Kotaz Cultural Edition Volume 5 Number 3

Kotaz Cultural Edtion Volume 5 Number 3 1
Kotaz Cultural Edition Volume 5 Number 3

Kotaz is a quarterly arts magazine with a special emphasis on contemporary South African Literatures.
EDITOR: Mxolisi Nyezwa mnyezwa@ananzi.co.za
ASSISTANT EDITOR: Mangaliso Buzani
ASSISTANT EDITOR: Madoda Ndlakuse
VISUAL ARTS COORDINATE EDITOR: Apiwe Mahola
PUBLISHER: Imbizo Arts of South Africa (IASA)
All submissions of original work in any South African language are welcome.
Correspondence should be sent to:
The Editor/ Kotaz
P.O. Box 63
New Brighton
6200
Port Elizabeth
Tel/Fax: +27 41 462 5474
NB: English translations of copies submitted must be accompanied by a stamped self-addressed envelope.
Kotaz Volume 5 Number 3 gives a special note of thanks to
PEOH (The Port Elizabeth Opera House)
Kotaz Volume 5 Number 3 was made possible by the support of:
ECPACC (Eastern Cape Provincial Arts and Culture Council
VISUAL ART CONTRIBUTOR: Dolla Sapeta
VISUAL DESIGN & LAYOUT: Meang
DESIGNER: @imeang
Printing: Express Litho
ISSN: 1606-6146
Copyright is held by the: Individual contributors
Kotaz Cultural Edtion Volume 5 Number 3 3
C ONT E NT S
Kotaz Cultural Edtion
INTSHAYELELO
Im
bulam
bethe - page 1.
A
m
anzi am
pom
pozayo aphum
a em
azantsi em
atyeni - page 2.
A
m
azw
i am
afutshane ngobum
e besizw
e noncw
adi - pages 3-4.
IMIBONGO
Mzi Mahola - Pages. 5-7.
Masakhe Mdunyelwa - Pages. 10-11.
Mbulelo Nzo - Page 12.
Nompumezo Buzani - Page 13.
Mangaliso Buzani - Pages 17-18.
Mvakalisi Edi - Page 20.
Athenkosi Nyembani - Pages 26-29.
Madoda Ndlakuse - Page 31.
Lukhanyo Sifo - Page 32.
Victor Mguzulwa - Pages 34-36.
Pumelelo Antony Page 37.
Jessica Mbangeni - Pages 38-39.
Mxolisi Nyezwa Pages 41-42.
Mamtika Pakade - Page 42.
Mzuvukile Manxiwa - Pages 44-46.
Mbongisi Dyantyu - Page 47.
Mpumi Cilibe - Page 57.
AMABALI
UKUDUKA KWEMALI YAMATHUMBU - Fundile Majola - Pages 8-9.
UBUVUVU NAMAPUNGE - Pumelelo Antony - Pages 14- 16.
ZIBUYIL INTW EZINKULU KWELENGOLOVANE - Douglas Ntuli - Page 21.
UMASBHANKA KANKEBEZA -Mpumi Cilibe - Page 30.
UKUBALULEKA KOLWIMI - Luckeez Mfowethu - Page 40.
ULWIMI LUKAMAMGHOBHOZI- Mpumi Cilibe - Page 43.
ITSILI - Douglas Ntuli - Pages 58-59.
U
P
H
E
N
G
U
L
U
L
O
Fundiswa Mhlekedu - Page 19.
Athenkosi Nyembani - Page 33.
Thobela Fibi - Pages 48-49.
Peggy Calata - Page 49-50.
PACEC - Pages 50-54.
Monde Ngonyama - Pages 54-56
IMIZOBO
Dolla Sapeta contributed artworks and photos in this edition-Pages 22-25.
NGABABHALI
Amagqabantshintshi -Pages 59-60.
Volume 5 Number 3
1 Kotaz Cultural Edtion Volume 5 Number 3
I MB UL A MB E THE
Madoda Ndlakuse
Mna ke nto zakuthi ndichukunyiswa kukutyeba kolwimi lwesiXhosa naluthando lwemibongo, amabali
amafutshane, njalo njalo. Olu hlelo lwe Kotaz ngokukhethekileyo luqulethe imibongo nemfundiso
ngendlela engummangaliso. Apha sikuphakela imibongo enoxabiso phofu singayishiyanga leyo ithetha
ngezidla umzi. Into endikhuthazayo mna kukuba umbhali angozoyikiseli ngesiphiwo sakhe angatyhafi
ngokutyhafiswa oyike ngokoyikiswa. Kumbongo ngamnye olapha ndijonge:
Ukusetyenziswa kwamagama aqhelekileyo ngendlela enomtsalane;
Ukudimbaza amagama amatsha natsho umntu ngamnye azifumanele injongo yokubhalwa
kombongo nomyalezo owambethwe ngumbongo lowo;
Ngexa kukuhle ukuwufumana umyalezo emva kokwetyisa umbongo lowo, kodwa ungade
untsokothe umbongo kucace into yokuba sakubhula sisela sinkantsa iminyaka kanti eyona nto
ayitshoyo umbhali ayiveli.
Kulungile ke masityhalele phambilana! Ndinga ndingaqala ngaphi na ukuthetha madoda? Nje ngokuba
ndisuke ndasisaqhaga samazwi, iyilo lakwabani, yinto endiza kuyithetha nabani le? Makhe ndiqine
isibindi. Tyhini! Kakade ke okubalulekileyo kukuba ndibhuda into esuka entliziyweni yam nasembilinini
yam. Kaloku mlesi xa kuthethwa ngesiXhosa ndiyavakalelwa, iba ngathi kukho nto isukayo apha kum
ngaphakathi, ngoba kaloku bafondini ndingumXhosa xho, kunjalo nje ndingu lomXhosa wakhulela
kwindlu yomxhoxho ngaph eMpukane, eNgqamakhwe, apho kukho ilitye lakwaPhungela. Kolu hlelo
andixhobanga yeha!
Ndixakathe iziqhamo zoncwadi lwesiXhosa ulwimi lwemveli, ndikuphothulela umphothulo wezincoko
eziphilisayo nengqaka kwimibongo. Namhlanje zininzi iilwimi ezithethwayo ezinye zomelele, ezinye
ziyambimbilizwa zezinye. Andifuni ke ubona isiXhosa sam nawe sishokoxeka siphelelwa yinkcasa
nakubeni siteketeke kukutyeba. Andifuni kubona ulwimi lwesiXhosa lungcwatywa luhleli ngenxa
yezinto-yinto zala maxesha. Kolu hlelo uzakutya uhluthe luncuthu maZangwa ozakuliva apha, yaye
uzafumana iingcinga ezingamphosanga konke-konke umxholo. Nokuba useRhini, useGcuwa,
ukwaNdokwenza, ukwaTyuthu, useTsholomnqa, eNxarhuni, useZola, eMbekweni, eKhayelitsha,
useZibeleni, phi phi phi .. yiza uzokufumana le nto kuthiwa sisiXhosa.

