LOS ESPERTUS DE BRUSELAS

A pesal de que el empleu
que tenemus es precariu,
desdi Bruselas nos dicin
que hay que bajal los salarius.

Las personas que lo dicin
tendrían que aplicalsi el cuentu
y rebajalsi los suyus
más de un noventa por cientu.

A vel si de esa manera
se dan cuenta de una vez
de que con seiscientus eurus
no se llega a fin de mes.

Las personas que nos pidin
seguil con la austeridá,
baju mi puntu de vista
carecin de humanidá.

Y si hay que hacel comu ellus
y dal recomendacionis,
les recomiendu que dejin
de tocalnus los cojo...

No suelu usal pabrotas
en los poemas que escribu.
Por esu en vez de una rima
pongu puntus suspensivus.

Roberto Martin Moreno

LETIZIA EN LA PEOL DE SUS PESADILLAS

Man dichu que en La Zarzuela
va circulandu el run run
que el Peñafiel no me llega
ni a la altura del betún.

Y no quieru que penséis
que no necesitu agüela,
que estu no lo digu yo,
lo dicin en La Zarzuela.

Comu dicin que de muestra
sueli servil un botón,
aquií os deju otra historieta
de la familia Borbón.

Resulta que Doña Leti
se echó un ratinu la siesta,
y al estal tan cansaína
se queó un pelín traspuesta.

Y mientras la Reina
estaba dormiina comu un leñu,
tuvu una gran pesadilla.
Lo que se dici un mal sueñu.

En esi sueñu Letizia
había salíu de bureu.
O dichu de otra manera,
se marchó de pendoneu.

Y al regresal a Zarzuela
no encontraba a su maríu.
El Rey era otra persona.
Lo habían sustituíu.

Resulta que Pablu Iglesias,
era el nuevu soberanu.
y Felipi había abdicau.
(se golvió republicanu)

Y la Reina Doña Leti
se queó mu sorprendía.
Lo que allí estaba pasandu
ella no lo comprendía.

Se le escuchaba decil:
"Me tendré que pellizcal.
¡Estu es una pesadilla!
¡Estu no puei sel real!"

-"Sé que cuesta asimilal
lo que a usté le está pasandu,
peru pueu asegurali
que estu no lo está soñandu.

Su esposu ya se cansó
de estal sentau en el tronu."
-"Pos verás cuandu lo vea.
¡Esu no se lo perdonu!"

-"Ara dicin que trabaja
por el mínimu salariu.
Si no recuerdu yo mal,
curra en un concesionariu.

La casa que ara tenéis
tieni un salon tan humildi,
que según tengu entendíu
no lleva el pobri ni tildi.
Sin la paga del Estau
pa muchus lujus no había,
y os habéis comprau un salon
con falta de ortografía.

Han cambiau ya muchas cosas.
Sepa usté Doña Letizia
que le han quitau a Leonol
la paguina vitalicia."

-"¡Peru qué me estás contandu!"
-"Lo que acaba usté de oil."
-"¡Pos a vel sin esa paga
cómu vamus a vivil!

¡Estu es una pesadilla!
¡Estu es el mundu al revés!
No sé que haremus ahora
pa llegal a fin de mes.

No quieru que usté me diga
lo que yo escuchal no quieru.
¿La nueva Reina de España
se llama Ireni Monteru?"

-"Efectivamenti Leti.
La nueva Reina es mi novia,
y esu del protocolu
no veas lo que le agobia.

Yo intentu tranquilizala
y le digu siempri a Ireni.
¡Hay que sel protocolarius
por la cuenta que nos tieni!"

La monarquía española
ara está en mu güenas manus,
porque la Ireni y el Pablu
también son mu campechanus.

Las vocis de Don Felipi
dispertarun de la siesta
a la Reina Doña Leti,
y ésta diju mu molesta:

"¡Ay cariñu,qué disgustu!
¡Menus mal que he dispertau!
¡Si supieras en el sueñu
las cosinas que he soñau!

Te habían despojau del tronu,
nos querían desahucial,
no eras ni mileurista
y tenías que madrugal.

¿Qué te pareci Felipi?
¿No tienis ná que decil?"
-"Pos que quieris que te diga,
que esu sería un sinvivil.

Sin corona,desahuciau.
pocu sueldu, madrugal..
La verdá cariñu míu,
¡no lo quieru ni pensal!

Peru una cosa te digu.
Estu nunca fue un mal sueñu.
Estu es cosa de las musas
de un escritol estremeñu.

Y cuandu vea a esas musas
les via leel la cartilla,
pa que escriban dulcis sueñus
en vez de estas pesadillas.

Roberto Martin Moreno

UN ALIENÍGENA EN ESTREMAURA

A las tres menus cuartu del mediodía
ha llegau a la Tierra un estraterrestri,
y asegura un espertu en ufología
que venía apuntalsi a la San Silvestri.

