneho di
relashonnan eksterior primeramente dirigí riba nos interesnan, ku
kontaktonan den region di Caribe lo keda fortalesé etc. I awor ta bini ku
un lei ku ta duna nos ménos espasio den nos maneho di relashonnan
eksterior.
g. Aktitut di otro miembro di koalishon, partido pais tampoko nos no por
komprondé. Esaki ta e partido ku por medio di su lider sr. Rosaria a pidi
pa amplia e nomber di e Komishon di Parlamento pa
Koninkrijksaangelegenheden ku e palabra I “relashonnan eksterior” pa
 reflehá e deseo ferviente ku nan tabata tin pa Kòrsou hiba un maneho
propio I independiente riba e tereno aki. A lo ménos esei tabata e
palabranan ekspresá, awor den práktika ta parse ku nan tambe kier
entregá nos outonomia riba e tereno aki na Hulanda.
h. Eigenlijk Gobièrnu mester a tuma e lei aki bek I bai kambi’é promé ku
bini Parlamento di nobo despues di e reunion di Komishon Sentral di 24
di mart. Di 21 miembro di Parlamento den e reunion di Komishon
Sentral 4 no tabata tei òf no a papia. Di e 17 nan presente 10 a bisa ku
tantu palabra I ku tur klaridat ku e ontwerp “no ta rijp pa openbare
behandeling”. Eseinan ta 5 di MFK i 5 di PS. E 7 otronan ku a papia no a
ekspresá nan mes klaramente over di e punto aki. Pa MFK esei kier men
ku mínimal un mayoria di 10 di 17 miembro a konsiderá ku e
proposishon no mester bai openbaar ainda. Mi ta puntra mi mes ta ki
koehandel tabata tin tras di kortina entre partidonan di koalishon I
gobiernu-Asjes, ku awe tòg e proposishon di lei ta riba agènda di
reunion públiko.
i. Ta pa motibu ku Gobièrnu mes no a bini ku e adaptashon nesesario di e
lei, awe frakshon di MFK ta entrega un amendement, den kual nos ta
kambia e obligashon pa sigui sanshonnan di EU den un posibilidat pa
sigui esaki, di manera ku nos por tuma nos mes interesnan na
konsiderashon, promé ku introdusí sanshon.