¿Ba’ax u k’áat Dioos ti’ to’on?

7 xook
Bix je’el a nats’ikaba ich payalchi’ tu yiknal Dioose’
¿Ba’axten k’a’anan ka payalchi’inako’on mantats’? (1)
¿Ti’ máax k’a’abéet k-payalchi’, yéetel bixi? (2, 3)
¿Yo’olal ba’axo’ob ma’alob ka payalchi’inako’on? (4)
¿Ba’ax k’iin k’a’abéet a payalchi’? (5, 6)
¿Ku yu’ubik wa Dioos tuláakal payalchi’ob? (7)

1. Le payalchi’o’ jump’éel kabal óolal t’aan yéetel Dioos. Mantats’ k’a’abéet k-payalchi’
ti’ Dioos. Wa k-beetike’, yaan k-u’uyik naats’ yaniko’on ti’ leti’ je’ex bey ti’ juntúul éet
bisbail jach k-yaabilme’. Kex Jéeoba jach táaj nojoch yéetel jach yaan u páajtalile’, ku
ch’enxikintik k-payalchi’ob. ¿Teche’ suuk wa a payalchi’ ti’ Dioos? (Salmo 65:2; 1
Tesalonicenses 5:17.)

2. Le payalchi’o’ táakpaja’an ichil k-áadorasion.

Le o’olale’, k’a’abéet k-payalchi’ chéen ti’ Dioos
Jéeoba. Ka kuxlaj Jesus way Lu’ume’, mantats’
payalchi’inaj ti’ u Taata, ti’ mix máak uláak’.
To’on xane’ k’a’abéet k-beetik beyo’ (Mateo 4:10;
6:9). Ba’ale’ k’a’abéet k-payalchi’ mantats’ tu
k’aaba’ Jesus. Beyo’ k-e’esik chíinjo’oltik u
páajtalil yéetel k-oksaj óoltik le bo’ol utia’al
sáalbasion tu ts’áaj t-o’olalo’ (Juan 14:6; 1 Juan
2:1, 2).

3. Ken payalchi’inako’on ti’ Dioose’, k’a’abéet u

jóok’ol ichil k-puksi’ik’al ba’ax bin k-a’al ti’. Ma’
k’a’abéet k-payalchi’ chéen jump’éel bixi’ mix xan
ka k-xok ti’ jump’éel u liibroil payalchi’obi’
(Mateo 6:7, 8). Je’el u páajtal k-payalchi’ je’el bix aniko’on wa táan k-e’esik tsiikile’, je’el
ba’axak súutukile’ yéetel je’el tu’uxake’. Dioose’ ku ch’enxikintik tak le mukul
payalchi’ob k-beetiko’, le k-beetik ichil k-puksi’ik’alo’ (1 Samuel 1:12, 13). Ken
payalchi’inako’on yo’olal ba’alo’ob yaan yil chéen yéetel to’one’ ma’alob ka k-beet ti’
jump’éel kúuchil tu’ux yaan jeets’elil yéetel tu’ux mina’an uláak’ máako’obi’ (Marcos
1:35).

4. ¿Yo’olal ba’axo’ob je’el u páajtal a payalchi’e’? Yo’olal je’el ba’axak yaan yil yéetel a
bisbail yéetel Dioose’ (Filipenses 4:6, 7). U payalchi’il Paadrenuestroe’ ku ye’esik
k’a’abéet k-payalchi’ tu yo’olal u k’aaba’ Jéeoba yéetel yo’olal ba’ax u tukulmaj u beetik.
Bey xan je’el u páajtal k-k’áatik ka u ts’áato’on ba’axo’ob k’a’abéetto’on utia’al k-kuxtal,
ka u sa’as k-si’ipilo’ob yéetel ka u yáanto’on utia’al ma’ k-lúubul ti’ k’aak’as
ts’íibolalo’ob (Mateo 6:9-13). K-payalchi’obe’ ma’ unaj u ye’esiko’ob chéen táan k-tuukul
t-o’olali’. Chéen k’a’abéet k-k’áatik ba’alo’ob utstut’aan Dioos (1 Juan 5:14).
 5. Teche’ je’el u páajtal a payalchi’ je’el ba’axak súutukil ku
síijil ta puksi’ik’al a ts’áaik nib óolal wa a ki’iki’t’antik
Dioose’ (1 Crónicas 29:10-13). Ma’ p’atik a payalchi’ ken
anaktech talamilo’ob ku beetiko’ob u túumta’al a oksaj óolal
(Salmo 55:22; 120:1). Wa neka’aj janale’ ma’alob xan ka
payalchi’inako’on táanil (Mateo 14:19). Jéeobae’ ku
ya’alikto’on ka payalchi’inako’on «mantats’» (Efesios 6:18,
Le Tumben Nupt’an (Versión Popular)).

6. Wa k-lúubul ti’ jump’éel nojoch si’ipile’, k’a’abéet sen k-

payalchi’ yéetel k-k’áat óoltik ti’ Jéeoba ka u ch’a’ato’on óotsilal yéetel ka u sa’as k-
si’ipil. Dioose’ ku "sa’asaj si’ipil”, ba’ale’ chéen wa k-káantik k-si’ipil ti’ leti’ yéetel
kanáantikba utia’al ma’ k-ka’a meentik (Salmo 86:5, U kayiloob u cajal Jajal Dios;
Proverbios 28:13).

7. Jéeobae’ chéen ku yu’ubik u payalchi’ uts máako’ob. Utia’al ka u yu’ub Dioos a

payalchi’obe’, teche’ k’a’abéet a ts’áaik a wóol tuláakal le ku páajtale’ utia’al a kuxtal
je’ex ya’alik u leeyo’obe’ (Proverbios 15:29; 28:9). Ken payalchi’inakeche’, k’a’abéet a
meentik yéetel kabal óolal (Lucas 18:9-14). Ba’axo’ob ka beetike’ k’a’abéet u ye’esik a
k’áat a k’am ba’ax ka k’áatik ich a payalchi’. Beyo’ yaan a we’esik yantech oksaj óolal
yéetel táan a payalchi’ yéetel u jaajil a wóol. Chéen bey túun je’el u núuka’al a
payalchi’ob tumen Jéeobao’ (Hebreos 11:6).