Y le diju un vecinu de Moraleja:
"Vieni usté un pocu prontu señol marcianu
La carrera que dici es en Nochivieja.
¿O es que no sa dau cuenta de que es veranu?

Presti mucha atención a lo que le digu.
En veranu y con estas temperaturas
no haci falta que venga con un abrigu
a estus bellus rinconis de Estremaura."

-"Pos entoncis no sueltu ni la maleta,
porque vistu lo vistu será mejol
que me marchi volandu pa mi planeta
porque aquí me derritu con el calol."

Roberto Martin Moreno
EL TRANSPORTE SANITARIO

Una empresa(me pareci que andaluza)
sa queau con el trasporti sanitariu.
Y estu no me lo ha contau ninguna musa,
pos lo acabu de leel en un diariu.

"Miraré por las empresas estremeñas"
Esu era lo que Vara nos decía.
Pos habrà que refrescali la memoria,
que esa empresa perteneci a Andalucía.

El leel noticias comu la que os cuentu
la verdá es que no me causa gran sorpresa,
pos por regla general son mu poquinus
los políticus que cumplin sus promesas.

"Que estu no va suponel ningún recorti.
Que estu no va suponel ningún despíu.
Que esta empresa sali muchu más barata,
y por esu mismu la hemus elegíu."

Tratarán de convencelnus comu sea
que el serviciu de ambulancias no irá a piqui.
¿Peru qué le pidin a los del gobiernu?
Pos que cambi de opinión y rectifiqui.

Y aunque digan que estu no es ningún errol,
mucha genti considera innecesariu
que una empresa que no está en Estremaura
llevi el tema del trasporti sanitariu.

No queremus que por culpa de un Tenoriu
estu puea terminal en un divorciu,
y se corti de raiz la relación
del trasporti sanitariu y el Consorciu.

Roberto Martin Moreno

EL JUBILAU

-Ven pa cá hiju míu.
Ven pa cá Felipi.
Siéntati un ratinu.
Ven que yo te espliqui.

-Papa tengu jambri.
¿No tendrás un donu?
-Tengu algu más ricu.
Voy a dalti un tronu.
Me llena de orgullu
y satisfacción
poelti anuncial
mi jubilación.

Comu tu ya sabis
yo ya estoy mu vieju,
y a vecis no pueu
ni con el pelleju.

Comu tú bien sabis
soy un carcamal,
y por esu mismu
tengu que abdical.

Tous los elefantis
ya duermin tranquilus
porque están al tantu
de que me jubilu.

Deju la corona,
deju la escopeta,
peru no consigu
dejal las muletas.

Y diju Felipi
al oil tou estu:
-No me gusta nà
sel Felipi Sestu.

Pa selti sinceru,
pa estal más contentu,
mejol que me llamin
Felipi Quinientus.

Y a la nueva Reina,
o sea mi parienta,
mejol que la llamin
Letizia cincuenta.

Y tí te aconseju
cuidal de mi mairi.
No quieru que jechis
una cana al airi.

Y deja a Corinna
que no te convieni.
Solamenti busca
levantalti el peni.

Y ara que empieza
prontu mi reinau,
voy a selti francu.
¡Toi acojonau!!

Roberto Martin Moreno

EL INFIEL

Con su arma bien cargá
en un hotel de Suiza,
y esa gran puntería
que a él le caracteriza;

el antigu Rey de España
será de nuevu papá.
Jizu el amol con Corinna
y la dejó embarazá.

Estu pa la monarquía
va resultal un bombazu.
¡Y esu que algunus pensaban
que iba a dal un gatillazu!

Dispués del actu sexual
se pusu a echal un cigarru.
Corinna quería más marcha
y él le diju:"Para el carru.

Yo con una vez al añu
tengu más que suficienti,
por esu te recomiendu
que ni siquiera lo intentis.

Que con la edá que yo tengu
no aguantaría otru asaltu,
y un segundu revolcón
podría causalmi un infartu.

Por esu voy a invitalti
a que no me comprometas.
¡Asina que haz el favol
de no enseñalmi las tetas!

Que tengu un disgustu encima
que estoy mu desazonau.
¿Cómu le digu a Sofía,
que te has queau en estau?

Me va decil vieju verdi
y me va ponel pingandu
y me va dal un sopapu
que me va dejal temblandu.
¡Sinvergüenza!¡Mujeriegu!
Esu es lo que me dirá
cuandu yo le comuniqui
que te has queau embarazá."

-"Yo creía que tu esposa
era de esas liberalis."
-"¡Pos verás cuandu le diga
dami perras pa pañalis!"

-"Yo creía que tu esposa
era muchu más abierta."
-"¡Pos seguru que me poni
las maletas en la puerta!"