Masikubulele Mkhuluwa Bhut Mxolisi Nyezwa ngesi sibane sikhanyisayo kwicala lenkcubeko, isihobe,
noncwadi. Ungadinwa kukudimbaza kuba isizwe sibhuqwa yindlala yokufundwa kwencwadi. Noogxa
bakho abanjengoo Ayanda Billie, Mzi Mahola, Mangaliso Buzani, Monde Ngonyama, Mpumi Cilibe
nabanye, sithi nangamso, ukwanda kwaliwa ngumthakathi. Kubo bonke ababhali abaye baphosa
esivivaneni! Umhle umsebenzi wenu ningadinwa.
Enkosi Kotaz Magazine ngokusondla ngesisidlo simnandi kangaka! Kudala silambile, imbalela iphantse
yasigqiba. Enkosi ngokusinika eli thuba lokuba siveze izakhono zethu kwangaxeshanye sisakha isizwe.
Kotaz Cultural Edition Volume 5 Number 3 2
AMANZI AMPOMPOZAYO APHUMA EMAZANTSI EMATYENI
Mangaliso Buzani
Ibe luvuyo nombulelo kum ekusondezweni nganeno kwesi siqendu seKotaz, nje ngomnye wabancedisi
kuhlaziyo lwalo mqulu. Ndakube nditheth ubuvuvu ukuba ndingathi isiXhosa asikhuli, okanye xa
ndinokunixelela ukuba abekho ababhali besiXhosa abagqwesayo. Naba bakhona, baphilile ngesingqi
nesimbo sokubhala esidlamkileyo. Bekani iindlebe niphulaphule iimbongi zakwaXhosa zicula iimihobe
nemibongo kamnandi. Ababhali bethu abachaseli kude kwimiba edla emazantsi ngaphakathi isizwe sethu
esimnyama, ngakumbi intsokolo engxamele ukuthibaza ingqondo zabantu bonke.
Kancinci ebunzimeni: ekuhlakuleni kwethu le ntsimi ichume yaf amacala iKotaz, ekukhangeleni kwethu siye
sakhonjiswa zizinyanya zethu kubabhali abamangalisayo ngosiba lwabo. Uchapha lweembono zabo
lunongwe ngezakhono ezingathethekiyo ekusebenziseni ulwimi ngendlela ekhethekileyo. Kwalapha siye
sayama emabalini amafutshane, kudliwano ndlebe, nakwiingxoxo ngokuzidla ngobuXhosa nangentetho
yesiXhosa. Uyokuphawula ke mlesi ukusetyenziswa kothando nje ngomba wokuzixolisa kwiimeko esiphila
phantsi kwazo, ukusukela kwiinkcuku zamakhaya ukuyothi jaju kwiinkcuku zesizwe siphela. Ubone
kwakhona ukuphulukana nobuntu kumzi osakuba neqhayiya ngabo. Ukusilela kwemizi yopapasho-zincwadi
nokunyotha kwayo ekunyuseni iintetho zemidaka kuhlupha ngokungathethekiyo.
Umgangatho weKotaz uyaxhuma mihla le kusisa. Le magazini yenkcubeko nababhali iya phambili! Nam
ndiyavuya ngokuzibandakanya, ndisiwa nani nje ngababhali abanxubileyo kobu bunzima, ndizidla ngeli
hlelo lichumileyo zizimvo zenu. Ndiyabulela mzi kaNtsundu.
AMAZWI AMAFUTSHANE NGOBUME BESIZWE NO-NCWADI
Mxolisi Nyezwa
Phofu sizwe sasekhaya nicinga okokuba yintoni le inyanzelisa umbhali aphakamise usiba abhale phantsi
incwadi, okanye abhale umbongo? Iyintoni intsingiselo yentsomi, umbongo, isihobe, ibali elifutshane nelide
ngakumbi kwelixesha limiyo? Ingaba okukubhala mhlawumbi nje yinkcitha xesha, umbhali sukube ebhala
phantsi nje ujamelene nentsunguzi yesithukuthezi nomvandedwa? Mhlawumbi isizathu asifihlakalanga
konke-konke YIMALI! Mhlawumbi ukubhala kukonwabisa. Wumbi uyakuthi ukubhala oku kukufundisa
isizwe. Le yimibuzo umbhali ngakumbi omtsha apha ekubhaleni athwaliswa yona nethi imqhekeze intloko
ngobunzulu bayo, angenwe lugevezelo Iwamadolo, de ikhokele komnye nomnye arhoxe apha ekubhaleni,
ajiwule itawule, akhangele ndlela yimbi yokuzakha. Kuba ukubhala iincwadi kaloku kuqala yindlela
yokuzakha wena buqu (personal growth), kwandule ilinge lokuzamela abanye, ulungisa isimilo soluntu
nesesizwe. Masilumke singakuyamanisi ngamandla ukubhala iincwadi nokuqweba imali, hleze sidane
ziipokotho ezingenantloni kukuvuza. Ukubhala kunento yokwenza nokuzilungisa emoyeni wakho
(spirituality). Kuxa nawuphina umntu enoxolo ngokwasemphefumlweni apho kuye kugqame kuye
ngaphakathi isibane sobuntu emoyeni wakhe. Ngokwamafutshane umntu usondela kuThixo. Ubhekela
kude lee kwiintshukumo zendlavini nobuqhophololo obumnyama besilo sobusuku. Ushiya uburhalarhume
ngasemva, anyathelele phambili ebuthixweni nasenyangwaneni yeZulu. Ababhali aba ziintambanani
zomhlaba. Amaphiko abo abhabhazelela kuhle ngakwiinkedama zonke zomhlaba.
Masingabanqandi abafundi nabantwana abasakhulayo ekuthandeni iincwadi nasekukhuliseni iziphiwo
zabo njengababhali abasebatsha. Izizwe ezimnyama zeAfrika zingqishe kanobom ukude kufikeke
kwelinqanaba lanamhlanje lempucuko. Akukho kwanto esinyanzelisayo sisisizwe ukuba sithi sisamkela
impucuko nobuxhaka-xhaka baseNtshona sibutshayelele kude ubuntu bethu nalawo kumasiko nezithethe
zethu asigcine asikhusela asoyisela kwimingeni emininzi iminyaka eliwaka eyadlulayo. Ndithetha ukuba
iintlanga zaseNtshona azigalelekanga eAfrika kwizizwe ezihlutshwa yindlala, okanye ezimpawo
zitenxileyo. Azifikanga ezizizwe sixakiwe, okanye sinxunguphele. Besiziintsapho ezifumileyo sinamakhaya
amileyo neenkosi ezithembakeleyo. Besinqula uThixo sithetha nezinyanya phantsi simazi uQamata ong-
umDali weento zonke. Besilihlonele ingcwaba. Besilihlonele siloyika iZulu, singafane sikhombe nje umnwe
phezulu esibhakabhakeni kungekho mfuneko sisoyika ukuphazamisana nomDali. (Thelekisa
izimanga zanamhlanje: usana olubomvu lugobe isandla, lusalatha phezulu ngomnwe omnye, lufing
iintshiyi, lisenyelisa umntu nomDali! Besinokuthini isizwe sethu ukungaphalali!) Besizazi thina iimfihlelo
zomDali nomhlaba, sisazi iintaba neziziba ezicwalileyo ziqulathe iimbali nolwazi. Ubona nje uMqhayi
waseNtabozuko evakalelwa xa ebhala ngentaba kaNdoda esithi:
Kwakuqutyudwa kuyo ngoobawo neenkosi,
Kwathenjelwa kuyo ngoxolo nomkhosi,
Kusalelwe khona zezo ngangalala,
NoSandil ukhona yena ncakasana.
Ndiswel imilomo, ntaba yakowethu,
Situlo seenyawo zoThix akowethu,
Buso bukhangele ngasentshonalanga,
Bubethwa yimitha yokumka kwelanga.
Ngendicula ngawe phantsi kolu viko,
Ngendihamba kuwe kule nkcithakalo,
Ndijonge ngakuwe xa ndiwa ngedolo,
Ndiqale ngakuwe xa ndiya kuThixo.
Abaphambukeli eAfrika bafikele ebantwini abaphilileyo, kubantu abanobuntu namasiko, kumadoda
nabafazi azidlayo nanesidima. Sesosidima nokokuzidla okusilahlileyo namhlanje. Ukudlakathiswa
kwabantwana. Ukuphathwa ngqwabalala kwamantombazana namaxhewukazi. Obu bububhedengu
kumaAfrika. Kuquka ukwandiselana phakathi kwendoda nendoda. UThixo akabhidekanga ngqondo edala
nje indoda ze adale umfazi wayo. Mfundi, xa ndisithi umfazi ndithetha umfazi, hayi indoda ezenza umfazi!
Intombi emabele made, ezitho zichul ukunyathel okongcwalazi notyani lungcolisa intsimi ngehlahla.
Ayilosiko lethu ukudlwengula abantwana. Ayisosithethe sethu ukubulala umntu naphantsi kwayiphina
imeko, nakwesiphi isizathu. Le mikhuba siyibonayo ibingekho ngaphambili phaya. Ngamanyala aze
nempucuko ekekeleyo yaseNtshona. Sizwe sakuthi nithi makwenziwe ntoni na? Kuyiwe kuwaphina
amagqirha sekonakele nje? Ndiyabuza.
Kulomjikelo weKotaz sithe masicele umbhali nembongi umnumzana uMadoda Ndlakuse ancedise
ukucukula nokuphengulula esisiqendu. Siyabulela ke kuye umnumzana ngokungazenzisiyo sibulela
nangentsebenziswano entle ethe sayifumana kuye ubaw Ndlakuse nebonakala mhlophe kumgangatho
walomqulu. Kangangokukhuthala
nokuzimisela emsebenzini awuphetheyo imbongi lena ithe yasenzela nodliwano-ndlebe nabasebenzi
kwezenkcubeko beziko iPort Elizabeth Opera House, kuquka umphathi weliziko uMnumzana uMonde
Ngonyama, abadlali beqonga bePACEC (Performing Arts Company of the Eastern Cape) , umdidiyeli
nomqambi weengoma uThobela Fibi, nababhali ababini uAthenkosi Nyembani, nenzwakazi emanz
andonga uFundiswa Mhlekude, yena oxelenga kumzi omkhulu wezosasazo nonxibelelwano uMhlobo
Wenene. Oludliwano-ndlebe yinto ebise inqabile kakhulu apha kwiKotaz ngenxa yexesha elingekhoyo
lokuluququzelela nababhali. Ukutsho ke kwakwesisiqendu sinethamsanqa lokufumana izimvo
ezahlukeneyo neziphangaleleyo zababhali ezimayela nolwimi, ukubaluleka kokubhala nokufunda
ngakumbi ulwimi lwasekhaya, namanye amabakala abhekisele kuncwadi lwesiXhosa jikelele. Ndiyafuna
ukubulela kwangelithuba umzi wenkcubeko nemidlalo yeqonga iPort Elizabeth Opera House,
ngokusebenzisana nababhali kuMnyhadala weeNcwadi iMandela Bay Book Fair, ebesifudula
ukuwusindleka apha eBhayi ngoMatshi walonyaka. Eliziko phantsi kwengqonyela uBawo uMonde Ngo-
nyama libonisa umdla omkhulu wokusebenza ukuphucula umgangatho wezenkcubeko apha ephondweni.
Kuloo njongo yabo yokutyanda apho kuchizeke khona umsipha nokuba ligxalaba elibanzi kumaphulo
akhasayo, iPE Opera House ibuye yafaka nesandla kwesisiqendu seKotaz, yathenga amaphepha
aliqela entengiso (advertisement) ukuze umthwalo wokushicilela le ncwadana ungaweli kumshicileli yedwa
kuphela. Sithi enkosi kwiPort Elizabeth Opera House. Nam ndiyaphinda ndisitsho ndisithi ukwanda
kwaliwa ngumthakathi!
Ukugqiba ndiyafuna ukukhumbuza abafundi ukuba lona umjikelo weKotaz wohlukile kwemininzi
engaphambili kuba siye sagxininisa kuphela ekushiceleleni umsebenzi wesiXhosa. Ayithethi ke loo nto
ukuba sochankcatha ngalo mgca wempuku naphakade. Oku ibikukukrobisa nzulu isizwe kubuncwane
boncwadi lwesiXhosa nkalo zonke, nangokupheleleyo, sinika ithuba nababhali abafana nam lo
abangazange bashicilele kwisiXhosa ngaphambili ithuba lokwenza njalo. Sifuna nokukhuthaza kwakhona
nabanye ababhali abazivayo bathumelise imisebenzi yabo kwiKotaz ngenjongo yokushicilela loo malinge
abo. Thina silapha ukukhuthaza nokuxhasa ababhali besizwe sethu jikelele. Amade ngawetyala mawethu.
Mandigoduke kuhlwile.
IINKUMBULO
Mzi Mahola
Iminyaka yobutsha bam
Yeyona yayimnandi ebomini,
Nokuba bangathini.
Ngemihla yobutsha bam,
Ndiyinkosana kulo mhlaba
Ndandindolosa ngezobukhosi kuloo mahlathi
Sibambene ngezandla nenkosazana yam,
Indim, inkosana ezithambisileyo
Nenkosazana yesizwe
Sichitha iimini zehlobo
Sambethe ingubo eshushu yelanga,
Isithi kuphela abachitha iimini zehlobo phezu
Kwamathanga aluhlaza nantofontofo
Omlambo iTyhume.
Ewe, ndandicela umngeni
Kwezona nzulu zawo
Ndizijula ndize okwendubula.
Ndizizingele iinyamakazi,
Iziqhamo zasendle nobusi;
Kodwa ndoyiswa kukuzifunela umqolomba
Kufuphi neengxangxasi zawo
Apho bendiyakuphumla khona
Ngentsuku zam zokugqibela
Ukuze amathambo am ahombise
Ezontaba zeBhukazana.
Kambe lawo yayingamathuba emboleko.
Iminyaka ihluza iinkumbulo zethu
Iqwayite ezona zimnandi
Izigcinele imihla yobudala
Xa lo mzimba ungasenakho
Ukuyondla ingqondo;
Xa iinkumbulo zifana nobukhazikhazi
Besiphelo sendlela
IS
IM
B
O
N
O
N
O
Mzi Mahola
Abadala esixekweni bangqukuleka
Xa ulutsha lwabo
Lwahamba ngandlela yimbi
Njengoko benzayo nabo
Beselula.
Babiza izilumko
Ukuze zikhomb indlela;
Koko ulutsha lwaphendula ngezithuko
Njengoko benza njalo nabazali
Besakhula.
Abazali bacela isisombululo kuSomandla,
Laphendul ilizwi,
Niyakuvuna oko nikuhlwayelayo.
Boyisakele
Bawarhoxisa amalwim abo ahlazekileyo.
Akuzanga kubekho mpendulo.
Yom imiqala.
Ngomso ulutsha lwanamhlanje
Luzakuba ngabazali besixeko
Nabo bazakukhwina
Xa abantwana babo
Bekhangela kweliny icala.
Ngokunjalo bazakufun iingcali
Zizokukhomb indlela
Njengoko benzayo nabazali babo.
Bazakuzirhoxis iilwimi ezihlazekileyo
Xa inzala yabo
Iphendula ngobungaphezul ubugwenxa.
Nabo bazakucela amaZul angenelele.
Kwakhona ilizwi liyakubakhumbuza
Ngenqobo yokuhlwayela nokuvuna.
Akuyikubakho mpendulo.
Isizukulwana esilandelayo sakuba silindile
Ukuze sidlulele phambili
Koko sikufundayo namhlanje.
Naso as ukuba nampendulo.
UMO NOKULWUL
Mzi Mahola
Ndahlala phezu kwedwala ndondela
Kutyhilwa indalo ngenyoba
Abelusi bavela macal omabini
Beqhub imihlambi yabo
Beyisa ediphini.
Ukukhonya okumyoli kweenkunzi
Kuyondelelene nokunxakama
Kwalomihlamb ihlangabezanayo
Kwavakala nasentilini
Kwazalisa nesibhakabhaka
Loo madod anxungupheleyo
Enza amalinge omzuzwana
Okwahlukanis ezo nkunzi zingalawulekiyo
Kungekonakali.
(Akutshiwo n ukuba azigqubi sibayeni sinye?)
Kwasebenza ubulumko
Xa ezo nkunzi zathi zahlangabezana
Zikhuph umsi ngamathatha
Abelusi baphel emehlweni.
Kwakungekho nto inokuzithibaza xa kunje
Kuba umsindo nokunyoluka kwakuzilawula
Ekwakunyenzelekil ukuba
Zidibane kucac ezakuphatha.
Zazishiy iimazi
Zifutha zigquba
Ziqondele phantsi
Izisu zivuthelana zitsama
Ngomgqumo ngamnye.
Amathole ayegabadula luloyiko
Atsho andikhumbuz intetho ethi,
Xa kusilwa iinkunzi
Amathol azimela ngoonina.
Emboniselweni yam
Ndawabukela la marhamncwa
Ehlangabezana efinc umda owahlulayo.
Zadibana
Atsho angcola amacongwana
Kukutyatyaza kwephanyazo.
Zazijijisana zibhovulana
Zisunduzana ukuya ngapha nangapha
Ngapha nangapha,
Ziyithe qhiwu imisil okweembasa
Kwasiphuk imithana nezihlahla
Kwaqhawuka neengcingo,
Zityoboza yonk intw esendleleni
Ingunomji
Kungekho ifun ukugob uphondo
Ndatsho ndakhumbul ntetho ethi,
Xa kusilwa iinkunzi ezimbini
Kuba yingqushu kulo ndawo.
Abaninizo ababenkwantya
Bazibukeli iinkunzi zabo zimanxebana
Bengenakwenza nto.
Ndamane ndizibuza ukuba
Lwakuphela nini olu bangiswano
Ukuze kuqhutyw umsebenzi?
UKUDUKA KWEMALI YAMATHUMBU
Fundile Majola
Kuthi ngaminazana ithile sifika ekhayeni sizibuyela
esikolweni nomntakwethu, siphakelwe ke umphokoqo oshoqololo nokhatshwa ngamasi anocwambu
olungqumbululu. Sithi ke sisawungena umphokoqo lo, sicengwe ngumzali ukuba sigxabha-gxabhise
ukutya oku ukuze sileqise kwaMakoti, apho siyokuthenga khona inyama yangaphakathi. Inyama
yakwaMakoti ke ikhawuleza iphele, iyaleqwa.
Inyama le ke mfundi wam, njengoko sisazi iquka amathumbu, amaswili, imithalo, oodakada, oondonci,
imihlehlo, neegedesi zenkomo nezegusha.Yinto nantsi ke le nyama ekuhlaleni ngoba kaloku iselolona
hlobo lwenyama lufikelelekayo ngokwasempokothweni kubantu bakuthi. Ibamnandi nangakumbi ke
inyama yangaphakathi xa iphekwe nedombolo. Kodwa ke njengoko sisazi sonke, kufuneka umntu athi
qhwi-qhwi ukuyinambitha ngoba hleze imphoxe, linqum esandleni esalibuka inqatha.
Ngenxa yenkxalabo yokuba hleze singawafumani la mathumbu kuba sicothisisa ukutya, nto leyo
isenokuthetha ukuba singayakulala ngokuhlwa singayityanga inyama; uBra Suz uye akhuphe izwi lokuba
siwushiye umphokoqo sibaleke. Awubaleki lo mphokoqo makwedini, niza kufika uselapha xa nibuya.
Balekani, niyayazi akhawuleza aphele amathumbu!, ungxolisa atsho, esondela ngesasitulo sakhe
sihambayo. Okunene ke siyaphuma sisingise eLalini eBomvu.
Khumbula ke mfundi wam ukuba inyama yangaphakathi le iyathengiswa nakwaMawila, futhi ke ibiza
ngezantsi kunakwaMakoti, ngamashumi amabini onke eesenti. UMakoti ubiza amashumi asixhenxe onke
eesenti, ngelixa yena uMawila ebiza amashumi amahlanu kuphela. Kodwa ke uluntu luvumelana
ngenkolelo ethi iyavinjwa inyama kwaMawila yaye ke ingafiki nangencasa kweyakwaMakoti.
Sithi siphathiswe iimali ezimbini ke, omnye anikwe eyasekhaya, ngelixa omnye enikwa ekaNanini,
ongumama ohlala kwityotyombe elisemva kwiyadi yasekhaya nesinqanda-mathe sakhe uBra Cat,
nonyana uPilityi. Kuthi ke kuba simke singaxolanga mpela ngulaa mphokoqo, futhi ke nelaagqubusha
uSathana lingakuthandi ukulala lingatyanga, kuvele icebo elimdaka.
Le indim ifikelwa yintlondi yokulukuhla umninawa ukuba kwenziwe ukungcola: icebo lokuba la mathumbu
athengwe kwaMawila ngeesenti ezingamashumi amahlanu, ze kutyiwe amashumi amabini kuzo zombini
ezimali siziphathisiweyo. Ivume ke nentwana, imthembile nje umkhuluwa.
Sithi ke ngelixa sisalinde ukufika kwenyama njengomntu wonke kwaMawila, sithenge ikota enebhotolo
kwaM&M. Siyaqhekezelana sitye, yehla kamnandi. Sithi sakuphela isonka sithane krwaqu nomntakwe,
sakugqiba sincumelane, kube ke oko kukuvumelana ukuba iyadingeka neyesibini. Nayo ke siyithi bimbilili
ngoko nangoko, sifumane iilekese iiGolden Nuts ngetshintshi, simungunye.
Iyafika inyama emva kweeyure ezimbini, kugilwa-gilwane ngabahlali, ibenguwashiywa, kungekho ufuna
ukuphoswa. Uyahamba umgca, kuthengiswa, siye sisondela nathi. Kodwa ke kuthi ngelishwa lomhluzi
wamanqina, xa kanye kuza kuthengiselwa usisi omi phambi kwam, kuphume umpoposho othi inyama
iphelile.
Haha! waqhawuka unobathana! Siqala sijamelane ke ngoku nomfana, simathile, zehle iinyembezi kuye
kuba torhwana engumntu oloyikayo uswazi, futhi ke ewuqonda nomsindo osilindileyo ekhaya.
Endleleni egodukayo sithi xa sidlula kulandlu ithengisa iimbotyi neetapile eGunguluza, ibekwa ndim oza
necebo lokuba maze sithi bekugcwele kakhulu kwaMakoti, asawafumana ke ngoko amathumbu, kwathi ke
futhi kuba besisiza sibaleka, zawa zalahleka ngaxesha-nye ezaa thubhobho, zatshona kulamngxunya wa-
manzi ungaseZimbotyini. Xa kubuzwa ukuba sihleli phi ke ngoku, ndithi zesithi besisoyika ukubuya kuba
sinexhala lokubethwa.
Eli cebo lokuduka kweethubhobho siye ngenxa yokuba singamaKhomazi abantu abathi bakungena
ehlathini suke bee pheselele, baduke kuba ilikhaya kubo elo silibone linokusikhupha engxingweni
yokuqhekezwa.
Sithi ke sisanyoshoza kulooGunguluza, amavalo engongoza, sele kuhlwile futhi, simbone uBra Suz
eqhutywa nguBhut Yhoyhoma, kucacile futhi ukuba kukhangelwa thina. Uthi uBhut Yhoyhoma
akusibhaqa akhwaze ngoko nangoko, Hey, Bra Suz, nazi mos ezilaytie! Nivela phi makwedini, kunini
nilindiwe? Nithi kuphekwa nini?
Sithi sisazama ukushwantshwatha impendulo angenelele uBra Suz, Hey kwedini Skhumba, uvela phi
nalentwana, kutheni ungcolile nje? Masigodukeni! Ndiyiqonda kwangoko ke eyokuba
alithengwanga iqhinga yaye kuza kudanis oonopopi sakufika. Ndiye ndizitsholo ngaphakathi ukuba
impendulo yalancwadi bendiyibhala ibuyile, kuza kutyityilikwa ngoku. Kuyashwatyulwa endleleni ke,
sithenjiswa nangongonjwa. Futhi siyazi akaxhomi uBra Suz, uzakusibetha ke qha.
Sithi singena nje endlwini kube sekukhala impama emntwini, inguqhu-saa, brrr-bhilikidi-bhilikidi gqwa,
natya phantsi le indim. Athi engekabuzwa nanto umninawa, ndive ngaye edanduluka, ebayimpempe
umtshana ngoku,ethetha engayeki, endimpimpa,Hayi uxolo Bhut Xoza, laamali ayilahlekanga!
USkhumba uthe masiyitye sithi ilahleke ngaseZimbotyini. Sithenge iikota ezimhlophe ezimbini
ezineslaypaloni nebhotolo, sathenga neelekese ngetshintshi.
Yho! Kuqalisa ukuba kubi ke ngoku kum, yintoni le imbi kangaka ndiyenziwa yilentwana ngoku,
ndiyazibuza. Ndithi ndisathi ndiqalisa ukukhanyela, ndizama nokuma ngomlenz omnye ndibonisa
ukunyaniseka kwam, sibe selesigaleleka isitulo sikaBra Suz, ndiphutha-phuthwe ngapha nangapha,
encedisa noBhut Yhoyhoma, Yiz apha kwedini, beningatyanga aph endlini!?
Yho, yho, uxolo Bhut Laysuza, Bhut Laysuza uxolo ..
Kuthi kuse nguloo mbhodamo, ndibone ngelibali seliphela ncincilili!
NKOSI SIKELELA IAFRIKA
Masakhe Mdunyelwa
Yingoma yomphefumlo nendzondelelo yobomi
Yingoma yomthandazo neentsizi zeAfrika
Yingoma yemidlalo nendebe yehlabathi
Yingoma kaPoqo neGuerrilla zeAfrika
Yingoma yabasebenzi neIdamasa yenkululeko
Yingoma yeenkwenkwezi
Ngomandini yemiphanga nendzondzobila yentliziyo
Yingoma konyulwa uMongameli namhla yangqengqa ingangalala
Yingoma yabafundi beAfrika neenkedama zikaGawulayo
Yingoma yamakhamandela
Ngoma ye-tear-gas neembhumbhulu
Yingoma ye-A.K. 47
Ngoma ye-Scorpion ne-Uzi
Yingoma yeLimpopo neZambezi
Yingoma empompoza iinkumbulo mhla-mnene
Yingoma empompoza egade indlu yamanyange
Yingoma yembandezelo namhla yazalwa inkululeko yeAfrika
Yingoma yonxunguphalo namhla yavela idemokrasi yoMzantsi Afrika.

NGOOGUNYAZILE THOB IGUNYA CONTRALESA BAYEDE! NDLU YENKOSI SIYAKUTHOBELA
Masakhe Mdunyelwa
Bhotani nonke ziNkosindini zamasiko nezikhahlelo zohlanga
Camagwini ziNkosindini zegazi phakathi kwenduna nembongi zaKomkhulu
Contralesa ngoosithoba-simbathe iimithetho yeeNkosi neeKumkani zeAfrika
Ngoosithoba-simbathe iimithetho yeNkosi kwaNtsonga-Nyawana neNtaba Kandoda
Ngoosithoba-simbathe imithetho yeNkosi kwanokuthonga ngazo
Ngoosithoba-simbathe amasiko omthonyama nezintsokotho zaKomkhulu
Ngoosithoba-simbathe umyalezo kaMhlekazi uNtsikane nentlekele ka-Jan Van Riebeek
Ngoosithoba-simbathe intembeko kaMhlekazi uNkosi uMaqoma nentlekele kaNongqawuse

Ngoosithoba-simbathe umrhabulo ka Dr. J.L. Dube
Ngoosithoba-simbathe ingqiqo kaMakana eziNtakumbeni eRhini
Ngoosithoba-simbathe ingqiqo kaPoqo nobuzwe be-Azania
Ngoosithoba-simbathe imfesane kaNkosi Chief Albert Luthuli
Zola nje ngeeNkosi zimbathe inimba nentsizi zeAfrika
Ntlanga zehlabathi namhla ziyanithobela
Ntlanga zezizwe siko lendalo ziyalongamela
Ntlanga zeAfrika namhla ziyanibhotisa
Bhotani abantwana begazi nithi AA! Duma-ngentobeko ziNkosindini zomthonyama

Ngaxeshanye zee thozalala yanga ziwongwa namhla
Wambu yingwe emabala-bala isilo seNkosi zeAfrika
KwiNkosi siwa ngamadolo sivuke ngezikhahlelo
Lisiko lidala linenkqayi ndiyanixelela ndiyanikhumbuza
Sikhahlela nditsho noNyawo-ntle nditsho nabaqaqileyo
Sikhahlela amaQhawe nezimango zeAfrika
Sikhahlela iPalamente ye-Azania nditsho kuni zi-Guerrillas zeAfrika
Wofika siyikhahlela njalo ngangalala yohlanga
Yobe imile ngesidima nesithozelo izolile
Ithokombise intloko iNkosi yesizwe
Siyikhahlela side siyiphulule nentamo yayo
Kaloku nendlovu iyaliva ilizwi lobuhlobo
IiNkosi mazithambe izicaka zivumile
IiNkosi mazithambe ngembizo zeAfrika zizolile
IiNkosi mazithambe ngamabandla akowazo
Thambani Mafela-ndawonye iingelosi zeAfrika ziningqongile
Thambani Mafela-Nkosi nezinyanya zeNkululeko ziningqongile
Ndima yeeNkosi kukungxengxeza kwaboMgquba nabangasekhoyo
Ndima yeNkosazana kukuyolisa amahlwempu nemilwelwe yeAfrika
Ndima yeKumkani kukuxabisa iingxwelerha zeNkululeko
Nkululeko kumathambo eNkosi negazi lamaAfrika
Nkululeko kwingqumbo nezishwabulo zeNkosi zelilizwe

