THU TATUAM August 25, 2013 Weekly Siyin News

Malaysia Sizaang Kipawlna SOM In Meeting SOM (Siyin Organization of Malaysia) meeting khat Aug 18, 2013 SOM zumh ah nei hi. Ngambeal taw kisai min sazian UNHCR in hong piak ciang, khua lampuite in zongh eima khuami te katciat natuh thukimna kinei hi. Khua lampui teng sia anuai abangh hi. 1) Khuasak panh Sya Nangtak (017-4326-561) Von Khai Dik (010-3970-051) 2) Thuklai panh U Lian Dal (016-320-5506) Sya Mung Khat (012-627-4324) 3) Lophei panh Pa Tuangpumdal (016-9747-679) Pa Kaang Cin Lian (016- 320 5506) 4) Voklaak panh Upa Pum Khual (016-2936 610) Upa Lian Za Pau (012-3795 413) 5) Limkhai panh Upa Thawng Pu ( 012-5477 320) Upa James Hunghpu (014-6365 657) Rev Philip Khai (017-3296379) 6) Buanman panh Suapui Lian (012-941 4459) Nu Suan (012-905 5571) 7) Taakkhawl Suapui Thangdawng (0163681736) Suapui Ngaik Pui (012-2561 665) Kamphen Tuh Ngealkholna 1) Upa Thawng Khen Pau 2) Sya Noel Cin Mangthuam 3) Sm Cingh Khua Man 4) Sya Mang Tak 5) Sya Pum Kap Thang 6) Sm Hester Kiim 7) Pa Tuangpumdal 8) Suapui Pau Do Khai 9) Sm Mang Suan Cing 10) Sya Mung Khat Register Taw Kisai Sia Ipoh ah September 3, ciang, RC biakinn khat ah piak kipanh tuh hi. UNHCR zumhpi panh direct vo phone taw kisam aa, see thumsua see khat bek kisam thei in, adang list te sia ahai ngawl SOM Ah Kipia tuh hi. 1) Na case sia aat sa in koi in, (Mi atam lei leh, ih laidal teng kep sak vazil thei tha tuh) 3) Na khua lampuite taw kizomh tawntung in. 4) Ngambeal delh tuh hong pai na hi kom, akisamh le na nasep nusia lel in. 5) Na min, thetni, pamin, numin te sazian napiak sa sung abangh hong kisam tuh aa, hong sam tuh sia UNHCR panh direct (or) na Khua Lampuite tung tawn hi tuh hi.

w w w .t h u t a t u a m. n e t
Malaysia Vai Tatuam Malaysia ngam Penang , ah August 23 nitak nai 10:45 pawl in, mi 6 sia kala mingilote in mi 6 niangtui sai ato laitak mi 2 mawtaw cycle taw pai in, thau taw kaap in, apeang le angawi pan kha aa, kuama thi law ngawl bilbel ci hi. Zomi Khat Thalup Thuak Penang ah Kawlngammi Thang Shing Ling 26 (UNHCR Card Toai) sia August 22, 2013 in , container khat sung ah kimu ci hi. Anasep kipat zawk ni 2 hi pheang in, anaseppui te in naam taw holh hi tuh in muangmaw uh hi. Biakna Vai Taw Kisai Buaina Malay kam in "Allah" ci laimal Tapidawte'n zak tuh kikhaam in, "Tuhan" ci kammal kizangh sak ahikom, The Christian Federation of Malaysia (CFM) hanciamna taw 2011 lai pan akipat uh sia tudong man thei ngawl lai hi. August 22 ,2013 thukhen zumh pi ah, thukhen maangpa in tapidawte in "Allah" ci laimal sia biakinn leh, biakna taw kisai laihawm te tung ah zangh thei ahi hang, Laithiangtho bu sung ah zak tuh awi ngawl lai hi. CFM chairman Rev Dr Eu Hong Seng in "Allah" sia Pathian cina hi'n "Tuhan" cisia Topa cina hi. Anima akhiakna atuamtek hi ci hi. Athu chiang thei ngawl ahikom, September 10 ciang zumh ah thu kisung kik laleau tuh uh hi. September 1 Ciang Operacy Vawtsawm Ci Malaysia ngam ah September 1, 2013 ciang pa kipanh permit nei ngawl naseamte sia operation nasia mama vawt in kiman tuh ci'n Home Minister Datuk Seri Dr Ahmad Zahid Hamidi in Aug 23,2013 in son hi.a Palikte le adang kumhpi naseamte zongh kihel in man sak tuh hi. "Permit nei ngawl peuma nasep sak piak awi ngawl khu hi" ci aa, "naseam te zongh sia apute in, inn, zatui zaha le amate phattuam natuh vawt leh hoi tuh hi" ci si hi. "Malaysia se, ngamdang mi naseam kisap banghma in amate ii ou tuh/ khoi tuh kisamh hi" ci'n belap hi.