-"Yo creía que tu esposa
era güena y comprensiva."
-"¡Pos verás cuandu compruebi
que te engorda la barriga!

Y aluegu está Felipín.
Pareci un cachinu pan,
y tieni más mala lechi
que su sobrinu Froilán.

¿A que vistu por la teli
pareci mu campechanu?
¡Pos verás cuandu se enteri
que va tenel un hermanu!

¿A que da la sensación
de que nunca ha rotu un platu?
¡Pos verás cuandu se enteri
que pasé contigu un ratu!

Le va decil a mi nuera:
"¡A mi pairi yo lo matu!
¡Un hermanu a estas alturas!
¡Traimi el rifli de inmediatu!

Tantu tiempu en hospitalis
pa arreglal tus averías,
y te vienis con el alta,
peru sin vasectomía.

¡Qué razón lleva mi mairi!
¡Si es que eris un mochuelu!
¿Cómu a un pairi de tres hijus
se le ocurri hacelu a pelu?

Mira que te he dichu vecis
que Corinna es un petati,
peru tú comu un tontinu
la montabas en el yati.

Esa rubia solu busca
que le pasis la pensión.
¡Peru cómu se te ocurri
fornical sin protección!

To esas cosas me dirá
cuandu lo tenga delanti.
Se va ponel tan furiosu
que no va habel quien lo aguanti.

To esas cosas me dirá
cuandu me cruci con él.
Por esu por La Zarzuela
no quieru ni aparecel."

-"Hay que pensal en un nombri
antis que llegui el bautizu."
-"Entoncis si no te importa
ponli Mariu Vaquerizu."

-"Peru cari,escúchami.
¿Y si es niña lo que traigu?"
-"Pos la cosa está mu clara.
Se le poni Mayly Sairu.

Ara tengu que dejalti.
Voy a rehabilitación,
y a decili a un sacerdoti
que caí en la tentación.

Cuandu güelva a visitalti
compraré con mi fortuna
carricochis,biberonis,
dos chupetis y una cuna.

Adiós mi chiquirritina."
-"Adiós mi chiquirritín.
Y muchas gracias por dalmi
placel y gustirrinín."

Roberto Martin Moreno
EL TÍU DEL PLASMA

Han dichu dos agentis de la pasma
que al hombri que ganó la presidencia
le gusta hablal por vidiuconferencia
y quieri declaral detrás de un plasma.

Sin duda esti testigu es un fantasma,
peru han dictaminau los de la audiencia
que tieni que hacel actu de presencia
aunqui esti tíu sea un cataplasma.

El hombri que ganó las eleccionis
tendrá que presentalsi en un juzgau
en juliu,cuandu son las vacacionis.

Y ya les digu por adelantau,
que no nos piensa hablal de esus millonis
que to los de la Gürtil san llevau.

Roberto Martin Moreno

SOÑÉ CON UN CORRUPTU ARREPENTÍU

Un casu estraordinariu ha sucedíu.
Resulta que un corruptu ha confesau
los milis de millonis que ha robau
y sa mostrau bastanti arrepentíu.

Quizás ha síu un sueñu,no me fíu.
Tal vez esta noticia la he soñau,
pos siempri que un corruptu va al juzgau
le dici al que le juzga que él no ha síu.

Los seris con tantísima codicia
no son mereceores de respetu.
Merecin que los metan en prisión.

Peru comu en el mundu no hay justicia,
no quierin invental ningún decretu
que ponga fin a tanta corrupción.

Roberto Martin Moreno
DONAL TRAN EN EL VATICANU

Venticuatru de mayu
de dos mil diecisieti.
Donal Tran sa tomau
un café y un doneti.

Y dispués de tomalsi
esi gran desayunu,
el famosu magnati
ha estimau oportunu

el montalsi enseguía
en su gran limusina
porque va visital
la Capilla Sistina.

La letrina de Tran
no hay un Dios que la entienda,
y con esa letrina
tieni escritu en su agenda

que hoy tocaba turismu
por El Vaticanu.
Esu dici la agenda
del americanu.

Cuandu el Papa Franciscu
lo vio de llegal
no sabía el pobrecinu
ni comu actual.

Pensaba pa sus adentrus:
"¡Señol,la que me ha caíu!
A vel si no dura muchu
la visita de esti tíu.

Esti ricu magnati
me pareci un capullu,
Solamenti con velu
ya me da muchu yuyu.

Peru es mi invitau
y seré hospitalariu.
¡Qué le vamus hacel!
Le daré algún rosariu."

-"¿Cómu está Don Franciscu?
¡Venga a dalmi un abrazu!"
-"Échisi usté pallá.
No me sea tan pelmazu"
-"No sea tímidu Papa.
Demi usté un achuchón."
-"Ni un abrazu ni un besu.
Yo no soy besucón."