Nkululeko kwingqumbo yemiphefumlo eyawela kumahlathi

Nkululeko kwingqumbo yabaxhonywa kwiAfrika yamanyange

Zobe zityibela ngosiba iimfundikazi zomthonyama
Imbongi ngumkhululi wabakhonxwa baKomkhulu
Zobe zidudumisa iiMbongi zeAfrika
KULUTSHA LWETHU
Mbulelo Nzo
Vum uqeqeshw uqeqesheke, uqhuqheke
Vum ukhulisw ukhule , ukhululeke
Vum ufundisw ufund uchubeke
Vum ukhuthazw kuvuthuluk ubuvila .
Oqeqeshekileyo unesidima
Okhululekileyo ubolekw indlebe
Ofundileyo usiw iso, abukwe
Okhutheleyo unekamva nempumelelo
Qhuqhek ukuz ingqond iphangalale
Khul ukuz uluntu lufikelele
Fund ube lulutho kuwonke-wonke
Khuthal ukuz ungqinwe zizizwe zonke.
Mntu mni lo ungafund efundiswa?
Mntu mni lo ungafund ukuzimela?
Mntu mni lo udlavuza esoyiswa kukucwangcisa?
Mntu mni lo ungafundi buchule bakwenza?
Ulihlazo kwisizwe nabantu bakowabo
Unzonzothekis inkqubela ngokudangala
Udodobalis isizw engenampumelelo
Unezothe kub iziqhamo zakhe ziyalabalaba
Obakhe ubomi bobochuku nomona
Obakhe ubomi bobentlebendwane nolunya
Obakhe ubomi kukwenyelis abanempumelelo
Okwakhe kukuhlasel abaqamele ngenyaniso
Vila ndini lingev amazw enkuthazo!
Vil elithe bhakaxa davu lingashixizi kushukunywa!
Vila ndini lingothuki naxa lixambul emgxobhozweni!
Vil elingaziboni naxa lixhents enkunkumeni!
Mtyesheleni kub akant esizweni
Myeken uvila-votyo , idangal elingeva nkuthazo
Mtshikilel owonqena d abe ngumpha wezala
Shenx uxhay ixixilili lexaxavithi lexelegu.
UBUDE BENDLELA
Nompumezo Buzani
Ubude bendlela baziwa ngumhambi
Ndinguye umhambi ovusa uthuli
Khe ndabona ngaso linye mhla lagqutha
Qaba-qab imvula sadamba isagqwithi
Phaxa-phaxa amendu alawulwa ludaka
Zandingqonga iingqiba zamafu
Ziqulathe iinkumbulo zobutsha
Lwandoyama ukhwekhwe lwabatshakazi
Nolicondobe ndichul ukunyathela
Khe ndatyumtyeka ndinyunjazwa ziingcinga.
Ingqondo ngundoqo icamgca ngengqiqo
Amehlo agcoloda kukubon iinkwenkwezi
Imitha yelanga iza nonxunguphalo
Igqala emehlweni akrobise entliziyweni
Amehlo ngontamnani emfihlo zomphefumlo
Ndinguye umhambi ove ubunzima
Khe ndasitsho isijwili seenkedama
Khe ndalicula elandicamisayo labahlolokazi
Yaqhawuka inimba ndalil ezimathontsi
Uthuli lwamkela inyama yenyama zam
Igazi lam lajiya kumathumbu omhlaba
Igama endalithiya ndichwayitile ndingunozala
Lacinywa emehlweni abantu kwincwadi zomhlaba
Kambe ke ndiyinj ezikhotha amanxeba
Oluhambo lude kwindlel emajiko-jiko.
UBUVUVU NAMAMPUNGE
Pumelelo Antony
Kwakukusasa kakhulu ngentsasa yango Mgqibelo mhla ndikhwela ndisiya eDikeni eDyunivesiti,
eFort Hare. Ndandisiya kubona lowo uyolisa intliziyo yam, uYoliswa endandimthanda ndingaziva
ngaye, efunda apho eDyunivesiti, eFort Hare. Indlela endandimkhumbula ngayo
yayiyengathethekiyo, ndibona ukuba ukulindela ukuba abuye kwakhona ngeholide zobusika kuya
kundilibazisa. Ndandimtsalele umnxeba kwangezolo ndimazisa ukuba iyakuthi iqina imini ngosuku
Iwaloo Mgqibelo ndibe sele ndilapho eDikeni.
Ndavuka ngonyezi ngaloo Mgqibelo kuba ndifuna ukuphuma nenqwelo yokuqala esingisa kuye
kwaSomgxada. Ngethamsanqa ndafumana kwezi nqwelo zincinane zikhwelisa kuphela abantu
abahlanu. Nakhona ndafika sele kukho kwesisitulo singemva osisi abathathu. Ndafika ndazifaka
apha kwesisitulo sisecaleni komqhubi, sesibane ke ngoku, silinde umntu omnye kuphela ukuze
sinduluke. Sisalinde njalo zatsho iindaba zentsimbi yesixhenxe kuMhlobo Wenene, samamela kuba
sonke sasisazolele lowo uyakuthi afike, singene endleleni. Into eyatsala umdla wethu kwezoondaba
zindaba zokuxhwilwa kosana olusandul ukuzalwa kwisibhedlela sabucala, iCuyler Hospital apha
eTinarha. Kwakucelwa nabani na onolwazi makancede azise amapolisa. Zatsho zachazwa
iinombolo emazitsalelwe kumntu othe kanti unolwazi ngokubiwa koloo sana Iwalusandul ukuzalwa.
Kwaphela ngaloo mzuzu ukuthi cwaka kuloo nqwelo, sancokola ngesisihelegu, abanye beqinisekile
kuyakusetyenziswa amalungu oloo sana kwizinto zobugqwirha. Bangqinelana bonke apho kuloo
Mazda sasilinde kuyo. Ndakhe ndazibamba andangenelela kuba ndandinge mntu ukholelwayo
kwizinto zobugqwirha nokuthakatha. Ndandisoloko ndisithi ezo zinto zibubuvuvu namampunge
obuphenjelelwa ngabantu abathe mome ziinkolo ezingasi ndawo. Ndithe apho ndingenelele khona
encokweni ndangena sele ndikhabalaza, ndigqwashula, ndiphikisa loo nto babeyithetha, ndisithi
ayikho into ebubugqwirha, nto nje ngabantu abathanda ukusasaza ubuvuvu namampunge
aphenjelelwa zinkolo ezingasi ndawo. Ukuphuhlisa uluvo Iwam ndide ndibabuze ukuba xa
uthakathiwe uyakwazi enkundleni ukuphuhlisa ubungqina bokuthakathwa kwakho? Andiwa ngentsini
loo magqiyazana aye ehleli emva kwam esithi ndinenkani nje ndakuzibonela ngenye imini, kwaye
ndakuze ndibacinge ndineenkani nje. Ndikhuphe amehlo xa eli nenekazi lihleli kanye apha emva
kwam lisithi lona lalihlala nomyeni walo etyotyombeni kulo myeni bengekatshati. Umyeni wakhe lowo
waye ephuma ngentsimbi yeshumi ngokuhlwa emsebenzini. Kwacaca ukuba ufike ngethuba ekhaya
ngobunye ubusuku kunangesiqhelo. Wayeqheliswe ngunina ukufika ukutya kwakhe kwangokuhlwa
kufudumele, athi efika yena kube kusafudumele. Ngale mini wothuka woma akubona unina ngefes-
tile ehamba njengoko wazalwa, echophe phezu koko kutya waye ekufudumezela unyana wakhe.
Liqhube eli nenekazi lisithi singalibali ke lento yenzeka ngelixesha selebazisile ukuba ufuna
ukulitshata eli nenekazi. Akazange abe sangena apho endlwini aye kulanda ukutya kwakhe njenge
siqhelo, balala bengasifumananga isidlo sangokuhlwa ngobo busuku, umlomo ungahlangani kuloo
mfana yinto ayibonileyo isenziwa ngunina. Ngosuku olulandelayo akazange abe saphangela,
bahamba befuna indawo yokuhlala oku kokuba baphume baphele kulomyeni, engakhange atsho
nelimdaka kunina nakuyise. Akasawubeki kwanomcondo wakhe kowabo. Ebalisa nje nabazali
bamangalisiwe benomnqa yiloo nto yokumka konyana wabo engatshongo nelimdaka.
Ndatyhiliza nje ndisithi hayi suka akukho nto ikukuthakatha nobugqwirha, nto nje abantu bayathanda
ukwenyelisa abanye abantu bephethwe ngumona. Naloo mama mhlawumbi wayefuna nje ukuba
unyana wakhe eve ngaye kunawe. Ladanduluka elo nenekazi libufudumala labuza lisithi:
Asikokuthakatha ke oko? Uthi kutheni efuna ukuba makeve ngaye nje? Ade achophe avuzise
ukubila komphakatho wakhe phezu kokutya konyana wakhe? Yintoni ke le, asibobugqwirha?
Yalandelelana loo mibuzo ndatsho ndema nematha, andakwazi ukuyiphendula loo mibuzo.
Bendichazela ukuba nditsho nje ndingekahlelwa yinto eyakundenza ndibazi kwaye ndibuhloniphe
ubugqwirha obu. Kusenjalo ndavuya xa kungena umama owaye ephethe usana, neMazda
yaphelela ukuba sinduluke. Kwandisindisa ukufika kwaloo mama, ndatsho ndasinda kwezoo ntetho
zezoo mazi, kucaca ukuba zingandidla ngamazinyo, ndiziphathe emanyeni. Akugqiba ukufumana
iimfanelo zakhe umqhubi sangena endleleni kwakhona kwee cwaka, kwee zole kwathi tu, kungekho
namnye uncokolayo kwakhona. Isimanga ke ngoku sisizungu soloo sana Iwaluthandelwe nguloo
mama, oko engenile enqweleni usana lujweda Iwenza into enye lungathuthuzeleki.
Silinikele umva iTinarha sadlula eMotherwell, eBhayi apho umqhubi athe wazalisa khona iMazda
yakhe ngamanzi namafutha. Sidlule eColechester senjenjeya sibetha kuhle ukuleqa iRhini, kodwa
isimanga nkqi usana ukuyeka ukulila, ndithi mna Iwalungabiwa nabubuthongo obu bembala.
Isenzele isithukuthezi ke lento yesi sikhalo, kodwa akwabikho mntu unaso isibindi sokungenelela
ukuncedisa ukuthulisa usana olo. Chu umqhubi neMazda yakhe ingathi kuye ayimkhathazi tu leyo
yokulila kolo sana, yayibetha kuhle inqwelo sesijonge ukufika kuloo majiko-jiko eXerha. Sothuka
sabheka sonke xa lo mama edanduluka esithi kumqhubi makamise azo kwehla. Nomqhubi wenza
njengoko ebe eyalelwa, wehla lo mama ecaleni kwendlela kwampenge-mpenge, emahlathini
anamathafa kungabonakali nazindlu. Wayitsala umfo wabantu inqwelo yakowabo ukuya kuloo
majikojiko eXerha. Sithe xa kanye siwagqiba loo majiko-jiko eXerha, kwadanduluka laa sisi
besiphikisana naye ngobugqwirha esithi: He! Bantu! Nithi niyayibona lento yalo mama wehla
nosana emathafeni kwampenge-mpenge? Andibonanga nazindlu kulaa ndawo la mama ehle kuyo.
He! Wethu! Uthini ngosana olu lungathuliyo luthuthuzelwa? Kona kodwa ukubiwa bubuthongo, tu!
Akanayo nebhotile yolaa sana la mama, ebengalufaki nentlonze le yembala! Ndathetha ngathi
ndibotshwe emnweni seso simanga sasisothusa. Bhuti asingomntwana wakhe Iowa la mama,
mhlawumbi umbile la mntwana. Nceda Bhuti masijike sisindise la mphefumlo mhlawumbi
lusengozini yokubulawa olwasizana. Nceda torhwana Bhuti! Watsho omnye waba sisi ecenga
umqhubi. Zange aphozise maseko wayijika umfo wabantu iMazda yakowabo sileqisa into nathi
esingaqinisekanga ngayo. Umqhubi uthe ujikiswa kuphela seso sikhalo sasisa nkenteza
ezindlebeni zakhe esoyika isono sokuyekelela usana engozini abe ebe nako ukulusindisa.
Niyakhumbhula phofu ukuba kwiindaba ebesizivile kuMhlobo Wenene ukuba kukho usana
elibelixhwilwe esibhedlele eTinarha? Sazi njani ke phofu ukuba asilulo olu usana luphethwe ngulo
mama? Ndatsho ndiwakhuphe entloko, ndibambe amazinyo lelo sikizi ndandilicingela.
Nceda wethu Bhuti mntwana wabantu, yiba ngathi uyayinyathela kuba ola sizana losana alunabani
wokuluthethelela kwezaa zikhohlakali zingcolileyo zicinga kuphela ngondlela lula qha wokwenza
imali. Watsho la sisi wokuqala ebe sibeke sonke ezingqondweni.
Wayibetha yancinci lo mfo lenqwelo naye ephethwe kukufuna ukunceda kule meko sele elibele
kancinci ngoshishino olo lwakhe lokuqhuba. Waye exakekile ke omnye waba sisi, etsalela
umnxeba abakwasidlodlo, esikhathaza esifuna ezoo nombolo bezichazwe kunomathotholo ngaloo
ntsasa, ngelishwa kwakungekho nomnye owazigcinayo ezoo nombolo, wabhenela kuleyo yaziwa
nguwonke-wonke yamapolisa kuMzantsi jikelele ethi 0800 10111. Ibe ngaloo mahintsi-hintsi, kodwa
ngethamsanqa wabe uyagqobhozela, wakwazi ukuthetha nabo abo bakwantsasana.
Sakufika kuloo ndawo sikhe sema nematha, singazi nokuba masithini kuba kwakungekho mntu,
kungekho nento ethi bekukhe kwakho umntu apho. Aba sisi bacele mna nalomfo uqhubayo ukuba
singene apha emahlathini kuba singamadoda, sikhangele mhlawumbi singabhaqa nto. Ndikhe
andayithandisisa ke noko le ingcebiso, ndangenwa nalugevezelo Iwamadolo, ndiqonda ke noko
ayingangam xa kungoku, kodwa ke ndaziqinisa, ndingafuni lamahotyazana andiwe ngentsini
kwakhona. Ndaginya ilitye ndamlandela lomfo, sangena emahlathini apho sizama kukhangela lo
mama nosana olo. Sichwechwa njalo sele kulithuba noko sikhangela, sothuka saphantsa
ukuzichamela yinto esayibonayo, phofu ke sarhwetywetshwa kwayingxolo kuqala, sasondela. Mha!
dadethu, isimanga esasibonayo apho sesingathethekiyo. Yayingomama abahlanu behamba ze,
bephikisana, behlutha-hluthana ngenyama, bebhonte ligazi.
lindlela esothuka ngayo intliziyo zethu zaphantsa ukuphuma ngomlomo, kananjalo sasifuna
ukubawa ngentsini yindlela ababe ngumbono ngayo, behamba benxibe isutu yesele, besitsho
ngevatala zamabele nemiqamelo yeempundu. Babengenalo nothuku bubukho bethu kuloo ndawo
kuba babexakekile bexhwithana ngezongadluma zenyama esasicinga ukuba babe lijaja ligazi layo.
Sikhe sadideka kancinci xa sisiva omnye ekhalazela ukufumana isahlulo esincinane esakugqiba
ukuza nawo ngokwakhe umcimbi, ze lowo babe xhwithana kunye naye afumane isahlulo esithe
xhaxha kuneso sakhe. Sajongana nalomfo saqonda ukuba ingenil intak endlwini, silande
emkhondweni onguwo. Sikhe sangenwa nalidyudyu sisoyika ukuba ayakusithini loo magqwirhakazi
ukuba anokuqonda ukuba silapho.
Sakhululwa kukuva iinqwelo zabakwantsasana zisitsho, bathi xa besothuka befuna ukubaleka
sasuka sevumbululu sisithi mabame kanye kuloo ndawo banganyakazi nokunyakaza, phofu sele
sizenza amapolisa singafuni ukuba babhungce. Sakhwaza sisenzela ukuba amapolisa lawo ayefika
akwazi ukusifumana apho sikhona. Bagaleleka abakwantsasana bothuka boma bakubona loo
mbono. Eyokugqibela ukusothusa yeyokuba loo nyama kwakuhluthwana yayingamalungu olwasana
Iwalulila enqwelweni ngaloo ntsasa. Yaba nguloo mbono, aboo mama behamba ngezo vatala
zamabele naloo miqamelo yeempundu, bekhweliswa kwiinqwelo zamapolisa nezo ngadluma
zezigede zamalungu osana. Yaba ndim ke lowo eguqa ngamadolo ndikhupha yonke lo nto
bendiyidle ngaloo ntsasa, ndijikelezelwa nayintloko kukubona isimanga esinjalo.
Akuphelelanga apho zaqala phantsi iimazi xa sele kugqitywe yonke into namapolisa, sele
sigqibezela uhambo Iwethu, zindipheka zindophula, zibuza ukuba ndisatsho ukuba ubugqwirha
bubuvuvu namampunge kusini na. Laqhubekeka lathi elinye inenekazi ukuthakatha asikokukhwela
umtshayelo kuphela. Yonke into engcolileyo oyiceba uyenze komnye umntu ngenjongo
zokumsadalalisa bubugqwirha nokuthakatha oko. Ndagqibela ngaloo mini ukulikhupha ndisithi
ayikho into ebubugqwirha nekukuthakatha, ndisithi bubuvuvu namampunge.
NDIBIZWA LILANGA
Mangaliso Buzani
Ndiphuma nesitulo sam
Ndibizwa lilanga
Incwadi iyaziyaleza
Nqaku ndiyayithatha
Inja yam iyandikhokhela
Okwemvumi umoya
Nam ndiyalandela
Chuu ngezihlangu ezikekeleyo
Ndiyokukhanyisela ingqondo
Vuu emthunzini
Ndamkelwa ngumthi
Onxibe idyasi eluhlaza
Nam ndiyabhotisa
Kushukuma amahlahla
Iyavuma inkosi
Ndicenga umthunzi
Amehlo aqalisa incoko nencwadi
Iyahamba kwanemini
Phantsi kwamasebe asixwexwe
Ulonwabo lonele
Umphefumlo upholile
Intliziyo iyahleka
Amabali ayanyumbaza
Nqeke amazinyo abomvu
Bayabhala abantu
Amathambo axelela igazi
Ilulutho le ncwadi.
N
O
L
I
Z
W
E
U
B
U
S
O

