CAMIN REAL DEL PUERTU LA MESA

(Ptu. San Lorenzu – San Martin de Ondes)

Güey entamamos a caleyar nes praderíes del puertu San Lorenzo (1394 m. y jito XXI),
colando pal NO pela vertiente somedana, pasando perriba les aldegues de Villamor y Las
Orderías y con vistes pa les sierres de La Serrantina y Paramu. Na collada La Tartulla
colamos pa tierres teberganes y la mirada extiéndese pal E: La Sobia, L’Aramu, Peña
Rueda, … Per una vertiente o per otra, el camin algama la Vega de Cueiru na collada
Santa Marina (1.384 m.). Pasaes les ruines de lo que fueren capiella y venta, topamos un
tramu empedrau y les amplies praderíes con cabañes esfarraplaes nes que la xente de los
conceyos que nesti llugar s’amesten (Teberga, Somieda, Belmonte y Grao) celebren feria
y romería tolos años.
Dexamos Cueiru pela collada La Bobia y en Pousa la Sal (Belmonte), embaxo el picu La
Berza, atopamos otru tramu empedrau. Per baxo de nos tá la Braña Los Fuexos y l’aldega
de Montoso, enfrente Peña Manterca y más cerca’l picu Monegro (tien una antena na
pica). Na collada La Barrera cambia d’orientacion (Grao), pasa pela braña L’Acebu
(1278 m.) na cabecera’l valle del Cubia, y pela Sierra del Couto baxa pala collada La
Forcada (1071 m.) onde cruciamos la pista que comunica Llamosu (Belmonte) con
Tolinas (Grao). El Camin Real sube pela manzorga pala collada Peñas Negras y la Venta
Porcabezas (1110 m.) reconvertida en cuadra – Dende la collada Peñas Negras
podemos subir pela fastera del Picu Porcabezas (1210 m.) hasta el su cumal, que tien
moyón geodesicu, con prestoses güeyaes too alredor –
Continuamos el descenso por praos, pela collada Valbona, los mayaos de Collares y La
Corredoria, onde atoparemos la pista que une Noceda (Grao) con San Martin de Ondes
(Belmonte); garramos la pista colando pa la nuesa manzorga, que va llevanos hasta el
pueblu de S. Martin de Ondes (690 m.) onde finiquitamos la caminata per esti segundu
tramu del Camin Real de la Mesa.

Percorriu aproximáu : 18 ,5 kms. Desnivel aproximáu : 759 m.