-"Es pa mí un inmensu honol
estal hoy aquí presenti,
aunqui tengu que decili
que me iré inmediatamenti,

porque tengu mucha prisa,
que me esperan en Bruselas.
Allí estaré con Rajoy,
¡que esi también tieni tela!

Cuandu yo estaba en campaña
quisi hacel una promesa.
¡Y cuandu a mí se me meti
una cosa en la cabeza...!

Si ganu las eleccionis
no piensu jural en vanu.
El día menus pensau
me plantu en El Vaticanu.

Y aunqui mucha genti dici:
"Tran está comu una cabra:"
ya lo ve usté Don Franciscu.
Soy un hombri de palabra.

Y además quieru que sepa
que no tiraré más bombas,
y ahora me entretendré
saltandu un ratu a la comba.

Y tampocu golveré
a fabrical ni un misil,
y esi muru del que hablu
no lo piensu construil."

-"¿Me lo jura de verdá?"
-"Me poni usté en un apuru.
Tendré que hacel un esfuersu,
¡peru venga,se lo juru!

Peru la prósima vez
que el de Pyonyán me provoqui,
le tieni usté que reñil.
Le tieni que dal un toqui.

¿No sabi usté lo que jaci
con las armas nuclearis?
No las jaci de una en una.
Las va fabricandu a paris."

-"Por esu no se preocupi.
El día que vaya a China
cuandu me lo echi a la cara
le doy una regañina."

-"¿Peru es que yo le hablu en chinu?
¡Le he dichu que es de Corea!"
-"Pos le habré entendíu yo mal.
¡Qué prontinu se cabrea!"

Y le diju el presidenti
de los Estaus Uníus:
"Lo que tieni usté que hacel
es limpialsi los oíus."

Y el Papa le replicó:
"Y usté siga con su gira.
¿O no se está dandu cuenta
que su esposa ya se pira?"

-"La Melania es que se marcha
a la Fontana de Trevi,
peru se quieri il solina.
No quieri que yo la llevi.

Esu sí,pa por la tardi
ha puestu mucha insistencia
en que vayamus a vel
la catedral de Florencia.

No me vaga ni arrascalmi.
Ya lo ve,Su Santidá.
Estas son las consecuencias
de una agenda mu apretá.

Hasta prontu Don Franciscu.
Me cuesti lo que me cuesti
otru día vengu a velu."
-"Déjilu,no se molesti.

¡Peru oiga señol Donal!
¡Que se olvía usté el rosariu!"
-"Déjilu señol Bergogliu.
¡Si esu no es tan necesariu!

Roberto Martin Moreno
LAS MAMANDURRIAS

Muchu se habla de otrus asuntus,
y la verdá es que me gustaría
que la noticia que via contarus
no pasi mu desapercibía.

Una mujel(no diré su nombri)
saliendu un día en televisión,
recomendó a la ciudadanía
lo de apretalnus el cinturón.

Y yo sus pueu garantizal,
y esu que no soy ningún espertu,
que la mujel que decía esu
su cinturón lo llevaba sueltu.

Pos dicin que han descubiertu
que le daba repelús
abonal de su bolsillu
los recibus de la luz.

La mujel de la que hablu,
en lugal de dimitil,
anda buscandu en las tiendas
que le vendan un candil;

pos la de las mamandurrias
tieni la cara tan dura,
que si le cortan la luz
ni piensa quealsi a oscuras.

A esta mujel cuyu nombri
no me apeteci escribil,
al final no le quitarun
el carné de conducil.

Pos lo de dalsi a la fuga,
por si algunu no lo sabi
en el país que vivimus
no es un delitu mu gravi.

Aunqui no he mencionau su nombri,
ya les he dau suficientis pistas
pa que averigüin quién es la moza
que una vez más se pasó de lista.

Y ara les pidu que sean ustedis,
comu si fuera una adivinanza,
los que me rimin la última estrofa.
Esa mujel es "Doña".......
Versos de "De juerga en la Casa Blanca"

Ahora que el inquilino de la Casa Blanca es Donal,Rajoy va echar mucho de menos esas juergas
que se corría con Obama.

Se tomarun tantas rondas
nuestru presi y el Obama,
que terminarun cantandu
por Juanitu Valderrama.

Continuarun más tardi
la juerga en la Casa Blanca,
y cantarun por Farina
la canción "Mi Salamanca."

Solamenti les faltó
arrancalsi por Molina,
y cantal esas cancionis
de "Esa voz es una mina."

Entri cubata y cubata
Obama con insistencia,
en la oreja de Rajoy
susurraba esta advertencia:

"Sepa usté señol Marranu,
que aunqui venga de invitau
los llintonis que se tomi
hoy no están subvencionaus.

Luegu un ratinu más tardi
le pasaré la receta.
¡Y no me gasti la broma
de pagalmi con pesetas!"

