NA PANTALAN

por Francis C. Macansantos

Abajo y arrededor del pier,

El agua del mar bien dasuk,
Daw culado sinido que ajuntao e puersa.
Mama y Papa, ostedes dos
Ta sigui ya na marijada del cambio—
Agarrao del tierra
Pero sigui siempre ta man biaje
Na canto hypnotico del tiempo eternal.

Aqui na pantalan antes

Ta lliba ostedes conmigo
Y ta llena conmigo de estranio.
Cosa ba ostedes ta gusta aqui ?
No hay man ningunos
Que ta hace kita jatud
Para munta na barco
Que ay sale
Para na maga pabuloso lugar.
Pero aqui siempre ostedes, contento,
Ta come mais asao duru
Y ta mira-mira con maga uno o dos gente
Que no hay que hace si no pesca balu,
Diutay, plakit, y matunuk.

Pero ta lliga aqui el biento

Siguro ta sale pa desde na isla de Basilan,
Cruzando con el mar para aqui
Na pantalan del Zamboamga.
Y mira con el grandeza del cielo aqui
Adornao con su largo y lejos
Butada de estrella
Con su anciedad comfirmao,
Y el mar que hende gayot mas joven
Ta man tupahan na un distancia
Alumbrao del luna
Na linia secreto del horizonte.
El mar ta abrasa con el maga isla;
Agua, viento, cielo y tierra
Ta man agarrahan.

Amo siguro, Pang, Mang,

Pirme ostedes ta anda aqui,
Para pidi el pulso de maga cosa elemental
Y natural..Por pabor dispensa
Con este anak de ostedes
Que no hay aprecia en buena mente,
Cosa ostedes ta sinti
Y mucho beses na su bida
Desalejao
Na maga cosa grande y anciano
Que amo siempre ta mobe
Con el corrida del sangre
Y ta pone na su propio lugar
Con el corazon.

Jende mas nicisita man byaje

Para sinti con hondura.
Jende nicisita anda pa na cine
Para saca un storia del amor.