Talibus informans monitor virtutis alumpnum

Imbuit irriguam fecundis imbribus aurem

Et thalamo cordis mores impingit honestos.

Ille libens sacris bibulas accomodat aures

Vocibus, extremae commendans singula cellae.

Mens igitur laudum stimulis sibi credula fervet.

Germinat intus amor belli regnique libido.

Iam timor omnis abest, iam spes preiudicat annis, 190

Iam fruitur voto, iam mente proteruit in hostem,

Iam regant, iam servit ei quadrangulus orbis.

Ergo ubi que ferulae pueros emancipat etas

Advenit, Macedo civiliter induit arma

Non sibi sed patriae, vivitque in principe civis,

Tyro quidem sed corde gygas, sed pectore miles

Emeritus. Tunc indomitum tunc tanta videres

Velle Neoptolemum que vix expleret Achilles.

Non solum in Persas, quos contra iusta querelae 200

Causa sibi fuerat, parat insanire, sed ipsum

Et totum, si fata sinant, coniurat in orbem