-"Esu siempri me funciona
cuandu jagu recatiña."
-"Pos será con otra genti,
porque a mí no me la endiña."

A las pocas horas vinu
la mujel de Don Baracu,
y al velus con esa chispa
a los dos los pusu guapus.

¡Juy cómu pusu al Obama!
Le diju que era un blandengui
por tomalsi cuatru copas
y quealsi entenguerengui.
Y es que la primera dama
por lo vistu tieni tela,
y al probecinu lo tieni
más derechu que una vela.

Más tardi saltó Marianu
dispués de la regañina:
"No se ponga gentinosa.
Nusotrus semus asina."

Y entoncis la mujerita
le diju a esti morrión:
"¡Jaga el favol de callalsi
que es usté mu cherrión!

Yo creu que nadi la dau
una vela en esti entierru.
Comu siga en esti plan
de mi casa le destierru.

¡Y a vel si cogi un moqueru
y se limpia usté esa craca!
¡Y agarri bien esi vasu
que se le vierti el cubata!"

Se cuenta que le hizu enteu
y se cogió un güen berrinchi
cuandu la esposa de Obama
le diju que era un güen chinchi.

Por esu diju el Baracu:
"Pórtati bien con el güespi,
que ha dichu que va arreglanus
la máquina cortacespi."

Dispués la primera dama,
de manera mu cordial,
mandaba a los presidentis
a la cama sin cenal....

Roberto Martin Moreno
LA MAIRI SUPERIORA

Con frecuencia suelu darus
noticias de última hora.
Por esu vengu hoy a hablarus
de la mairi superiora.

Una mujel catalana
que es mu tacaña y mu rata,
pa blanqueal los millonis
se hizu pasal por beata.

Estaba tan empeñá
en blanqueal los misalis,
que no quisu ni esperal
a que fueran carnavalis.

Y en vez de il por la calli
con una bata de cola,
se compró un disfrás de monja
la Martita Ferrusola.

Lo que pueu asegurarus
sin faltal a la verdá,
es que el disfrás no incluía
cinturón de castidá.

Hacel casu a lo que os dici
el hiju mayol de Honoriu.
Esi disfrás carecía
de esi bonitu accesoriu.

Por esu Jordi Pujol
se ponía mu contentu
cuandu iba a visitala
los domingus al conventu.

Me pareci que allí dentru
no rezaban el rosariu,
peru sí que practicaban
lo de el saltu del armariu.

La Martita y el Pujol.
¡Qué pareja más opaca!
¡Blanqueaban los misalis
hasta haciendu el tiki taka!

Sieti vecis acertó
esa especi de retacu.
Lo que pasa es que los hijus
también salierun opacus.
Esta opaca parejita
tuvu sieti churumbelis,
que se dan mu güena maña
blanqueandu los papelis.

Unu ya está en el talegu
y el restu va de caminu.
Por esu el maestru Yoda
está mu preocupainu.

Cuandu a Marta Ferrusola
se le antojaba rezal,
su esposu Jordi Pujol
le solía preguntal:

"¿Por qué rezas vida mía?
¿Es que tas güeltu creyenti?"
-No es esu,cariñu míu.
Tú déjami que te cuenti.

Jesusitu de mi vía
lo rezu pa despistal,
no vaya a sel que las monjas
empiecin a sospechal.

Comu mairi superiora
hay que hacel el paripé.
¿Que me pidin que comulgui?
¡Pos también comulgaré!"

-"Lo tienis tou controlau.
No te se escapa ni una.
Sin tí yo no sé que haría
pa guardal tanta fortuna."

De esta familia se dici
que siempri bebi de gorra
porque las perras las tienin
escondías en Andorra.

Hasta unu de su hijus
haci pocu a confesau
que es allí dondi llevaban
el dineru blanqueau.

La matriarca se enfada
cuandu le hablan de misalis,
y dici que es un montaji
y salta por los bardalis.

A esti clan entri registrus,
recursus y más pamplinas
al final les va pasal
comu a la Infanta Cristina.

Y a pesal de que se sabi
que Pujol y la Martita
defraudarun muchu al fiscu
y blanqueaban la guita,
les va pasal comu a otrus.
Se van a il de rositas.

Roberto Martin Moreno

LAS PRIMARIAS

Si hay que hablal del Pesoi de forma brevi
estas son las noticias de última hora.
Ha ganau Pedru Sànchis de forma clara.
Susi Dias ha síu la perdedora.

Del terceru en discordia,que es Pachi Lópis,
no quisiera yo hacerus mención alguna.
Solamenti os diré que en las votacionis
esi mozu no tuvu mucha fortuna.

Zapateru,Gonzális,Alfonsu Guerra,
Bonu,Pagi,Corcuera,Fernándis Vara...
¡Qué disgustu tienin tous los varonis!
¡Hasta tienin distintu colol de cara!