B
A
K
H
O
Mangaliso Buzani
Umhle uhonjiswe ngeentyatyambo
Ujikelezwe yimilambo
Amalwandle aneengoma
Uzele zizityalo
Imithi ethwele iziqhamo
Unengxolo
Ubomi bezidalwa zikaThixo
Uqhayisa ngelanga
Ufumbathe inyanga
Kubusuku obuzele ziinkwenkwezi
Uvuthela izilonda
Uphilisa amanxeba
Ngomoya ohlambulukileyo
Ziphole iintliziyo
Unochapha-chapha
Izingqi zemvula
Unomculo
Uthwele unomathotholo
Intaka egxalabeni lakho
Unencoko
Usebe-sebe wezithandwa
Zonke eziphilayo
Zisezandleni zakho
Zikubulisa ngentseni
Wolule ezoongalo zakho
Kugqame ibe yimini.
Mangaliso Buzani
Mhlawumbi ndishwatyulelwe
Ngobugwala ndiphehlelelwe
Kutheni kuba mnyama xa ndinyathela
Ubuso bakho busithela phakathi kwemitha yelanga
Ndikhubeka ndisiwa kungekho matye
Amazwi ephelela emqaleni ndifuna ukuthetha
Ndiqina xa usithi thu
Ndome ndibe sisitetywa ukuthi tu
Makube ndibethwa bubuhle bakho
Okanye nditsalelwa ngemva luloyiko
Lwamabele akho
Kodwa ndiyakuthembisa
Ngeny imini ndokuyibulala le ntaka
Ndithethe elubala
Ndithi: Mabhebeza
Ndiyakuthanda.
KUDLIWANO NDLEBE NO-FUNDISWA MHLEKEDU
Imibuzo nguMadoda Ndlakuse
MN: Ingaba ababhali besiXhosa abakhoyo benza ngokwaneleyo ukuze isiXhosa sakhe isizwe,
sifundise?
FM: Ewe, ababhali besiXhosa bazama ngandlela zonke ukuba isiXhosa siphucule uluntu, sakhe
isizwe, sifundise kwaye sonwabise. Ababhali bayayidlala eyabo indima, kodwa mna
ndicinga ukuba ngotishala ezikolweni ekumele bakhuthaze abantwana babo ukuba
bathande ulwimi lwabo.
MN: Yintoni oyithandayo ngolwimi lwesiXhosa?
FM: Eyona nto ndiyithanda kakhulu ngolwimi lwesiXhosa kukuba mihla le sidibana namagama
amatsha angasetyenziswayo qho, nesithi sakuwasebenzisa sivuselele nabanye abantu
batsho basithande isiXhosa sabo.
MN: Izikhululo zosasazo ingaba ziyamenza unako-nako wokuba ulwimi lwesiXhosa lukhuliswe?
FM: Ngumba obaluleke kakhulu ke lo wezikhululo zosasazo. Ndicinga ukuba azenzi
ngokwaneleyo ukuphuhlisa ulwimi lwesiXhosa. Ndikhe ndive maxa wambi kwiintengiso
zethu kusetyenziswa abantu abangengomaXhosa kodwa intengiso yona ibe
isisiXhosa. Andazi ke ukuba imfundiso iphi na apho ngoba mna ndibona ngathi
sidodobalisa ulwimi lwethu. Nakwimidlalo kooma bonakude. Umzekelo kusetyenziswa
abalinganiswa abangeyontetho isisiXhosa kwindawo zabantu abathetha isiXhosa.
Andiyikhumbuli ke ndiyiva isenzeka le nto kwezinye iilwimi. Noko ndicinga ukuba le
yindlela nje yokudodobalisa nokujongela phantsi ulwimi lwethu.
MN: Uvakalelwa njani xa ubona umXhosa othi akasazi yena isiXhosa, sinzima, sinzulu njalo-njalo?
FM: Kuba buhlungu kakhulu ukuva umXhosa wakwaXhosa esithi akasazi isiXhosa. Loo nto
indenza ndizibuze ukuba ngaba liyaphi eli lizwe. Ngoba umntu ufanele ukuzingca ngolwimi
lwakhe. Mandenze umzekelo, xa usiya kwiphondo apho kuthethwa olunye ulwimi wena
ufike uthethe isiNgesi, ngubani ozokuthathela ingqalelo njengomXhosa? Uphelele
ekuzichazeni ukuba ungumXhosa kodwa ulwimi lwakho luthetha enye. Kubalulekile ukuba
sizifunde ezinye iilwimi, kodwa masizingce nangolwimi lwethu lwenkobe singamaXhosa.
Andiqondi ukuba ukho umntu owakhe wanzinyelwa lulwimi lwakhe azalelwe kulo,
ngaphandle kwabo bangazimise langa konke-konke ukufunda iilwimi zabo.
MN: Ikho imiceli-mngeni ekhoyo malunga nolwimi lwesiXhosa?
FM: Ikhona imingeni ejongene nesiXhosa. Abantwana bethu ngoku bafunda kwizikolo
zabelungu apho singafundwayo khona isiXhosa. Nabazali babantwana babonakala
bengasinanzanga isiXhosa, ngoba umzali naxa engxolisa umntwana wakhe okanye
encokola naye, ukwenza oko ngesiNgesi. Ngoku isiXhosa sixutywa nesiZulu ungayazi
neyona nto yenzekayo.
UBUZALI
Mvakalisi Edi
Usana olutsha luzisa uvuyo nemincili
Kuyiyizela abafazi, ukhwelo emadodeni, bagule abafana
Luvuyo nokucwayita komncinci nakomkhulu
Libhongo neqhayiya ebazalini
Wofika besithi: Le yindlalifa yasemathileni
Yanda intsapho ukuba yindodana
Waphela umzi ukuba yimazi apha
Kodwa kukwanda kwenkomo kwelikhaya
Ezi zingcingane zovuyo kumzali
Obu bubuzali
Hayi ukubila usoma
Yimizamo nemigudu
Luncumo ukuba ubona belala bedlile
Ukubalisa ngabo, nokubabona bekhula
Mvekundini enikwe imfundo nothando bubuzali
Ukubonwa ugula yaye uxhwalekile
Kusika inimba
Kaloku obu bubuzali
Xola ndilale ndingatyanga kunokuba
Abam balale ngendlala
Anga ngamazwi obuzali
Ukunxiba kosana lwam
Kulunge ngakumbi kunokunxiba kwam
Oku kukuncama kobuzali
Yini na ukuluma kwesizalo sam
Umqwebedu neliva enyameni yam
Ukulahla imfundiso zam
Ukuhambela ezindleleni ezimbi
Imikhuba eyonakalisa intliziyo yakho sana lwam
Mikhuba leyo ebulala intliziyo yam
Ndikhulile ndinemibimbi
Undibona ubugqwirha
Iintsizi nezikhalo kum
Ukuhlupheka nokuxhwaleka kokwam
Ndama ndivuka ngenxa yakho
Iyonke lonke uhleli emhlana
Unditya okwexhalanga
Ashiyeke umzimba urhawuzela
Ongathi ndityiwa ziintakumba
Ukuthi loxo komzimba ndixel inj endala esandozala
Ndisuke ndafana ne-emele
Engenanto ukuxokozela
Usizi eluntwini
Amabhongo atshabalele

Lufile usana lwam
Ndokukhala ndilile, bubuzali
Ewe ndingumzali
Kunjalo ke ubuzali mzali nesiphelo.
ZIBUYIL INTW EZINKULU KWELENGOLOVANE
Douglas Ntuli
Ihambe iwatyekeza inqwelo yamahili-hili amakhwenkwe kwezofama zinxuse idolophana yaseMnyameni,
kodwa iqela lokugqibela latyekezwa kwifama yaseDebera, iyimincili yodwa kubazali bala-matyendyana.
Ayelapha kwelo qela amawele asemaSukwinini, uNcedile noZincedile izinto zikaMati, uyise
owayenguNdomelele igama.
Babekhangeleka besegazini oorheme, kucaca ukuba inyula nontshayi-tshayi ebengadluli nje
kwezabo izisu, kananjalo nemali beyiphethe ngeengxowa. Kwakumnandi kwelikhaya ngezintsuku,
kutyiwa ooni nooni, umxhaxha, nengxangxa usabekelwe ecaleni ngumlisela nomthinjana.
Ziquqile iintw ezinkulu kwaTebha, ziyikhupha ziyikhuphile imali, kuthengwa oozibhayisikili,
iigumba-gumba, njalo-njalo. Kwakufanele ukuba bezithengile iibhayisikili kuba kaloku idolophana
yaseMnyameni yayimalunga neemayile ezingamashumi amabini ukusuka eDebera. Afike ngexesha
elimnandi lamawele kuba kaloku yayilixesha apha abamnyama babevulelwe bangene, baze
bathenge enkanti udlomdlayo. Kwakumnandi nakoomahlalela, ingakumbi ngeempela-veki, kuba kaloku
utywala baseMlungwini babungaqhelekanga kubo, iyiqhilika yobusi eyayisaziwa phantse kuzo zonke
ezoo fama zingqonge idolophana yaseMnyameni.
Amaqela ebhola kweloMntla Transivali ayelila ezimantshiyane ukuphelelwa kwalamawele yijoyini, kuba
kaloku ayengoo phuncuka bemphethe kulo mdlalo. Kwilizwe lakwaMlungu azimanya neqela
ekwakusithiwa yiSwallows kumgodi i-Evanda. Emka kweli lizwe laseMlungwini ezibalule kumdlalo
womboxo.
Ukufika kwawo la makhwenkwe zaba ninzi iinguqu ezenzekayo kwezi fama, ingakumbi
kwezenkcubeko nezithethe. Ilinge lokuqala kukuphelisa umdlalo weentonga owusele usube imiphefumlo
emininzi yamakhwenkwe, owawuqhebeka ngeemini ezithile xa kuxhelwe inkomo emzini, okanye
ngeemini zemitshotsho. Onke amakhwenkwe kwakunyanzelekile ayekubetha iintonga ngosuku
lwangeCawa, emva kwamacongwane namaduntso, okanye emva komtshotsho owawubanjwa ngokuhlwa
kwangoMgqibelo, kuze kusasa ngeCawa ibe ngumdlalo weentonga.
Ilinge lesibini kukuphelisa imitshotsho, kwaze kwasungulwa iikwayala ezazifumana ithuba lokukhuphisana
ezikonsathini, ndithetha ntoni, amakhwenkwe amadala ayekhuphisana ngo-Do abasityhakala, esitsho
ngaloo ndyondyo ingaqeqeshekanga. Laye lasungulwa nalo iqela lombhoxo, Black Pirates, elathi lenza
eyona nguqu inkulu kwezemidlalo, ndibala ntoni, zazilapho izinto zooMabhuti, into kaNtuli, uMkhwabela,
igwangqa elalitshatshile kumbindi webala, likhaba ngawo omabini amanqina, into zooKorte
emaTshaweni. Uthe uphela unyaka labe eliqela seli saziwa phantse kulo lonke elaseMnyameni,
iinkonjane zasedolophini, Swallows, ziyalazi eli qela. Iintyatyambo zohlobo, Summer Roses, nazo
ziqhubisene neli qela.
Kuyacaca okokuba lamawele ayemfuzile uyise into kaMati, kwaGotyana, owakhe wadlalela
iiNgwangwane eMduluswa kwelaseBhayi. Kwanamhlanje nje zonke ezoo fama zingqonge iDebera
ziphumile ebumnyameni kwaye zisesendleleni eya elukhanyweni.
INTLALO NGOKWENKOLO KWIDOLOPHU YASE BHAYI
Isincoko ngobume beeCawa nentlalo yabantu. Iifoto zithathwe
zalungiswa nguMxolisi Dolla Sapeta
I
Z
E
N
Z
O

Z
O
M
Z
I
M
B
A
Athenkosi Nyembani
Ndigaqile ndaqonda ndaqikileka
Ndaqaba-qab umzimba ngamagama
Ndombath ilanga ingubo yehlobo
Ndachubek okwentyatyambo esingeni
Ndisisivotho-vothwana sesandana
Ndinkenteza kabuhlungu
Ndide ndikhuphe nabantu ezindlini
Ndidala noxolo kubunzima endikubo
Ndiyichola-chola yonk indawo
Kodwa ndimi ndawonye
Nezimanga zomhlaba ndizifunde ngomzuzu
Nabantu ndibazi ngala wam amehlo
Ndingqubeka kwiinkcasa ezininzi eziyantlukwano
Eyekhala indifaka esihogweni
Kanti eyobusi indakh ubuntu
Ndangcamla ngolwimi kwacaca ncakasana ngca
Emini nasebusuku andidinwa andilali buthongo
Ndiqwabaz ameva neenkunzana kwangezi nyawo zam
Kuyaphikiswana ileli lithi ndim phambili
Kowam umzi nomzana akuhanjwa kungadinwa
Xhakamfu ndixhwil oko kuphambili kwam
Ndamkela nabangaziwayo ngombuliso
Ndidala nokufa ngokwenza
Ndiwuchitha umzi sele umile.
INGCWABA
Athenkosi Nyembani
NguSathana ongenasizi
Ongaqiqiyo xa esenza izinto
Wenzela phandle engenazintloni
Awunamntu umoyikayo ufak iinzipho zezingxa
Uvuyelelwa nangubani nayimbuzane
Abancinci nabomthinjane
Bangena ngenkani kononyongo
Badlisela ngesibindi sendlovu
Inkathazo yehla kuhlekwa
Kwelokhaya lingenantloko
Liphathwa nalusan olubomvu
Ludlisa nakuthathatha
Izigulo ezininzi zivela ngawe
Ezehl engqondweni
Zingayilibali nentliziyo
Efa ngomzuzu
Ushiya izililo ngasemva

Zidl ubuhlungu
Neencwina eziqatha
Ezilalisa ngophotho
Kufa ulikhaya kulomzi weziyobisi
Ingcwaba ulenza kuhlekwa
Uthath umntan omntu umfake kulo mngxunya
Ungasizeli omdala nomncinci
Baselubalweni lwakho.
PHAPHAMANI
Athenkosi Nyembani
Bethani ngobuchule maciko
Nicikoze nide nivunyelwe ziintaka
Ziniculele ingoma zootyhatyhiwe
Zithi namhla impucuko isondele
Kukutya kwempaphamo kaloku
Mawachasele amagwala abaleke
Azibelek emqolo ezonyawo
Inyembezi zimpompoz intw enganasiphelo
Lixhentse lizombela ixhego nexhegwazana
Okwemvumi eyaziwayo
Phaphamani sizwe sakowethu
Ndithi phaphamani ma-Afrika amahle
Namhla isizwe sikekele
Sixel unonkala size ngecala
Namasiko adukile okwezinyo lenkukhu
Phaphamani bantu abantsundu
Isithethe sakwaXhosa siphangalele
Namhla sivungul impucuko
Masibhinqeleni phezulu okwabafazi abanenyongo
Sizithwalis isidima okwamadoda esintu
Phaphamani maAfrika amahle
Masicengceleze okwembongi zosiba nomgquba
Ngobungcali-buchule
Obungangxamiyo bunyathela ngesephuphu.
IMFUNDO
Athenkosi Nyembani
Ndiwatyhaphazil amehlw abona
Ndayicol ingqondo ngolwazi
Owam umzi mkhulu
Uzele wade wema ngeembambo
Ndiyihagu ndikrokra noko ndonele
Ndisisibane kwezoo mfama zingaboniyo
Ndiliyeza kwaboo bagulela impumelelo
Ndisisandla ukubambisana noluntu
Lonk uluntu jikelele lombath esam isambatho
Ndifinyez imikhono ndisilwa noluntu
Ndibahlohl amagam engqondweni
Ngolwazi ndizuza msinyane
NoMongameli baphuma kulowa wam umzikazi
Nezifundiswa zoqobo ziqoqwe ndim ingqondo
Nogqirha ikwandim umdali wabo
Kowam umzi awukh umgwebo
Ndigweba ngemincili yodwa
Ndihleka ndide ndiqethuke
Izidlele zibekude kuncumo
Eyam indlela ayinameva ayixinileyo
Kwixesha lobuxhego nobuxhegwana ndikho
Kwinkedama ndim unina onothando loqobo
Ndilihobe ukufihl amantshontsho kwisangxa.
U-MAASIBHANKA
KA-NKEBEZA
Mpumi Cilibe
U-Nkebeza wathi akwamkela imali yakhe emva kokusebenza
nzima esomba imingxuma ngepeki wacinga ngento
amakayithenge yokupheka endlwini yakhe. Wazula-zula
ephuma engena kwiivenkile zase Korsten wade wabona
ivenkile ethengisa intlanzi ekrwada, wangena apho. Wema
uNkebeza phambi kwe-fridge enegilasi ebonisa ngentlanzi leyo
ithengiswayo wabuka, umlomo wakhe uvuza amathe
kukubawa.
Wakhetha eyona ntlanzi inkulu ebizwa ukuba nguMaasibhanka,
wayithenga. Intlanzi yasongelwa ngephepha. UNkebeza
wayithatha, wabulela, wandula ukukhawuleza ukuya kukhwela
iteksi egodukayo.
Ekufikeni kwakhe endlwini uNkebeza wafaka intlanzi leyo
esityeni, wagalela amanzi, wayikaraba ngemela yakhe ebukhali.
Krhwaap krhwaap krhwaap, wakaraba uNkebeza
uMaasibhanka wakhe, wawalahla amanzi amdaka edreyinini,
waza amaxolo entlanzi wawaphosela ikati eyayijikeleza apho
ibawa. Isitya esinentlanzi wasibeka phezu kwebobosi lakhe efuna
ukuba yome intlanzi phambi kokuba ayigcade nge-oyile.
Wahamba uNkebeza ezama ukubethwa ngumoya; waphuma
engena kwimizi enemigidi ethoba unxano. Wathi akukhumbula
intlanzi yakhe efuna ukugcadwa wakhawuleza wagoduka. Wafika
uNkebeza ikati ebeyishiye izula-zula xa kanye
igqibezela ukutya uMaasibhanka wakhe phezu kwebobosi.
Wazithwala entloko izandla zakhe wakhala:
Owu uMaasibhanka wam!
Yatsiba ikati yabaleka, yakhwela ethangweni yagoduka. Yashiya
amathambo entlanzi kuphela. Wayilandela uNkebeza wayibona
apho ingena khona naye waya kungena apho kowayo,
kwabawo uNoqothoyi, ecaphuka. Wafika apho uNkebeza ubawo
uNoqothoyi ehleli ethengisela evenkileni yakhe, wathi: Uxolo
torho Tata, ikati yakho itye uMaasibhanka wam!
Waphendula utata uNoqothoyi wathi: Ikati le ibingathunywanga
ndim!
Wabuza uNkebeza: Ubungena kundibuyisela oku kwemali yam
ndizithengele torho into yokutya ke?
Waphinda waphendula utata uNoqothoyi wathi:
Hayi, ngoba ikati le ibingathunywanga ndim, kwedini!
Wemka apho uNkebeza umlomo uxwebile kukulamba oku. Ikati
yayithe ngcu phezulu ethangweni isula-sula umlomo wayo
imbukele, ixolile, ihluthi kamnandi.
AZI ULINDE NTONI NA?
Madoda Ndlakuse
Inyani mayithethwe ngelayo ixesha
Qho xa ndiphos iliso lam kuwe
Ndivela ndinqaphele ukuphefumla
Qho xa ndikuwolile
Izandla zam