Israel In Labanon Tung Ah Thukkik Israel ngalvanleang te in, Lebanon khuapi Beirut thangsang AlQaida omna Aug 23,2013 in sim hi. 2006 zawk tutuung asia Israelte in ngal vanleang azak masak hi in, asimna ahang sia tua mun panh ngalte in, Rocket tang 4 taw kaap masa in athuk kik dan in kison hi. Egypt Ah Biakinn 40 Bangh Meitaw Kihaal Egypt ngam tutuung buai huu in, Tapidaw biakinn 40 bangh mei taw kihal sak in, 23 sia nasia tatak simh thuak hi. Simh thuak biakinnte ah spray taw lai ki-at te sia "Allah lian hi" "Egypt sia Islamic ngam hi" ci hi Egypt ngam mi million 90 pha in 10 % sia tapidaw hi. Syria Ah Atambel Athini Syria ngam buai zawk anasia bel kithalup ni sia August 21, 2013 ni hi in, mi 1,300 hunkhat in thikhawm uh hi. Kumhpi langpante omna Damascus nisuana sang, Ain Tarma, Zamalka le Jobar ah zingsang nai 3:00 ngual mutthip laitak hi in, Rocket tang sung gas (camical) nam khat koi in, tua thautang puakthapna thauvui khuu ngim angaa theampo thisiat hi. Pathian Thiamsa Ulol Pawl Ulol pawl (Clown frog) te sia America Continent thangsang Amazon ngam sung ah om hi. Acii (color) nam kizui in min tatuam zongh kipia hi. Atunh sia Letmat 1.57 (4cm) sau bek in, leidapna munh bek ah taa nuam aa, tui sung ah atui tuh ciang tuak bek in, tuak vazeang ngawl aa, thingte sawlhing kawm vo ah om nuam saap hi. India Zomi (Chin) Saangpatangte Conference Chin Studuent Union ii A (12)vei kimukhopna sia August 24 in vawt uh aa, 2013-2014 laisin saang patangte kihel tuh hi. Kumpi saangkaa te leh Laithiang saang patang om teng sam ci hi. CSU sia 1995 kumh in akipat hi. India ah, Tedim kampau suapuite in Lamkha ah Tedim Chin Student Association (CSA) ci'n kipawlna zongh nei ua, CSU taw kizopna om ngawl ci hi.

Suapui Lamh Tunh Kisuam Malaysia, Cheras Maluri ah August 20 nitak in Niangtui sai khat ato laitak Kalate khat in naam tawh suapui Lamh Tun (Limkhai) ii mai le bil hui panh aat sak aa, 43 vei khui sak hi. Kalapa sia Palikte in man aa, Pudu palik zumh ah koi hi. Ama UN card sia SOM in zumh ah kiseau pui in card thak ngaa kik hi. Kawlpi Ah Bandulah Lim Omna Laih Tuh Kawlpi lamka-bom ah akikoi Bandulah lim sia, Kawlpi city hall ah koi tuh ci'n Aug 20 Kawl news sung kisua hi. Ngunkhawm Ah Saang Syapi Khat Awklumh Ngunkhawm veang No 3 ah August 21 sun nai 1:00 pawl in saang syama khat ngui awk lumh hi. Daw Khin San Myint 53 hi aa, pasal nei ngawl ngaknu haam pui khat hi in, ama nguak om ci hi. Dam ngawl ahikom, MC laa hi in, athin kiam tawntung khat ci hi. Ama sia asaang patangte tung ah zongh adik mama khat in kison hi. Sen Navy Panh Mobile Clinic Vawt Tuh Kawl Navy-te ii sapna taw Senngam Navy 'Peace Ark' sia August 28 ciang Yangon Thilawa Dock ah theng tuh hi. Nipi khat sung taam tuh aa, Yangon om eima akua mapo in, dam ngawl nate athong in kibawl thei tuh hi. Yangon Kawl Embassy zumh in zasak kik tu hi Asang Bel Cable Car Spain ngam "The Mrida Cable Car" sia leitung ah asangbel in kison aa, Pi 5,380 sang in taai hi. Akipatna sia Pico Espejo pi 15,633 hi. 1960 kumh in kipanh aa,lui lei zo ahikom, pua kik nuam ahikom 2008 kumh ciang tawlnga kik hi. Mrida le Espejo mual vum kilaklaw tai 7.8 kikhua na sung setkan khat pi 15 kikhiin ci hi. Tunipi Mithi Luang 5 Hiangzing Khua Pa Mang Cin Kham Tanu Lia Vung Khan Dim 13 in August 24, 2013 Zing Nai 1:30 pawl in hong nusia hi. Limkhai khuami (Pu Hau Mang) Tapa Pa Pum Zam 28 In Malaysia , Salayang Zato Panh Thintum natna taw August 23, in hong nusia hi.. Sualim khuami Tahan teang Pu Suan Khua Pau tapa Pa Mung Pi 28 in Aug 22, 2013 in Sozaang panh ngim lei in hong nusia hi. Tulaitak Hiangzing om Pa Thuam Khup 64 (Thatmun) in August 21, 2013 nitak nai 5:50 in a omna inn pan puuk in hong nusia hi. Tahan Om Liimkhai Nu Man Khan Huai@Man San (44)In Aug 18 , Zingnai 10:00 in Lungnatna taw hong nusia hi.