Ya se está comentandu que Susi Dias
va marchalsi unus días pa las Canarias
pa olvial un momentu la pesadilla
que ha sufríu esa moza con las primarias.

La andaluza ha obteníu una gran derrota.
De momentu el Hernandu ya ha dimitíu.
Y antis de despedilmi quieru decirus
que ahora a Pedru lo llaman "El renacíu".

Roberto Martin Moreno
SÁTIRA A LA ALCALDESA

Así se presentaba la Botella a la academia de inglés.

-Güenus días profesol.
Yo soy la esposa de Aznal.
-Muchu gustu en conecela.
Ya se puei usté sental.

Yo no soy el cirujanu
que opera gratis al Rey.
Me pagará por las clasis
lo que estipuli la ley.

Conmigu el sobresalienti
lo tieni garantizau.
Por esu me gusta siempri
cobral por adelantau."

-Por esu no se preocupi.
Tengu sueldu de alcaldesa.
Y mi esposu gana muchu
trabajandu con Endesa.

Tieni pensión vitalicia
por habel síu presidenti.
¡Figúrisi cuántas perras
tengu en la cuenta corrienti!...

Vengu con mucha ilusión
a mi primel día de clasi,
pa vel si puei enseñalmi
a decil alguna frasi.

-Ni sabi que dirty es suciu,
ni sabi que creisi es locu.
Por esu es mejol que empieci
despaciu y poquitu a pocu.

Lo primeru los coloris,
que son bastantis sencillus.
Al roju le dicin red
y llelu es el amarillu.

Al azul le dicin blu,
el verdi se dici grin,
el oran es el naranja
y el rosa se dici pin.

El colol negru es el blas,
y el colol blancu es el guai.
Gud monin es güenus días
y güenas nochis gud nai.
Estus son variu conceptus
que usté debi conocel.
-¡Diga que sí señol profi,
que yo vengu aquí a aprendel!

Soy una alumna mu lista.
Se lo voy a demostral.
Presti atención un momentu
que lo voy a impresional.

Al unu le digu Juan,
y al dos se le dici Chus.
-¡Ya lo creu que me impresiona!
¡Casi me da un patatús!

-Adiós se dici o la la,
y hola es Arrivederchi.
-No empieci a mezclal idiomas,
si no quieri que la echi.

Presti algu más de atención.
No siga por esa senda.
Con esa pronunciación
será dificil que aprenda...
EUROVISIÓN 2047

Me he metíu en una máquina del tiempu
y he viajau hasta el dos mil cuarenta y sieti,
y he podíu averigual que en esi añu
ganará la Euruvisión un tal Faleti.

Se rindierun a los pies de esti cantanti
alemanis,bielorrusus,portuguesis,
italianus,eslovacus,,los noruegus,
los chipriotas,los de Ucrania,los francesis.

Doci puntus,doci puntus,doci puntus.
Esu era lo que más se repetía,
y Faleti cada vez con más ventaja
se estrañaba porque no se lo creía.

Con Las Kechu,con Edurni o Rut Lorenzu
siempri España iba comu favorita,
peru luegu por estrañas circunstancias
regresaban de vacíu pa casita.

Y es que ya llevaba España muchu tiempu
sin ganal el premiu de esi festival,
y se habían ya perdíu las esperanzas,
y estu nadi lo podía imaginal.

¡Qué razón lleva la genti cuandu dici
que Faleti se mereci un monumentu!
Esta vez las votacionis fuerun justas
y ganó porque cantó con sentimientu.

¿Que queréis sabel más cosas del futuru?
Pos aquí no cambia muchu el panorama.
A la Esteban se le siguin dandu perras
por echalsi en el sofá con un pijama.

Muchas vecis es mejol no preguntal.
Muchas vecis es mejol estal callau.
Pregunté que cómu va lo de la Infanta.
¿Y a que no sabéis lo que me han contestau?

Que dispués de trenta y dos añus de juiciu,
los que juzgan han llegau a la conclusión
de que esu del blanqueu ya ha prescritu,
y por esu se libró de la prisión.

Desdi entoncis en mi estancia en el futuru
ya no sacu más la lengua de paseu,
y es posibli que me güelva pa mi casa
cuandu tomi la pastilla del mareu.
No quisiera despedilmi sin decirus
lo que Edurni nos contó con mucha gracia:
"Menus puntus sa llevau la Rosa Diiz
por querel Unión,Progresu y Democracia.

Roberto Martin Moreno

El CASU PUJOL

Jordi Pujol perteneci
al mundu de la aristocracia,
y dicin que se pareci
al de La guerra de las galaxias.

Tras casi cuarenta añus,
es decil,sin mucha prisa
ha terminau confesandu:
"Guardu perras en Suiza.