Zixuthelwa awazo amandla
Azi ulinde ntoni na?
Undikhanyisela njengenkanyezi
Umlambo wothando ugcwele nto nje
Awukandiwezi

Nakowenu anikandiwezi

Azi ulinde ntoni na?
Uthando lwam kuwe
Lunjenge Ntab eTafile

KwiKapa lodumo

Ndithi mandihlabe emxholweni
Ndiyindoda elithintitha
Amazwi am awayikubancasa ncam
Sekunjalo ndithi khawuphothe
Le ngcamango
Nceda xabisa imizamo yam
Ndixolele ngeempazamo
Lukhanyo Sifo
NAM NDICELA UTHANDO
Emini emaqanda ndililanga lakho elikhanyayo
Ebusuku ezinzulwini ndiyinyanga yakho ekhazimlayo
Ebusika kwinkwanca yengqele
Ndisisambatho sakho esifudumeleyo
Ehlotyeni kwingqatsini yelanga
Ndingula moya wempepho uhlaziyayo
Ebumnandini nasebubini
Ndilubambo lwakho oluqinileyo.
Bekunokubanjani ukuba besinokwazana banzi?
Ndikondlalele ukhukho ndikuphe izipho
Negama elitsha
Ube ngumama kasiQhamo wam
Sibe nabazukulwana ababaleka okoonojubalala.
Andidlalisi ke ubonanje
Ngawe ndixolele ukujinga iliso
Ndisuswe indlebe
Ndikrazulwe imilebe
Ndityakatywe nobuso.
KUDLIWANO NDLEBE NOATHENKOSI NYEMBANI
MN: U-Athenkosi Nyembani lo ngubani, ezalwa phi?
AN: U-Athenkosi Nyembani uzalwa kwilali zaseQonce phantsi kwelali zaseMxhalanga,
kwilali yaseMagqobhokeni. Ndingumntwana womgquba ngosiba nangokubonga.
MN: Xa ndithetha ngolwimi lwesiXhosa usuka uchulumance, wenziwa yintoni?
AN: Ulwimi lwesiXhosa luyamakha umntu nokubana kakade ungubani, waphi, ezalwa
ngubani. Ulwimi lwesiXhosa alunasiphene, lolwenkobe. Ngxebe! Tshotsho!!
Ngxatsho buyelani embo bantwana begazi, bantwana bomthonyama, zisele ze
nyathi. Thobani ezoongqondo zilukhuni! Namhla nesizwe sikekele sixelunonkala.
IsiXhosa sijongelwe phantsi. Thina lutsha lwanamhlanje sithi asinampumelelo
ngaphandle kwesiNgesi. Mna Athi ndithi IsiXhosa kum yimpumelelo njengokuba
ndathi ndiphum amazinyo ndaqala nokuthetha ndathetha isiXhosa. Yonke into
ndiyenza ngesiXhosa, nebala lam lelomXhosa, Iintsundu lindixela ukuba
ndingumXhosa. Masilithandeni ulwimi lwethu kuba nalo lizakusithanda.
MN: Kutheni usithanda kangaka nje isiXhosa?
AN: Into indenza ndisithande isiXhosa kaloku kukuba isiXhosa lulwimi lam endaluncanca
ebeleni luka-Ma, kwaye lulwimi olundivelela ngezimvo ezininzi. IsiXhosa sindinceda
ndiveze isakhono sam kwizibongo, kwiincwadi, nasekubhaleni amabali
amafutshane. Ndikwayiyo nembongi ephum izandla ngenxa yolwimi lwesiXhosa.
MN: Ikho imiceli-mngeni umbhali wesiXhosa ahlangana nayo?
AN: Mininzi kakhulu. Kukufakelwa iminwe ngabo bakuncedisayo kulwimi lakho
olubhalileyo, bathi besakuncedisa njalo balubone ukuba luvuthiwe alukufanelanga
wena mntu walo, balujike balwenze olwabo. Ngamanye amazwi baye babe
umsebenzi wakho baxele ukhetshe esiba amantshontsho. Thina sethuka
ubhalo lwethu lupapashiwe ngaphandle kwemvume yethu, phofu sele kusithiwa
lubhalwe ngabanye abantu. Lubiwa kwangulomntu ebethe uzokunceda
akupapashele. Isihloko sesam, indlela yokubhala yeyam, umba ngowam, amagama
ngawam, ze ke igama elibhaliweyo lombhali walomsebenzi ibelelesela elo. Nantso
ke imiceli-mngeni ebuhlungu esidibana nayo, ukungahlonitshwa kweenzame zethu
njengababhali.
QABUKANI
Victor Mguzulwa
Saqabuk ekungqengqeni sagqiba
Saqubul iminqayi yeminquma
Saqhekez iqabaka kaqaqaqa

Saqabel umnqatsa weqhina
Qakath enqileni kuqulunqwa

Kwaqatshelw isishiqi senqontsonqa
Inqambuzan eqaqambis ingqondo

Kwaqhwatywa ngesigqibo senqubo
Iingqondi zaqokel ukuqononondisa

Ukonqena ngumqob oqatseleyo

Saqala sangqina siqinisekile
Iqaqobana laqumba liqhankqalaza
Inkqubel isekuqinisen umqolo

Sawaqond amanqakw aqaqambileyo.
OOMATSHONISA
Victor Mguzulwa
Nab oongxowa-nkulu,
Bejijitheka
Nab oohlohlesakhe, tyhini!
Begqotsile.
Nab ooziswana zibomvu
Benyalasa
Nab oongxow ayibotshwa
Besindasindeka
Baphang ilifa lamahlwempu
Bezenzel ubuncwane ngenyembezi
Bagcwalis iitasi zabo ngobuxoki
Befez iinjongo zabo ngobuqhophololo
Sabhang isizwe ngenxa yabo
Zaphel iintsapho ngenxa yabo
Kwagqub ubundlobongela ngenxa yabo
Ziincukuth ezidl igazi
Labamsulwa
Latsaz igazi laphalala
Ze zahluth iingcuka
Siph isazela senu
Mikhanzi ndini?
Aninaluvelwano yini na
Makhalane ndini?
INGXOKOLO
Victor Mguzulwa
Iliwa libhek umoya

Zintaba nenduli zibharhile
Zintlambo nentlanjana zomile
Amahlathi namathaf atshile
Ziingozi zisub imiphefumlo
Ziimfazwe nemilo zibasele
Zizif ezinganyangekiyo ezingubhubhane
Yimpixwanw erhawuzelis amakhwapha
Ziintsapho zivukelana zodwa
Ziintlanga zinyembana zodwa
Ziinkokheli zikhomban esweni
Ziingxaka zigxobh inzolo
Musan ukuphalaz igazi zizwe
Manyanani nibeluqilima
Musan ukwenziw iintsalu
Xhawulanani nimchas uMtyholi
Ikratshi nempakam azilutho
Ukuthobeka nesidima ngundoqo
Buyelan embo niland ubuntu
Kuthi nya; cwaka; zole ngengxokolo.
NKOKHELI ZE-AFRIKA
Victor Mguzulwa
Zingxoxo kuxhatshw amagwebu
Zingxaki kuxhatyashiwe
Zinkokheli zididekile

Uluntu lungamatasa-tasa
Bubugxwayiba buyaxhwalekisa
Yinkxwalekw enxunguphalisayo
Yimbudu-mbudw edakumbisayo
Yintsinda badal ekhwankqisayo
Luloyiko luyaphakuzelisa
Ludandatheko luyatyhafisa
Ziziphithi-phithi neziwili-wili
Zinkokheli ziphatha-mandla nithini na?
Siph isisombululo zinkokheli?
Uph umkhomba-ndlela?
Luf uluntu zimbambano?
Bunqanden ubutyhakala
Ciman umlilo wedobo

Hleze sitshabalal isizwe
Ciman umlilo wedobo

Hleze lumanyan uluntu

Lwakh isizwe.
IZIYOBISI
Victor Mguzulwa
Ngubhubhan ogqib isizwe sonke
Ligongqongqw eliginy ulutsha lonke
Ngumonakalis ingqondo
Lirhamncw eliqweng intsapho
Ngumduba-dubi wenzol ekhayeni
Lif elimnyam elithwel isicotho
Ngumnyash ocinezel ingcamango
Ngumaphephethekis ophuthis umbono
Ngunozala weembambano nemibhodamo
Ngumlahlekis ongenalusini natarhu
Zinga ziyonwabisa kanti ziyayobisa
Azizi nampucuko koko ziza nempuncuko
Kuphoncuk izimilo kuvel uburhalarhume
Kuphoncuk ucoceko kuvel ubuxelegwana.
I XHALA
Victor Mguzulwa
Ubungxwayiba buxhalis
Isixeko
Iingxelo zixel
Inxwaleko
Amaxhegw axox
Iingxoxo
Ngamaxhaphetshw iingxaki
Zingxamile
Amaxhwel axakekile
Yimixube
Axhinel ukuxhamla
Ngamaxhoba
Xhosa waxweb
Uxelani
Ngxengxez uxolelwe
Ngokunxaxha
Sixumeni manxusa
Ngenkxaso
Umxhaxha nomxoxoz
Uxhaphake
Xabisanani nixhawulane

Ningagxekani
Gxebe nxiban
Uxolo.
MPHATHISWA OBEKEKILEYO
Pumelelo Antony
Enkosi
Mphathiswa obekekileyo
Enkosi
Ngokungandiseso.
Enkosi

Enkosi
Ngokundilibala
Okwasemaphupheni mandulo
Ngeba ndandifak inkomo,
Ndihlala kwipomakazi,
Ndiqhub umnyobo,
Ndiphil okwesinhanha.
Kodwa inene
Mphathisw obekekileyo
Kukuxakaniseka

Okundiqhubela kunoNyanga
Nangona ndingxolelwa liphango.
Bandikhomb umnumzana,
Bandibiz umfundisi,

Balath umhlekazi,

Babon uTishala
Kodwa
Yindlamanzi yenxila,
Lizuma lesidlwengu,

Yinkintsela yeqhetseba
Ulunt elimbonayo.
Nok abanesibindi
Sokuzibiz iz fundiswa
Ndincedisile ukunakha, kodwa
Nonke nincedisan ukundidiliza.
Yini Mphathiswa yini?

Rhoqo ndakuyinyova
Rhoqo ndakuxhentsa
Soloko iyimband es khova ?
Enkosi
Enkosi
Ngokungandiseso
Enkosi
Enkosi
Ngokundilibala.
MPHATHISWA OBEKEKILEYO
AFRIKA
Jessica Mbangeni
Afrika nozala wama Afrika
Afrika nozala womzoNtsundu
Afrika nozala womlisela nomthinjana we-Afrika
Zifikile izikrelemnqa zinge zize kuzakuza
Zizenza oonozakuzaku
Yangqisha intomb enkulu yakhaba ngawomane yalan-
dula
Abhuduzel amabhedengu
Ebhud ebhabhama exel umbhali
Wasuka wabhebhetha
Ebekulukuhla ekulahlekisa amalokonya
Kodwa awayilahla imbo yakho ngophoyiyane
Bebekudova-dova
Bekunyathela bekubiza ngenkqantosi
Mhlab omnyama mhlaba wookhokho
Masimi aluhlaza
Masimi achumileyo
Achunyiswe kukuzingca nebhongo lama-Afrika
Kuni ke ma-Afrika ndithi: Huntshu!
Ngenxa yokumel inyaniso
Nendzondelelo yokugcina uzinzo lweAfrika
Kuba lomhlaba nalamatye nditsho iGolide
NeSilivere inkazimlo yazo ibingenakuthi hayi
xa belirhutyula abarhwaphilizi
Elixhaphaza amaxhalanga.
Qhubekani zintondini nani zintokazi
Nize nimthobele uThixo woyihlo mkhulu
UHintsa, uPhalo, uRharhabe, uNgqika
Ngokuba liwe phantsi iqhinga likamtyholi
Owabonwa ngumprofeth uNtsikana emdudweni
Elokuba nakugqilazwa nenziwe amakhoboka
Yilamigegemba yambabhulempu
Amahilihili
Amatshivela.
Rholihlahla ntokaMandela
Sithi Bayethe kuwe liso lezulu
Wenothweluthuthu lwezitho zengwevu zangaphambili
Oo-Mxenge, oo-Steven Bantu Biko,
Chris Hani, Robert Sobukwe,
Govan Mbeki, Chief Albert Luthuli
Nilurholile uhlahla lwentlonipho yokuhlonitshwa
Komnt omnyama kwilizwe liphela
Nilurholile uhlahla obelufudula lurhwatshilizwe
Lwaza lwafunyanwa ebuhlungwini betyhefu
Yerhamb elimnyama labentlanga.
Mhla uzakubhubha Madiba
Uze uncede ubize mna lo
NdiliGubevukazi ndawufela indawo yakho.
Isizwe sabaThembu siyandingqinela
Nditsho umlambo uMbhashe
ingxangxasi zeTsitsa ziyandivumela
Zithi: AAAAAAAAAh!!!!!!!!!!!!!Dalibhunga!!!
Ndegram!!!!!
UMKHOMBE WASEMAPHUNGUBWE

Jessica Mbangeni
Mathongondini sinonile
Mathong okhokho awafumani kuphumla
Mathongo ayagqum encwina kuloomadotya aseMaphungubwe
Ngubani na obenokuzidela onyuk iminqantsa
Anyathele kuloo mhlaba wobungcwalisa?
Ngubani na obenokuzincama
Alahle impakamo asiphathele ityeya yemvelaphi yethu?
Nako ndisimka nomsinga kaBuyel ekhaya
Ndirhangqwe ngamathambo kuloomadlak eziKumkani
Ezaphathisizwe ngesidima
Umntyangampo kuthuthu lwamathambo eziKumkani nezanuse
Lwarhiph ulumxhelo
Ndee xhungu ndade ndanga ndiyadenga
Agxwal amathambo ngesimbonono
Kugquma kwamarhamncwa akhohlakeleyo
Kulomhlaba yhini na?
Marhamncwa amehlo aluhlaza yhini na?
Qhenkqe lini na eli nilisasazayo
Yingqumbo yeminyanya yhini na mzi wakowethu
Sisibetho sokhokho yhini na madoda
Kwowu! Bayaphi ubuNtu?
Sayaphi isazela?
Kanti umkhombe asinto yakuhlonitshwa
Susuke ubulawe nje nokuba ngubani, nini njani?
Suka ugumpule nje uphondo!
I-BuyaaaaMbo! Mzi wakowethu
Makuvuswe amathambo kaHintsa kaPhalo
kaKhawuta kaRharhabe
KaNgqika, masiwele uMbashe siye kubiza uNongqqawuse,
Masime phezu koTukela sibuze kuNomkhubulwane,
Masinyuke intaba siye kubuza uMoshweshwe
Uphi uMujaji? IKumkanikazi yemvula!
Masisile zizalise iingqayi
Sihlanganise iingwevu
ooCredo Mtwa noNelson Rholihlahla Mandela
Iinto ezinamava zihlalutye elinyala liqanduseleyo
Kaloku uphondo loMkhombe luchaza impatho yeKumkani
Indlela esikhusele ngayo isizwe sayo.
Umkhombe bubutyebi bemvela phi yethu
Ndingathetha ngophondo
Wena uthethe ngezitho
Ndingathetha ngokubhodla
Wena uthethe ngamathatha ayo
Sidlelana neMikhombe ngendlela ezahlukeneyo
Kodwa uMkhombe uthetha nam
Uthetha nawe
Uthetha nelizwe liphela
Uthetha nathi sonke.
Yiyo ke loo nto ndisithi
Yhizani nonke siphefumlelane kulo uphawu lomnqophiso
WakwaNtu
Ukuze sizifumane ukuba singobani nobungakanani
Bobunganga boxolo obuqulathwe ziintiliziyo zethu.
Mayiphile ngonaphakade iMikhombe
Ngokuba iyinxenye yempilo yethu nezizalwana zethu.
Masiy eMbo!
UKUBALULEKA KOLWIMI
Luckeez Mfowethu
Masikhumbuleni sisasuka ukuba ayikho into ebaluleke ukogqitha ilifa. Izizwe zonke ezikweli limiweyo
ziyayazi lenyaniso. Ulwimi, umhlaba, inkcubeko, ngamafa abalulekileyo eluntwini jikelele, kodwa ke
isicatshulwa esi singqamene nolwimi. Ilifa lizisa isidima. Isidima sizisa ukuzithemba. Ukuzithemba
kubalulekile ngoba kwenza isidalwa esinomqolo kuloonto siyimeleyo, nesithenjiweyo ngabo
babukeleyo. Ukuba ubani uthe wadlala ngelifa alishiyelwe ngabazali bakhe, uye angabi nasidima
ekuhlaleni kwaye angabi nakuthenjwa ngabo amelene nabo. Uye futhi abesemngciphekweni wokuba
lixhoba lokuxhatshazwa ngenxa yobuze bakhe.