Peru no cincuenta eurus
ni sesenta ni setenta.
Tengu ya tantus millonis
que he perdíu hasta la cuenta.

Comu no declaru a Hacienda
siempri tengu superavi,
peru no lo he dichu nunca,
porque aluegu tou se sabi.

Cuandu salgu de paseu
me pidin esplicacionis,
y me preguntan que cómu
pudi ahorral tantus millonis.

Y algunus con mala lechi,
me dicin que su deseu
es velmi dentru del trullu
antis que jinqui el poleu.

Me las daba de honorabli,
peru soy comu un demoniu.
¿Os esplicu cómu obtuvi
semejanti patrimoniu?

Soy un hombri mu bajinu
que ha llegau hasta mui arriba,
porque más de cincu vecis
me tocó la primitiva."

Y aluegu diju el chiquinu
¡dati cuenta qué ocurrencia!,
que parti de su fortuna
es productu de una herencia.

Y comu dici el refrán,
"De tal palu,tal astilla."
Y es que los hijus de Jordi,
defraudan de maravilla.

De sieti hermanus que son,
se dici que el más chiquinu,
tres mil millonis de eurus
los blanqueó en un ratinu.

Se dici de los Pujolis
que acabarán en la trena,
porque blanquean mejol
que el detergenti de Elena.

Con tantas perras que tienin
los Pujolis Ferrusola
no se asustan cuandu vieni
la factura de Iberdrola.

Os prometu que es mu ciertu
lo que escribu en esti foliu.
¡A esta genti no le afecta
las subías del gasoliu!
Con casus comu la Gurtil,
Los Eris o los Pujol
la corrupción en España
está de mal en peol.

¡Cuántus casus comu estus
habrá que no los sepamus!
Por culpa de estus corruptus
estamus hoy comu estamus.

Y los juicius van despaciu.
Pa que Fabra entri en prisión,
han tardau más de diez añus
en tomal la decisión.

Yo ya voy adespedilmi.
Me voy pa mis aposentus,
que ahora le toca a Jordi,
hablal en el parlamentu.

Roberto Martin Moreno

EUROVISIÓN 2017

Esti añu,comu no podía sel menus,
el mocitu que nos ha representau
regresaba galleandu pa su casa
cabizbaju y un pelín desafinau.

¡Si es que no podía sel de otra manera!
¡Si es que estu se veía ya venil!
O mandamus un cantanti en condicionis,
o si no seremus el hazmirreil.

No poemus il así a ninguna parti.
No pretendu de esti tema hacerus chanza,
peru a mí sinceramenti esi Navarru
me inspiraba mu poquina confianza.

La verdá es que la canción de esi mocitu
hasta ayel nunca la había yo escuchau,
peru oyénduli cantal el estribillu
la verdá es que me queó del otru lau.

Deberían lleval cancionis más bonitas,
porque el tema que ha llevau esi Navarru
no le llega ni a la suela los zapatus
ni a "El toritu guapu"ni a la de "Mi carru"

Esti chicu que quería comelsi el mundu
y traía muchas ganas de triunfal
al final diju agachandu las orejas
que venía solu por participal.

Estu ha síu una debacli en toa regla.
Los que vierun a Manel en los ensayus
intuían que pintaba mal la cosa
porque el pobri no dejaba de hacel gallus.
Y a pesal de que no daba pie con bolu
lo pusierun a los pies de los caballus.

Vistu estu por el lau más posotivu
hemus siu los primerus por la cola.
Por lo tantu ya tenemus un motivu
pa que le hagan a esi mozu alguna ola.

Un guasón le preguntó a Manel Navarru:
"¿Cuántus puntus has teníu?"-"Solu cincu"
Y le diju componiendu un pareau:
"Pos estoncis por el culu te la jincu"

Al sacal cincu puntinus solamenti
esa rima se la había puestu a güevu,
peru nunca hay que perdel las esperanzas.
Seguiremus intentándulu de nuevu.

La ilusión nunca debemus de perdela.
Seguiremus intentàndulu más vecis.
La victoria ya nos anda paí rondandu,
que esti añu han ganau los portuguesis.

Fue empezal las votacionis y enseguía
vimus claru(a excepción de algún ilusu)
que esti añu los demás participantis
no podían competil contra esi lusu.

Por si algunu quieri dalmi una respuesta
muchu ojitu a la pregunta que sus pongu.
¿No pensáis que la victoria portuguesa se sustenta en que es posibli que haya tongu?

Solamenti por la marcha que tenía
esi tíu que tocaba el saxofón,
fue Moldavia la nación que merecía
conquistal esa primera posición.

Y nusotrus si queremus sel primerus
les tendremus que mandal a Paquirrín.
Por mi parti yo ya voy a despedilmi.
Estus versus ya llegarun a su fin.

Roberto Martin Moreno
Este soneto va dedicado a los seguidores del Atleti.