Mandiyiphunge iseshushu ke gwalandini. Ulwimi lukwahlula kuzo zonke izizwe ezikhoyo emhlabeni,
nto leyo ekunika umhlaba nethuba lokuba nento oyaziyo ukuthi yeyakho kwaye ungazidla ngayo de
uphile nokuphila ngayo. Ezinye izizwe ziyawazi amandla ale nyaniso, de aqinisekisa ukuba iilwimi
zabo zibenobungangamsha kunazo zonke ezinye iilwimi. Umzekelo ophilayo eMzantsi Afrika sisiNgesi.
Amanye amazwe anamandla afana neChina, France nooJamani awagungqi ekusebenziseni nditsho
sele bethetha kumaqonga ampompoza kumhlaba jikelele. Baxolele ukuhlawula itoliki.
Ulwimi ke lubeleka inkcubeko. Xa ubani ethe wakufutshane nefuthe lolwimi oluthile uye abe nazo
nezimbo ezithile zabo bantu bathetha olo lwimi. Akukho nto ityhulu ke kuloo nto nto nje iye ixhomekeke
kubani lowo uba ezo zimbo uzisebenzisa ekuphuhliseni isizwe okanye ukuchitha iinzame zesosizwe
sakhe. Ukuzidla ngolwimi lwakho kubangela ukuba umntu obukeleyo azidle yena siqu, aziphuthume
engalandwanga. Umntu ozidlayo ngento yakhe kaloku uyakhuthaza kubantu ababukeleyo.
Bayadingeka ke abantu abazidlayo ngoba baza nesidima esizweni.
Ndiyawuva umbuzo wakho lawundini kuloondawo ukuyo othi: Abantu ababandezeleke ngokuthetha
nokuva ke ngoku bona uthini umcimbi wabo ngoba kaloku ulwimi lokuthetha ngezandla lulungiswe
ngesiNgesi ikakhulu? Loo nto leyo iye isivezele okwekati emhlophe ehlungwini ukuba ukhona umahluko
phakathi kolwimi nesigama. Ulwimi sisigama esikhatshwa yindlela ethile yokucinga. Umntu ozidlayo
ngolwimi lwakhe uye akwazi ukuba nezinto ezithile azaziyo ngaye ungakhange umbuze, de nibe
ngabahlobo kuba uve ukubetha kolwimi lwakhe uba angangumhlobo kuwe.
Masizilondoloze iilwimi zethu. Okubaluleke nangaphezulu kukulungisa iindlela zokucinga ngoba kaloku
yindlela ocinga ngayo ezakwenza uzidle ngolwimi, imbali, nenkcubeko yakho, umhlaba wakho, isiqu
sakho nabantu abakufutshane nawe.
Isidima akuziniki ungumntu, usinikwa ngabanye abantu ngenxa yendlela oziphethe ngayo. Ukulon-
doloza ulwimi lwakho nezinto ezingqamene nalo iba yenye yeendlela ubani abenokufumana isidima
kwabanye abantu. Masisebenziseni ke elo thuba ngoba isidima njengayo nantoni na siyosulela. Isizwe
esizidlayo siyabukwa zezinye izizwe. Masosulelaneni ngokuzidla ngeelwimi zethu sibe sisizwe
esinesidima phakathi kwezinye izizwe.
Mandibulele amaziko emfundo ephakamileyo afana ne-Nelson Mandela Metropolitan University eBhayi,
ne-University of Fort Hare eDikeni ngokundimema ekuphefumlelaneni nabafundi ngalo mba
wokubaluleka kolwimi. Ndibulele kwananjaqo iKotaz ukundipha ithuba lokuphosa igada endimeni. Kubo
bonke abazabalazela ukuvelisa isidima seelwimi zakuthi ndithi makwande.
UBUBI BOMNTU
Mxolisi Nyezwa
Umntu unzulu ufana nolwandle
Umntu endingamqondiyo
Rhoqo uyacebisa
Ungqina akubonayo
Nobubi babo
Acebise ngokunjalo
Ungqina okwenzakayo
Eyedwa ethule cwaka
Ubomi buyaxaka
Udubeka ngaphakathi
Emazantsi ekhathazekile
Kukho nto ingaginyekiyo ebantwini
Eswantsulisa maxa onke bonk abantu
Ubugwenxa bephanyazo
Ububi bomntu komnye umntu
Nobomi obufunzela ebumnyameni.

IMIBONGO YAKHO
Mxolisi Nyezwa
KuM.M. - isihlobo esadlulayo
Wawufuna ndishicilele incwadi yakho yemihobe
Ndandilihlwempu ndibhangile
Imibongo yakho yesiXhosa
Iyakuhlala ihleli
Wabhala ngobomi bakho kwaNomngqongqo
Ungayanga apho ngabugorha
Uliqaba ngemfundo nobungcali
Zona zikratshaza iintliziyo
Mini zonke
Ntsuku nje isidudu siphekw emini
Uhlanga lomnyama luty amadonki
Intswela-mbeko
Nembulaleko
Yintshinyela okotyani
Emhlabeni.
I
P
H
U
P
H
A
Mxolisi Nyezwa
Ndeva ilizwi emaphupheni ndilele
Yayingumntu omemezayo
Ndiyeza! Ndiyeza!
Emlilweni Phezulu
Ndiyeza!
Ubusuku babunyanyile
Phandle iliqabaka
Ndiyeza! Ndiyeza!
Emlilweni Phezulu
Ndiyeza!
Kwilokishi ekhaya
Apho ndizalwa khona
Kubuthume ishwangusha
Intlupheko nobundlobongela
Obungenambaliso.