EL WANDA METROPOLITANU

Se va cambial de equipu esti veranu.
El Rey Felipi Sestu nos prometi
jacelsi seguiol del Albaceti,
del Betis o del Rayu Vallecanu.

Pos no le gusta muchu al soberanu
(según nos confesaba Doña Leti)
que ahora el nuevu estadiu del Atleti
se llami Wanda Metropolitanu.

Por una vez via dali la razón
al hombri que descansa en La Zarzuela.
Pos yo también compartu su opinión.

¡El nuevu nombrecitu tieni tela!
¡Qué pena que al Vicenti Calderón
le pongan una cruz con una esquela!

Roberto Martin Moreno
EL PRÍNCIPI QUE SALIÓ RANA

-Soy la Espi,¿quién me llama?
-Tu amigu Nachu Gonzális.
-¿El que tieni tantas perras
en paraísus fiscalis?

-El mismu que visti y calza.
¿No sabis que man trincau?
-¿Pos cómu no via sabelu?
¡Si esu ha síu mu sonau!

A mí es que tu detención
me tieni mu disgustá
¿No me visti por la teli
llorandu desconsolá?

-Esu que tú derramasti
no son lágrimas de arena
comu aquellas de Peret
que caían en la arena.

Las tuyas más bien parecin
lágrimas de cocodrilu,
que en vez de il pa la arena
se irán a paral pal Nilu.

-¡Ay Nachu,qué cosas tienis!
¡Pareci que no te enteras!
¿Cómu tengu que decilti
que son lágrimas sinceras?

Desdi que te detuvierun
en esta "Operación Lezu"
antis de ilmi acostal
por tí to las nochis rezu.

Y aluegu le diju a Nachu
su amiguina la Esperanza:
-En tí yo deposité
toita mi confianza.

¿Y tú cómu me lo pagas?
Jodiendu bien la marrana.
¡Te tenía comu a príncipi
y al final salisti rana!

Lo que te está sucediendu
se te está bien empleau.
-Sientu muchu Esperanzita
habelti decepcionau.
Yo era débil y la genti
me ofrecía comisionis.
¿Cómu iba a rechazal
yo tantísimus millonis?

-Si te digu la verdá
me caías tan simpáticu
que tou te lo perdonaba,
inclusu lo de esi áticu.

Peru estu del canal
de Isabelina segunda
no lo pueu pasal por altu.
¡Tas ganau una güena tunda!

-Pos tú no hablis tan altu
que no eris ninguna santa.
Y si tengu que il a juiciu
piensu tiral de la manta.

Algunus corruptus más
me via lleval por delanti,
aunqui tengan que creal
cárcilis macrugigantis.

Y se te van a cael
toitus los palus del chozu.
-Hombri Nachu,por favol.
No seas tan rencorosu,
que yo no quieru acabal
durmiendu en un calabozu.

No pueis jacelmi esu.
No me seas tan joíu,
¿peru yo qué culpa tengu
de que te haigan deteníu?
¿O es que no tienis bastanti
con que yo haiga dimitíu?

Ya no soy la portavoz
del partíu populal.
¡Ya veremus si no acabu
yendu a Sotu del Real!

Al muchachu de Pujol
allí lo han llevau también.
En esa famosa cárcil
está la cren de la cren.

Por ciertu,¿me pueis decil
qué tal se duermi en el trullu?
Seguru que no descansas
comu en el áticu tuyu.

-Es esta celda tan fría
no logru cogel el sueñu,
y un presu que tengu al lau
se pei comu un cigüeñu.

Aquí no pegu ni oju.
Estoy siempri desvelau.
-Esu será que entoavía
no estás al trullu adaptau.

Peru de aquí a un par de mesis
no estrañarás ni el colchón.
¡Y ya verás que agustitu
cuandu duermas de un tirón!

Ara que estoy en el paru,
comu en casa yo me aburru,
han dichu mis asesoris
que me busqui un nuevu curru.

Man echu varias ofertas.
Por ejemplu el otru día
man llamau los de ferrari
pa ilmi a su escudería.

San enterau que maneju
con gran destreza el volanti.
-Pos no entiendu cómu dicin
una cosa semejanti.

Recuerdu yo que una vez
que me monté en el tu cochi
sufrí muchas pesadillas
al echalmi por la nochi.

Yo iba de copilotu
y estaba cagau de mieu.
Lo que yo pasé esa tardi
a naidi se lo deseu.

-Adiós amigu Nacheti.
-Veti con Dios amiguina.
Ponmi en venta esi chalé
que tengu en la Conchinchina.

A vel si asín sacu perras
pa pagalmi la fianza.
-No te preocupis Nacheti.
¡A esu invita la Esperanza!
ROBERTO MARTÍN MORENO

Sign up to vote on this title
UsefulNot useful