U
H
A
M
B
O

O
L
U
D
E
Mxolisi Nyezwa
U
b
o
m
i yin
d
le
la
e
b
h
e
kisa
ku
N
g
cw
e
le
ka
N
g
cw
e
le
K
u
m
zim
b
u
d
in
iw
e
A
p
h
w
isim
b
o
n
o
n
o
so
m
n
tu
sin
g
a
ze
lw
e
b
a
n
i
Iso
n
o
sih
la
n
jw
a
n
g
e
e
n
zip
h
o
ze
g
a
zi
N
e
g
a
zi lo
m
ith
iyo K
w
a
n
ja
zo
th
u
m
lilo
-
K
u
b
u
za
ku
th
in
i? K
w
a
M
fe
n
a
kw
a
N
o
ziq
h
a
m
o
-
A
p
h
o
sive
la
kh
o
n
a
th
in
a
siso
n
ke U
b
o
m
i lu
th
u
th
u
lw
e
n
ya
n
g
a
e
n
tsh
o
n
a
la
n
g
a
U
b
u
th
i b
e
n
yo
ka E
ca
le
n
i kw
e
n
d
le
la
U
b
o
m
i lig
u
g
u
le
rh
a
m
b
a
U
vim
b
a
w
e
n
tiyo U
b
o
m
i ku
ku
n
ya
th
e
la
n
zim
a
U
b
h
e
ka
p
h
a
m
b
ili
U
b
o
m
i ku
ku
h
lu
p
h
e
ka
n
g
a
p
h
a
ka
th
i
U
b
o
m
i ku
ku
h
la
lu
tya
u
tya
n
i
U
b
o
m
i ku
ku
p
h
a
m
b
u
ka
e
n
d
le
le
n
i
U
b
h
e
ka
p
h
a
m
b
ili
N
a
ku
n
d
isa
la
B
a
b
h
e
ka
p
h
a
m
b
ili
N
a
ku
n
d
isile
la
K
u
sith
e
la
n
e
n
ya
n
g
a
Y
e
n
d
la
la
N
a
ku
n
d
isa
la
B
e
siya
p
h
a
m
b
ili N
a
ku
n
d
isile
la
K
u
tyh
ile
ka
n
e
la
n
g
a
L
e
Z
u
lu.
AKUKHO
SALHUKO
APHO
Mamtika Pakade
Ndiva umvandedwa ngaphakathi kwam
Ndiva intliziyo yam ibetha ngaphakathi kwam
Ndibambe ngezandla zakho ezishushu
Ndange ngeengalo zakho ezinkulu
Ndibabonile abantwana bedlala
Ndibajongile bebambene ngothando
Ndimile ndabajonga ndanqwena
Ndanqwenela ukuba nje ngabo
Iinyembezi zisoloko ziphuma
Ukulila andikunqweneli
Ukulila kuzisa ukunxunguphala.
ULWIMI LUKAMAMGOBHOZI
Mpumi Cilibe
UMakhulu uMamGobhozi wayekholwa kukuma efestileni yendlu yakhe ngaphaya kwe-lace curtain,
ajonge wonke umntu odlula ngendlela. Loo nto iyodwa nje ibingento inamsebenzi: ukujonga
abadlula phambi kwendlu yakhe. Kodwa apho ibingento ilungileyo loo nto zizinto ebeziphuma
emlonyeni kaMakhulu uMamGobhozi ngamagama abantu. Ebethi akubona mhlawumbi ubawo
uMqoco umve esithi: Kha ukhangele laa nto uQoco iphuma ingena ihamba iphunga kule mizi kodwa
amanye amadoda aphangele! Uthi woze asebenze! Hayi sisimanga! Atsho eqhwaba izandla.
Okanye umve esithi, Kha ukhangele elaa gqwirhakazi uMadlamini, into eyamdlisa yamgqiba kudala
umyeni wayo! Indoda esisithunzela esisoloko sihleli ecaleni kwendlu. Uwowu!
Uqhubile ke uMakhulu uMamgobhozi ethetha ngoluhlobo ngabanye abantu sele kukho abantu
basemzini abamvayo yena engababoni, yaza le nto yaya kufika kumama uMadlamini le nto yobo
bugqwirha bakhe, yamkhathaza kakhulu emphefumlweni wakhe, kodwa wacinga ukuba angacaphuki,
wasuka wathandaza.
Uhambile umama uMadlamini akumbona ukuba uMamgobhozi akazimiselanga kuyiyeka le ntetho
yakhe imbi kangaka waya kuxelela uMfundisi. Wothuka kakhulu naye uMfundisi ukuva into embi
ngolu hlobo ithethwa ngumama ohamba inkonzo ngomnye umama okwahamba inkonzo.
NgeCawa yangena inkonzo njengesiqhelo, indlu igcwele ime ngeembambo. Wangena uMamgobhozi
emva kwabo bonke abanye abantu ekekelise i-hat yakhe epinki enee-flower, echophise izihlangu,
etyityimba ukuhamba oku, amehlo abantu bonke ejonge kuye. Yaqhuba inkonzo.
Emva kwenkonzo uMfundisi wambiza umama uMadlamini kwanoMakhulu uMamgobhozi ecela
ukubabona. UMfundisi ubachazele bobabini ukuba ubabizela ntoni na; wabe ewuqonda umcimbi
uMakhulu uMamgobhozi ukuba ungaye.
Makhulu Mamgobhozi, ingaba injalo le nto ndiyive ngoMaDlamini? Ubuzile uMfundisi.
Wabila xhopho uMamGobhozi, wasula ubuso nge scarf sakhe: Ewe Mfundisi zikhona izinto
endizithethileyo ngoMaDlamini.
Ingaba ziyinyani ezo zinto?
Hayi Mfundisi andingetsho.
Ke uzithethele ntoni izinto ezimbi ngoluhlobo ngalomama usazi ukuba aziyonyani?
NguSathana, Mfundisi; ndenzwe nguSathana! Wantywizisa uMaMgobhozi esula iinyembezi.
Ndicela siphume phandle okwethutyana; ndilandeleni, utshilo uMfundisi ekhokhela ephethe
umqamelo. Kwakukho umoyana obandayo ovuthuzayo ngalo mini.
Uthe akufika ngaphandle komnyango wecawa uMfundisi wanikezela ngomqamelo kuMamgobhozi:
Ina ke Ma, khangela ezi ntsiba zikulo mqamelo uwuvuthulule!
Wawuthabatha umqamelo uMakhulu uMamgobhozi wawuvula, wawuqubuda, wazikhuphela iintsiba
waza umoya ovuthuzayo wazivunguza waziphephethela macala onke zee saa, ezinye zabheka
phezulu zaqabela iintango, zemka zaya kude.
Wathi uMfundisi: Makhulu Mamgobhozi, ngoku ndicela ukuba uzichola-chole iintsiba uzibuyisele
emqamelweni!
Wothuka uMaMgobhozi ubuso baluthuthu ukuba mhlophe oku. Hayi, Mfundisi, angekhe ndikwazi
ukuzibuyisa iintsiba ngokuba zivuthululwe ngumoya zemka.
Zinjalo ke ezi zinto zimbi kakhulu ozithethe ngalomama; angekhe uphinde uzibuyisele apho
beziphuma khona, zimke neendlebe zabantu. Utshilo uMfundisi.
Ndixolele Mfundisi! Ndixolele MaDlamini andisoze ndibe ndithethe kakubi ngabanye abantu! Walila
watsho uMakhulu uMamGobozi.
MAMPEHLE
Mzuvukile Manxiwa
Akwaba nathi
INkos ibinganathi
Sibenothando ngathi
Ngu-Unathi.
Olwakhe uthando
Alufuni ndondo
Lihamba ngomkhondo
Okwendlela yempuku.
Imbew oyiphiweyo
Uzunced uyihlwayele
Yoba sisibonelo
Esinentsingiselo.
Ndisabuza nanamhla
Bangaphi kulemihla
Abantliziyo inyulu
Ingenabo ubunzulu?
Umntu akunakh umgqiba
Uyabhida okwesiziba
Kodwa eyakh intliziyo
Indivezise amazinyo.
Ngelishwa k int entle
Yasuzelwa liqaqa
Ifana noqaqaqa
Egxojwa yinkunzana.
Asoze ndakulibala
Ngengqond uphangalala
Isandla sakho esihle
Sihlel entliziyweni.
KUNGCONO KWAFARO
Mzuvukile Manxiwa
Kuthi mandibelek abasicatyana,
Ikhaya ndilinikel umhlana,
Ntonj andinawo nasecepheni;
Lindithwaxile nenxele likaKhetsekile
Ndosinga ngaphi na?
Ndisuke ndadengeka,
Ndayindidi ndadideka,
Ndalahlekwa neyokuqala.
Aph ekhaya sifuyile,
Amasim achumile,
Nomhlab utyebile,
Kodwa thina silambile.
LiDib unobangela;
Nababehleli kulooMhlangano,
Mhla bapheka baqulunqa,
Indlel otyela sithebeni-sinye,
Esingavunanga nto kuyo.
Ndiyijolis aph imibombo?
Ndiy eMpum okany eNtshona?
Ukhon umsind ozayo,
Nozodal intshabalalo.
Badikwe yeyokosa -
Abantu akude kuse.
Kuhlala kusisankxwe
Iphango liyagqugqisa.
Luyathuku-thukuz uvukelwano.
Ikhukumel ingqumbo nomnyele.
Unoyikhomba nasemehlweni,
Unoyiva nasekuthetheni.
Buyez ubutyadidi begazi.
Buqandusel ubulwanyana.
Buphenjelelwa yintlupheko,
Esambathe ubomi bonke.
Govan wagwaz ekhaya;
Ngothumel uThab eNgilani,
Unethemb oba lichiza,
Suk ajik ayityhefu.
Uze nobuKhapitali,
Abufund aph ekuhambeni,
Obunqunqelegoqweni,
Ulunt olungathathi ntweni.
Bave bejweda kalusizi
Kungcono kwaFaro
Nok iphango belingenje,
Usenzile Demokhrasi.
HAYI LENTLIZIYO
Mzuvukile Manxiwa
Nceda Somandla
Ngawakho amandla
Usiqobel amandla
Alentliziy imandla
Inde ayipheli.
Inzulu ayaneli.
Sisizib icwengile,
Nox ikhohlakele.
Zingaph iintliziyo
Ebezinovuyo
Nothakazelelo
Wena wazophula?
Kowu! hay indoda.
Singayithini madoda?
Indoyisile mna ndedwa,
Ngentliziyo edalwe yodwa.
Yazi ndinixelele;
Le nto masiyixolele.
Onke ayafana
Ngumgub engxow enye
Ngath azalwa-
Ngumnt omnye
Ukufana ngentliziyo.
NOMAMPONDOMISE
Mzuvukile Manxiwa
Uyinyam esethanjeni
Ungumthomb ezindongeni
Uyintlak esexolweni
Ububusi obusemngxunyeni
Awungomazinyo kaKrebe
Ungaphethe nazinkempe
Unezinyw elimhlophe
Nay intliziyo imhlophe
Uyingom emnandi
Ngesicwengiley isandi
Kwiimpixano namadabi
Uthi gqi ngomlom omnandi
Unothando lwehobe
Ndikubhale nakwizihobe
Undinik ihlombe
Izandla ndizihlambe
Uyimbawula evuthayo
Isikhukukazi esikhathalayo
Isandla sasekunene
Esishushu nene-nhenhe.
Ukwasiso isabhokhwe
Esivuthulul ukhwekhwe
Kum uhlel entliziyweni
Kananjalo egileni.
ISIVATHO
Mbongisi Dyantyi
Ndiyazi utshatile,
Isidlakela sendoda,
Iyoyikeka inene.
Ndiyakuthanda.
Zivathe ke ngoko,
Ngamatye am,
La axabisekileyo,
Unxibe ke noko,
Uthando lwam nawe.
Mntwana,
Andizimisele mpoxweni,
Amasiko akho nezithethe zawo,
Zivathe kuphela,
Ngothando lwam nawe,
Zibone izinyanya zam,
Zindixolele ngokuvala isiqhamo sam;
Zibone izinyanya zakho,
Zamkele esakho nje ngesam.
Jonga ke, luvuyo lwam,
Khawambathe, uzivathe,
Ngothando lwam nawe.
UDLIWANO-NDLEBE NAMALUNGU E-PORT ELIZABETH OPERA HOUSE
KUQUKA UMPHATHI WEZIKO UMNUMZANA U-MONDE NGONYAMA NA-
MALUNGU E-PACEC
(PERFORMANCE ARTS COMPANY OF THE EASTERN CAPE)
I Opera House ngomnye weyona mithombo midala yeNkcubeko kwelilizwe. Kudala ke njengoko sisazi
ukuba imeko yayisenza kubekho abaxhamlayo kuyo nabo bangaxhamliyo ngenxa
yengcinezelo, ngoku izinto zitshintshile. I-Zizi, uMnu. Monde Ngonyama nguye oxhuzula imikhala, yaye
aliphali ihashe lakhe yehaa! Lizakutshona ke eli anamhlanje ilanga mlesi ufunda kanye ngalengqaka
yeNkcubeko ebizwa Port Elizabeth Opera House. Zisuka nje sifuna kuthetha ngomhlekazi apha ogama
lingu Thobela Fibi, kodwa oko sikwenza ngodliwano-ndlebe. Nalu.
KUDLIWANO NDLEBE NO-THOBELA FIBI
MN: Ungubani ke Bhutomkhulu?
TF: Ndingu Thobela Fibi, ndizalelwe eBhayi eNew Brighton
kwisitalato Mtiya. Ikhaya lam laziwa njengekhaya likaBishop Lulu Fibi, lo
waye phaya kwiCawa kaSigxabhayi, kwaTata. Mna ke ndingu Gaba, Noz-
inga, Cihoshe, Mntwomlambo! Apho sasisuke khona ke kuse Cumakala.
Ndizalwa nguMam uNoluthando Fibi, nongasekhoyo uTat uSiyo Fibi. Nd-
ingumntwana wabo wokuqala nowokugqibela, kodwa ke ibanzi i-family yam,
igcwele eliBhayi.
MN: Khawukhe utyatyadule ngemfundo yakho
kususelaebuntwaneni uze nganeno?
TF: Ndiqale eKama Lower Primary School, ndagqithela eJohnson
Marwanqa. Emva koko ndaya eMagxaki, ndafunda eSpencer Higher Pri-
mary School nase Sivuyiseni Higher Primary School. Amabanga aphezulu
ndawenza kwa-Magxaki High, ndawonye ke nase Lawson Brown High School.
MN: Ikho into elukhuthazo owayifundayo kwezi zikolo, nto leyo edibene enkcubeko?
TF: Ininzi kakhulu. Phofu inkcubeko (art) ndiyiqale eMarwanqa, ndizenzela. Kanti eSivuyiseni uMam
Pono ebesoloko esinceda esixhobisa kulenkcubeko ekubeni ethe waqaphela isakhono esinaso, indim
noAyanda Yani. Waye uMam Pono lo wasicela ukuba sithathe inxaxheba kwi Projekthi yenkcubeko
eyayibandakanya phantse zonke izikolo zeli Bhayi. Kwandivuyisa kakhulu oko kuba lena yayindlela evela
ngayo into yeArt. Ukanti ke eLawson Brown ndayixhamla nakubeni inkqubo yayingavumi kubekho
uthetha-thethwano, ndaza ndaqhubeka ne Art kakuhle ingakumbi ngelixesha lebanga leshumi. Emva
kwebanga leshumi ndiye eP.E. Technikon phofu andathathwa, ndathetha nomzali savumelana
ndayokwenza iAccounting eTechnikon South Africa. I-Art yayisoloko inkqonkqoza kum ngaphakathi.
Emveni koko ndaqalisa ukusebenza ngamandla ngomculo ndisiba ngumdlali-macwecwe (DJ)
obalaseleyo owaye saziwa njengo DJ FTL. Ukudlala amacwecwe ndakuyeka ngo 2000, ndahamba
ndayokwenza iMusic Production ndizifundisa ngemali yokudlala amacwecwe (DJ-eeing). Ndadibana
noAndile Benxa sasebenza kunye sathatha ubu-DJ sabufaka apha ekudidiyeleni/ekuveliseni umculo
(Music Production). Yona ke wandishiya elandela imicimbi yakhe ephathelene nezoshishino. Mna ke
ndisawuvelisa umculo yaye zininzi gqitha iAlbums endizididiyeleyo ngokufanayo neeSingles. Imveliso yam
yokuqala eyaphumelelayo yayiyi Album ye KMT 2005 eyayibizwa Asizongonwabi. Ngo-2006 ndakhupha
iSingle eyayikwindawo yokuqala kwi-Internet. Ngoku i-Crossover Album ekhutshwe ngo June ka2012
iqhuba kakuhle. Kanti kukho neAfro-Pop endiyenzileyo yaza yakhutshwa kwelamaJamani uyokutsho
kwelamaNgesi.
MN: Khawusichazele wenzani apha eOpera House? Sivile ukuba kuyavuywa genxa yegalelo onalo
apha.
TF: Ndiyi Music Producer. Kuyenzeka ukuba abathile baxakwe xa kufuneka bechaze intsingiselo ye-
ligama.
MN: Injalo kanye, khawutsho!
TF: Ngumntu ojongana ne-Creativity yeMusic Production. I-Music Producer ibanesakhono somculo.
Iyakwazi ukumamela. Mandithi ikwanesiphiwo sokumamela, ze yazi umculo ofunwa ngabantu. Ngenxa
yeTechnology wonke umntu uyakwazi ukuthi uyi-Producer. Kudala eStudio bekubakho iindidi ezimbini
zabadidileyo/abavelisi bomculo: (1) Technical Music Producer, kunye, (2) Nalowo ungumqambi kodwa
ekwangumvelisi. Lowokuqala uyashicilela, afake intwana- ntwana ze umculo ubenencasa, umameleke,
uvakale ubenesandi esisiso. Owesibini yena uyekela kulo wokuqala ze amamele undonakele, alungise
apho.
MN: Owu! hayi kwatsho kwathi qwenge! Yima keBhuti, uqale nini ukuba yi-Music producer apha
eOpera House?
TF: Ndiqale kulonyaka ka-2013, ngoJanyuwari.
MN: Ngaphambi kokuba ufike apha eOpera House, ingaba ibikhona iMusic Producer?
TF: Ndingumqali wezinto. Ndiyeyokuqala iMusic Producer apha eBhayi. Yaye ndiyanzingca ngaloo
nto. Ndineqhayiya kunjalo nje.
MN: Ithetha ntoni yonke le nto kuwe?
TF: Umculo bubomi kum. Ndayeka nomsebenzi ngenxa yomculo,bubomi bam iintsuku zonke. Naxa
ndisendlini ndisoloko ndisenza into edibene nomculo. Yintsikelelo yokwenene kum nakubeni omnye
umntu engenakuqonda loo nto. Ngumsebenzi endiwuphiweyo nomfezekisi wephupha lam ekubeni
kakade ndingakhange ndiyeke. Okokoko bendiphilela umculo. Ndiphila wona ke nangoku.
MN: Ikho imiceli-mngeni oye wadibana nayo?
TF: Ikho imiceli mngeni mininzi. Maxa wambi abantu baye bangathembi nto kwinto oza nayo.
Ndakhe ndathezwa amandla kukuswelekelwa ngabantu endandisebenza nabo emculweni. Loo nto
yokufa yenza kwakubi ke mpela, abantu besithi andiyi ndawo, namalinge am akazokuphumelela.
Kodwa ke ndazixelela ukuba ubunzima buyakundakha. Ndilapha ke ngoku. Enye into bekusithiwa
iBhayi yindawo etyhafisayo, konke esikwenzayo kufana nomlilo wamaphepha. Kodwa phantsi kwazo
zonke ezoo ntetho ndanyamezela.
MN: Uthando lwakho lomculo lusukele phi?
TF: Ifuthe lawo lasuka kumama owayethanda oo-Barry White, Randy Crawford, mna ke ndithanda
oo-Teddy Riley, Blackstreet, njalo-njalo. Kanti apha eMzantsi ndandithanda uCaiphus Semenya no Letta
Mbuli kakhulu. Ndandichukunyiswa sisingqi kanti nomyalezo okwiingoma zabo.
MN: Unokusichazela ngawe ne Opera House ?
TF: Kuninzi kakhulu okuzayo apha eOpera House, okunomdla. Hlalani
nimamele,nijongile,ningaphoswa! Kuza kusetyenzwa. Ninganyebelezeli, kuza kudlalwa!
KUDLIWANO NDLEBE
NO-PEGGY CALATA
U-PEGGY CALATA nguye ojongene nemiba ephathelene nabahlali, namaphulo okuphuhlisa
inkcubeko, ngamafutshane ngalamakhumsha uPeggy usebenza njenge Community Liason &
Outreach Manager yase Opera house. U-Sisi ke yinzalelwane yase-Cradock, kulapho akhule
wafunda khona. Kudala ke u-Sisi wabayi Artist, intsapho yakowabo nayo inemvelaphi yenkcubeko.
Ngokomzekelo uyise wayene-piano engumqambi, eyimvumi, ebhala amabali ze awalinganise.
Lilonke uPeggy uyincanc ebeleni inkcubeko, akayiqoboli, okokoko ubomi bakhe bujikelezwe
yinkcubeko. Yena ufundele ubutitshala kodwa nabo bagqunyelelwa luthando lwakhe lwenkcubeko.
U-Sis Peggy ulihambile mpela ke elimiweyo injongo ikukuphuhlisa ulwazi ngenkcubeko, ze
aludlulisele kwabo bezwe lakhe banxaniweyo apha elwazini. Selevela e-Ireland ukuya kubafundisa
ngenkcubeko namasiko aseMpuma-Koloni. Sevela kuhlala kwi-ECPACC (Eastern Cape
Provincial Arts and Culture Council), iziko elidume ngokunceda abo banesakhono kwinkcubeko
yalapha kuphondo lweMpuma Koloni. Selevela eSingapore,
injongo nalapho ikukufunxa nokugcwalisa uvimba
lwenkcubeko ze xa ebuya aphakele nathi basafun ukuntinga
kulenkcubeko. Ngo 2008 ebekhe waseNgilani kwinto ebizwa
Swallow Partners, apho babentshintshiselana ngeentaka
kwangaxeshanye bephefumlelana kwangale nkcubeko.
Ngenene nangenyaniso uSis Peggy lo akasosaqhaga,
uyintsengwanekazi. Kanti ke eyona mpumelelo
kwelilonjikazi lenkcubeko ibe kukuthatha abalinganisi,
abaqambi, iimvumi ezilulutsha 27 yonke abase
eNgilani, nokuze izizwe zibone oko ikuko iSouth
Africa, ingakumbi iMpuma Koloni. Ukhumbule ke
mlesi ukuba u 2010 ngunyaka ongasoze
ulibaleke kwimbali yoMzantsi Afrika ngenxa
yemidlalo yeNdebe yeHlabathi kwibhola
ekhatywayo. Le migudu ka Sis Peggy
yenza ihlabathi latsho lanenkcasa
yoMzantsi Afrika. Uyayazi enye into
emangalisayo ngalo mzukulwana
kaTamkhul uCalata yintoni? Unyana wakhe yena kuqala uyi Artist, liqhawe neqhayiya lokwenene
elenza Ibanga leshumi eAlexander Road High School eBhayi. Yaye uphopho lo esemncinci kudala
wazibandakanya nenkcubeko, ngoku ungumakhwekhwetha. Uzakuthini xa unina inguSis Peggy,
umzali onobubele nonomdla wokuba abantwana base Mzatsi Afrika baphuhlise izakhono zabo, nto
leyo eza kubanceda kwikamva?. Qho ngeMigqibelo uSis Peggy uqala ngeyethoba kusasa
ukuyokutsho ngo 12 emin emaqanda kwiphulo eOpera House elibizwa Drama Drama. Apho
abantwana bayaqeqeshwa beqeqeshelwa ukulinganisa (Performance). Esisikolo noluqeqesho
luqale ngo 2009, yaye iziphumo zalo zintle kakuhle. Usis Peggy, bazali nani bootitshala uthi
sanukulibazisa, xhasani abantwana benu ngoku balibhongo neqhayiya lenu. Kwakhona uSis Peggy
neqela lakhe abaphumlanga bayasebenza. Kukho i-Forum ebizwa LACE (Language, Arts and
Culture Education) bakunye ke neNMMU bancedisa ootitshala benkcubeko (Art) ukuze bancede
kakuhle abafundi kwizikolo zabo. Ivuth amalangatye le LACE kuba ootitshala bayayithanda kuba
incedisana kakhulu nezinto ezifundwayo kwangabantwana babo. Kuqokelelwa incwadi mhlawumbi
ii-novel ne-drama, ze ilinganiswe ngokucokisekileyo, icace, kube lula naxa iphuma ephepheni. Hayi
Sis Peggy neOpera House sinincamile! Nangamso!
UMadoda Ndlakuse uncokola namalungu e-PACEC
(Performing Arts Company of the Eastern Cape):
uXabiso Zweni waseBhayi, Xolisa Ngubelanga waseNgqushwa, Nomfundo Mgoqi
wase-Adelaide, Nobesuthu Rayi waseBhayi, Olwethu Mdala wakuTsomo, no-Jocelyn
Scholtz waseBhayi
I-Opera House ilukhathalele ulutsha. Akhonto ibuhlungu njengoba ulutsha enoba
lunesakhono, mhlawumbi ngamanye amaxesha lungenaso eso sakhono, kodwa ufike
ulibone luhamba lucela i-20 cents kwiikona zesitrato. Ufike luphaka inkunzi, lithubulezisa
okanye lisebenzisa iziyobisi. Akhonto ibuhlungu nelusizi njengokubona umntu omtsha
onesakhono edlala ngaso engasikhathalelanga, okanye akhule ze asweleke eyimpula
kaLujaca. Nalapha iOpera House iveze iyeza. Bane PACEC (Performing Arts Company of
the Eastern Cape). I-PACEC le iqale ngo-Agasti 2012. Injongo? Kukuphuhlisa lenkcubeko
nakwiqonga ingakumbi eMpuma Koloni. Masikhe sidlane indlebe nalamajoni namaqhawe
esizwe akwa-PACEC.
UMADODA NDLAKUSE
UNCOKOLA
NO-NOMFUNDO MGOQI
wafumana lamanqaku
MN: Yaqala nini yonke lento, uthando lwakho
lomdlalo weqonga?
NM: Ndingathi ndandisekumabanga aphakathi.
Abathandi bomdaniso badibana nabeDrama,
emva koko ndaqonda ukuba apha kulapho ndimele
kubakhona.
MN: Ikho imiceli mngeni owadibana nayo?
NMI: Hayi wethu, mna bendisoloko ndixhaswa
yintsapho yasekhaya nabahlobo bam.
Babesoloko bekho ecaleni kwam, yaye bendinika
inkxaso kanye xa ndiyifunayo.
MN: Yintoni egqamileyo okhe wayinxalenye
yayo kwi PACEC?
NM: Kukusebenza nabantu abanamva
abakhutheleyo, abaluncedo. Indlela zabo
ezahlukileyo zokubhala zindincedile. Umzekelo
kukuba mna ndiqhele ukubhala i-Monologues,
kodwa ngoku ndikulungele ukubhala nantoni na
ngenxa yabo.
UMADODA NDLAKUSE UNCOKOLA NO-OLWETHU
MDALA wafumana lamanqaku
MN: Kuthetha ntoni kuwe ukukhokela i-PACEC?
OM: Ithetha ukuba noxanduva olokhulu ingakumbi kwimiba ephathelene nezigqibo emazithathwe,
ukukhokela, ukuyalela abantu, nokukhumbuza abalingane noogxa bam ngezinto ezimele zenziwe.
MN: Ingaba uziva ukhula njengoko ukwesi sigxina?
OM: Ewe bhuti, ukukhula kukhona kuba andijonganga kuphela isiqu sam, kodwa ndijongene ne
PACEC xa iyonke.
MN: Yaqala nini yonke le nto yeqonga kuwe?
OM: Ndisekumabanga aphantsi sasidibana ngokwamaqela ngamaqela, abanye bedanisa, abanye
bebhala iingoma, phofu singena nkokheli namntu usicebesiyo ngale nto siyenzayo. Sasikholisa
ukuhambela iikonsathi, imidaniso, kwanezinye nje iindawo zolonwabo nenkcubeko.
MN: Wazibhaqa njani ukuba inkcubeko neqonga likhondo lakho?
OM: Ndaziqonda ngexesha endathi ndamkelwa eStage World Theatre ndineminyaka eli 19 kuphela.
MN: Yintoni eyayikuvuyisa ngaphambi kokuba kubekho iPACEC?
OM: Ukuphumelela kukhuphiswa luka 2011 apha eOpera House njengoyena mlinganisi okanye mdlali
ubhinqileyo ubalaseleyo (Best Actress). Kanti ndachongwa nakwiZabalaza Theatre Festival ngoMatshi ka
2012 njengoyena mlinganisi ubalaseleyo (Best Actress).
MN: Kanti ngoxa ukwi PACEC?
OM: Zimonologues ezi-2, ethi On 1st Gear, neyesibini ethi On 2nd Gear. Yho! hayi kuyahanjwa
apho, ubuchule bungaphaya!
MN: Wena ujonga kubani umzekelo?
OM: KuMam uNomhle Nkonyeni. Nguye ondiphilisayo nendifunda kuye ngamandla ngalo msebenzi
wokudlala eqongeni.
UMADODA NDLAKUSE UNCOKOLA NO-XABISO ZWENI
wafumana lamanqaku
MN: Ungubani uXabiso Zweni?
XZ: NguMphankomo, Ngwanya, Qengeba, ezalwa nguMamNgwevu, uMhlatyana, uSkhoma,
ezalelwa eSomerset East kwaNojoli, pha kwiminyaka ye 80s.
MN: UXabiso udibene njani nenkcubeko?
XZ: Ndibene nayo ndifunda ibanga lesixhenxe. Ngeelo xesha sasisenza umdlalo weqonga, phofu
ndingenelela kuba kuduke omnye umdlali, kwafakwa mna ke ukuba ndingene ndidlale. Kuba ke
kwangendalo nje le yam ndiliyolisa, iqhula, nesiqhwaga esithanda ukuthetha, ndachongwa
ekugqibeleni ukuba ndibe yinxalenye yaloo mdlalo. Andisasikhumbuli isihloko sawo, kodwa
sasimnandi. Emva koko ndalandelisa ngemidlalo yeqonga esikolweni xa kwakubanjwa iminyhadala
yeqonga. Ndandisoloko ndikufutshane ukuze ndithabathe inxaxheba nakweminye imidlalo evelayo.
MN: Kuthetha ntoni ukuba lilungu le PACEC?
XZ: Kuthetha ukuba ndiza kuvela kwizinto ezininzi apha kwinkcubeko yase Mpuma-Koloni. Ndiza
kudlala kwiindawo ezininzi zephondo, kukhule kuqaqambe isakhono sam. Sosebenza nomntu wonke
sincede abanye baphuhlise izakhono zabo.
MN: Ukuba onke amaphondo aseMzantsi Afrika ebenombutho onjenge PACEC ngezinjani iimeko?
XZ: Imeko ngeziphucukile, indlala ngeyingekho nkulu kwi-Artists. Ngeyinqabile into yokuba kuthiwe
iArtist ifa ingenamali, yaye oko kungathetha imanyano.
MN: Ubomi bakho ngaphandle kwe PACEC ngebunjani?
XZ: Ngebume ndaweni-nye. Nditsho ukuthi mhlawumbi ngendingena bomi, ndizinze bhunxe
okwelovane emthini, ndingashukumi nakancinci ukuya phambili, ndingena kamva.
MN: Ukhumbula ntoni egqamileyo ngaphambi kwe PACEC?
XZ: Kum kuqaqamba I Showtime Awards ngo 2006. Ndachongwa njenge Most promising Junior
Performer kwalapha eOpera House. Ngo 2008 ndayi Best Supporting Actor kwi ACT PlayCompetition.
Kanti ngo2010 ndayi Best Actor kwi ACT Play Competition.
MN: Ngubani ojonga kuye umzekelo mbomi?
XZ: Ngubawo uJohn Kani. Kanti nosewadlulayo utat uGibson Kente.
UMADODA NDLAKUSE UNCOKOLA NO-XOLISA NGUBELANGA
wafumana lamanqaku
MN: Ngubani uXolisa Ngubelanga?
XN: Ndingu Zengele, Nxasana, Minyela, Sotywala, uMvelase owawela umfula ungawelwa uwelwa
ziinkojane kuphela. Ndingowase Ngqushwa eCisirha, kodwa ke sizinze kwaTyhefu.
MN: Siyazi ukuba kudala ulapha kwezo qonga. Wakhuthazwa yintoni?
XN: Yho! Bhuti wam, intsusa inde. UTanci wam wayeyimbongi, edlala, etyityimba. Ngelishwa lakhe
wathanda kakhulu iziselo ezibandayo, ibhotile ukutsho ke. Wasela. Izinto zatshintsha kuye emva koko.
Ndakhuthazwa nayingqeqesho yasekhaya, yandigcina ndingaphazanyiswa zizinto zaphandle.
MN: Sesiphi isakhono onaso?
XN: Yhu! kukulinganisa, kukubhala, kukunikezela umkhomba-ndlela ngokwaseqongeni (Director).
Ngaphambi kwe PACEC bendiyi Artist ephila ubomi bokuba nesakhono njengayo nayiphina i-Artist.
Umahluko ngoku kukuba ngemisebenzi noko iinto ziya caca.
MN: Xa kuvela igama elithi PACEC yintoni ethi qatha engqondweni yakho?
XN: YiMpuma Koloni, ubugcisa kwakunye nenkcubeko yayo.
MN: Ungazichaza njani wena?
XN: Ndilinxila leQonga.
MN: Utsho ukuthini?
XN: Xa unxaniwe ubawela ngokunyamezelekiyo ukufumana ibhotile khe uyisele. Gqiba nje kwakho
ukuyitya le bhotile ... isimanga sento ... ubawela enye! Ulale. Uphinde ufumane enye. Lilonke andizoli,
andonwabi xa imidlalo yeqonga indinqabele enokuthi ndithabathe inxaxheba kuyo. Hleli nje ngamaxesh
anjalo okoma ndiyabheka-bheka, ndifun intw eselwayo, ndifun iqonga - ndifun ukuthob unxano lwam
ngokudlala eqongeni. Ndilinxila ngokwenene eqongeni.
MN: Apha kwi PACEC ngubani okukhuthazayo?
XN: Ndingathi nguNomfundo Mgoqi. USisi lona uyasonwabisa ngamandla, sitsho sisebenze kamnandi.
UMADODA NDLAKUSE UNCOKOLA NO-JOCELYN SCHOLTZ
wafumana lamanqaku
MN: Ngubani uJocelyn Scholtz?
JS: Ndazalwa ndakhulela apha eBhayi. Esikolweni ndiye ndaqeqeshelwa ukudlala eqongeni, kumculo
weqonga (Musical Theatre), kanti ndonwatyiswa kakhulu kukuhombela ndihambele imidlalo yeqonga,
ngakumbi enemiboniso nemidlalo yengoma eqongeni (Musical Theatre).
MN: Yintoni ekuvuselelayo koluthando lwakho lweqonga, ikukhuthaze ukuba uqhubele phambili?
JS: Kunzima kum ukwalatha isizathu esinye ndithi yile nto le endomelezayo kulo msebenzi. Suka nje
ndithi umsebenzi weqonga yinto endiyithandayo nengundofanaye wam.
MN: Abantu abakwaziyo, abazali, izihlobo, izizalwane, njalo-njalo, bathini ngokuzibandakanya kwakho
namaphulo kwinkcubeko, ngakumbi xana sithi siqwalasele ukungamkelwa ncam kakuhle kwenkcubeko
ngabantu jikelele?
JS: Owu! Ngomnye umbandela lowo. Kodwa ke ndiyazama ukubafundisa abantu ngeqonga
nokubaluleka kwalo msebenzi siwenzayo. Kunzima kodwa kuba uninzi lwabantu njengoko nawe usitsho
imidlalo yeqonga abayinanzanga, bengayiboni njengeminye yemisebenzi ephucukileyo okanye esemgan-
gathweni. Zintsha ezizinto kubantu bethu.
MN: I-PACEC ithetha ukuthini kuwe njengomdlali weqonga oselula?
JS: Kum Bhuti i-PACEC ayingomsebenzi nje kuphela. Bubom kuthi obu.
MN: Ucinga ukuba iOpera House isebenza ngokwaneleyo ukuxhasa abadlali beqonga?
JS: Ewe nje! Sesona sizathu silapha. I-Opera House isithathe yasibeka kumanqwanqwa aphezulu
ngeliphulo ize nalo. Isiqokelele, yasisondeza. Ngoku kubuyela endaweni isidima sabadlali beqonga
nesenkcubeko. Sibulela kakhulu ngelinyathelo likhulu kangaka leOpera House.
MN: Ingaba iphondo liyaziva izingqi zenu njengePACEC?
JS: Ndifuna ukukungqina oko, izingqi zePACEC ziyavakala. Sibatsha, siza nento entsha, sinodlamko
lomoya omtsha, wabantu abasebatsha nabakhulayo, abenethemba ngengomso labo. Bazakusazi bonke
nabangakava nto ngathi. Sesifikile siyiPACEC.
MN: Ngobani ii-role models zakho apha eqongeni?
JS: Ngaphandle kwentandabuzo ngu-Marlen Peterse. Yimbava yam leyo.
UMADODA NDLAKUSE UNCOKOLA NO-NOBESUTHU RAYI
wafumana lamanqaku
MN: Ngubani uSisi lo, uNobesuthu Rayi?
NR: Ndingu Nobesuthu Rayi, uMaduna, Juyane, Msuthu wakwaMagxaki, apha eBhayi. Ndizalelw aph
eBhayi.
MN: Udibene nini neArt?
NR: Ndidibenene nayo ndisafunda ibanga lokuqala phantsi kukaTishala uZulaeSivuyiseni Intermediate
School.
MN: Ithetha ntoni iPACEC kuwe?
NR: Kum i-PACEC bubuso obutsha. Ewe, ngoba kaloku phambi kwethu kwakukho ooMam Hlehle
(Nomhle Nkonyeni), ooTat Winston Ntshona, ooTat John Kani, babezi Serpent Players. Emva kwabo
kwathi akwavakala nto. Ngoku kukho thina yaye silandela besaphila.
MN: Kwi PACEC niyahlonelana, ninothando yaye nithandana ngathi niyintsapho enye, yintoni imfihlo?
Khawutsho.
NR: Akho mfihlo wethu. Xa ungumdlali weqonga awufani nabanye abantu noba umdala kangakanani,
kodwa ubuntwana bakho busoloko buphambili. Sonwabile kakhulu.
MN: Akho amaphuphu onawo nge PACEC nekamva?
NR: Iphupha lethu lokuqala kukwaziwa yiMpuma Koloni iphelele. Sifuna ukuyilwela kakuhle ekubeni
sineligama layo silithweleyo, sandule ke ngoko ukuphumela kuMzantsi Afrika uphela.
MN: Kulo nyaka nijonge phi?
NR: Kulo nyaka sifuna ukuzi bethelela njenge PACEC kule nyhweba yokuthatha inxaxheba kwi AFCON.
Sijonge ukusa imidlalo yeqonga emibini eRhini kumnyhadala kaZwelonke weNkcubeko. Amazwana nje
okuvalelisa, ukusukela ngoku ukubheka phambili siza kwaziwa kakhulu. Inani liza kwenyuka ngenxa
yeKOTAZ. Ithethe ukuthi loo nto neeShows zethu ezilandelayo umgangatho uza kwenyuka. Yaye siyicela
ngamandl egeza inkxaso.
UMADODA NDLAKUSE UNCOKOLA NO-MONDE NGONYAMA
Ngoku eli lithuba lelokuba iBhayi liphela, iMpuma Koloni iphela nditsho nkqu uMzantsi Afrika uzivele
ingqumbululu yodliwano-ndlebe phakathi kwam kunye no-Mhlekazi obekekileyo uMonde Ngonyama, yena
yedwa onguMphathi-Jikelele we-Opera House. Masigawule siwarhuqa nto zakuthi kukude kakhulu apho
siya khona nale nkcubeko.
MADODA NDLAKUSE: Mhlekazi ungakhe usichazele ukuba ungubani?
MONDE NGONYAMA: Mna ndinguMonde Ngonyama. Ndizalelwe eKirkwood, ndakhulela eTinarha.
Ukanti ke ndifunde e-D.S. Bethani ngoku ebizwa i-Moses Mabhida High School.
MADODA NDLAKUSE: Uqale nini ukudibana nezeQonga okanye masithi inkcubeko?
MONDE NGONYAMA: Ndiqale e-D.S. Bethani ndisafunda ngelo xesha ibanga lesibhozo yaye
kwangalo nyaka ndabhala umdlalo wam wokuqala othi Xola.
MADODA NDLAKUSE: Sive ngeempukane eziluhlaza ukuba ukwangutitshala. Ungasichazela
ngendima edlalwa ngutitshala ukuze kuphucuke izinga le nkcubeko kwelilizwe?
MONDE NGONYAMA: Ndingutishala mfondini, andizisoli ngoko ngumyolelo ka tatomkhulu wam
lowo, owathi abona bantu abaye badlala indima ebonakalayo nabaye banefuthe kumzabalazo wenkululeko
ngootitshala, esitsho esithi nkqu nasebefundisini ukho umahluko phakathi komfundisi oqale wangutishala
kuqala, ze wangumfundisi. Akafani tu nalowo uvele wangumfundisi. Ekubeni kukho intetho endala ethi
Akunakukhonza nkosi zimbini ndabona ukuba mandibhenele kwelicala le Art ukuze ndingamoshi ikamva
lomntwana omnyama ngokumana ndingabikho esikolweni ngenxa yee ntlanganiso nee nkomfa kunye nabo
basebenza kwisebe lenkcubeko namasiko.
MADODA NDLAKUSE: Mhlekazi, siva nento yokuba nguwe uMphathi-Jikelele walomzi-mkhulu
nohlonitshwayo nodumileyo nonembali i-Opera House. Kuqala makhe sibuze senjenje: yabakho nini
i-Opera House?
MONDE NGONYAMA: Ezintshukumo zokuba ibekho zaye zaqala ngabo 1820, 1830 ngela
xesha abantu abamhlophe babegushuza besenza amalinge okuba lo mzi ume. Kodwa ubukho bawo umzi
lo wabakho ngowe 1892. Ngoku lo mzi ungqiba iminyaka eli 120. Siza kuyenza imibhoyozo yoko kulo
nyaka. I-Opera House le yavulwa ngokusesikweni nge 1 kweyoMnga kunyaka u 1892.
MADODA NDLAKUSE: Wena ngaphambi kokuba ibe nguwe oshay isigingci apha yintoni
obuyithanda nge Opera House?
MONDE NGONYAMA: Xeshikweni okaMandela noogxa bakhe beseka uMkhonto weSizwe
wayevakalelwa kukuba idabi bangalilwa bengakhange babe baye elibhacweni. Yayiyingcinga nje leyo.
Ndizama ukuthi iinzame zakho ungaziphumeza xa unokuyicokisa injongo yakho. Mna ke ndaye ndazibona
ukuba ndiyakuthanda ukubhala, ndiyabuthanda ubuzwe yaye ndiyabuthethelela sele buphanza. Apha
ekubhaleni ndithanda ukubhala ngathi nangezinto ezayamene nathi, kodwa ndibhala nje ngolwam uhlobo.
Ubukho bemizi enjenge Opera House buluncendo ukuze ababhali bakhululeke babe nempumelelo. Mna
ndiqale ukudibana ne Opera House ngo 2011, ngeloo xesha ndisebenza kwa ECPACC. I-ECPACC
ndayicela ukuba indizise apha e-Opera House ukuze ibe nalo ilungu elimela abantu njengelungu leqoqo
eliphetheyo.
MADODA NDLAKUSE: Njegokuba ngoku inguwe oqwalasela izinto lukhona utshintsho olwenzileyo
ukuze iOpera House ibe luncedo kweze nkcubeko?
MONDE NGONYAMA: Ukususela ngoJuni ka 2012 ziyi-24 izinto endizenzileyo. Eyokuqala ndiseke
inkampani ye Art kwicandelo le theatre ebizwa PACEC. Eyesibini - ibekukunxulumanisa lo mzi nabantu,
ukuqala apha ekuhlaleni ukuya kuzwelonke. Ndaqesha uMdidiyeli/uMvelisi woMculo (Music Producer)
ukuze ajongane nomculo nje wodwa. Ndasekela iFestivals ekuthwa liPhulo Drama Festival, neNgoma
Music Festival. Yaye azigqibelisanga kulo nyaka ziza kuqhubeka zikho, futhi zisonwabisa unyaka nonyaka.
I-Shukuma Dance & Drama Festival iye yaphuhliswa apha ekhaya. Xa ndicinga nge PACEC ndiba nento
ethi asoze sikhule ukuba asinakubana badlali beqonga abaphila ngalo, ngamany amazwi
abasebenza barhole ngalo. Okwesibini soze isidima sibe khona xa wonke umntu wenkcubeko
engumngqibi: Isidima somntu ziintsiba zakhe. I-PACEC iyaphangela ngesakhono sayo. I-PACEC izakuba
ngumtshayelo wegqwirha ozakusisa phambili. Sithetha nje iDirectors ezaziwayo nezingoma kad enetha
kuzwelonke xa kufikelwa kumba weqonga nemveliso zixakekile zixutha-xuthana ngePACEC, zifuna
ukusebenza nayo. OoNomhle Nkoyeni no John Kani abalandelayo baza kuphuma kule PACEC. Lona
iphulo belikade liyi-One Act Play yaye ingqalelo ibinikwa lowo uphumeleleyo, ndaza mna ndeza nelokuba
makubekho ababhali abangakumbi, abavelisi ngabavelisi benkqubo/abadidiyeli bazo abaza kuza
nomsebenzi wabo omtsha, uze omdala uphuhliswe. IPhulo linyathelo lokuqala elisisa ku Mnyhadala
weNkcubeko kaZwelonke eRhini, yaye sithetha into enye noMaspala kulomba wephulo. Lilonke iPhulo
lenza oompondo zihlanjiwe. I-Shukuma yona izakusebenza ngamandla isiphathele nolwazi lwethu kwabo
basemaphandleni. Xa usitya isonka akho nto intle nencomekayo njengokuba uqhekezele nommelwane.
I-Shukuma ke inikela ingqalelo kwabo bakwiziphaluka nasemaphandleni. Ngeba besinqwenela ulutsha
kanye olu lungekho zikolweni, kodwa ke ngelishwa inkoliso yabantu abatsha ayidibani nenkcubeko. Ngoko
ke asicaluli. Sijonga abafundayo nabangafundiyo abanomdla we nkcubeko. I-Shukuma lilonke yeyophuhliso
(development). Ukhumbule kanti uDaba lona luseza ingakumbi kumcimbi wemixhentso (Dance). Kwakut-
shona ilanga ndiphawula ndikhankanya izinto ezityisa abathandi benkcubeko ezityalwe apha ekhaya.
MADODA NDLAKUSE: Xa kuthethwa nge Opera House yintoni abantu abamele bayikhumbule?
MONDE NGONYAMA: Umzuzu womlingo (Magic moments on stage). Ngeba sifuna ukuba amabali
angalibaleki, abe ngawenene, aze achukumise imvakalelo zabantu.
MADODA NDLAKUSE: Mhlekazi thetha inyani, ngale xesha wawuseyi dyongwana wawucinga ukuba
uyakube usenza ntoni ebudaleni? Babenyeke ntoni kuwe abazali?
MONDE NGONYAMA: Ndadicinga ukuba ndizakube ndisenza into entle noba yenjani na. Azange
ndifune ukuba ngugqirha ekubeni ndingadibani ncam negazi. Ndandisoloko ndifuna ukwenza into
endandiza kuzidla ze ndibe neqhayiya ngayo. Umama wayefuna ndibe liqwetha kanti utamkhulu wayefuna
ukuba ndibe ngutishala. Ndamamela ndalithatha icebo lalo mdala.
MADODA NDLAKUSE: Yintoni le ikwenze iArt wasoloko uzi bandakanya nayo unceda uluntu kuyo?
Yintoni eya kuqhabayo uzo kuthi ga ngoku?
MONDE NGONYAMA: Ndincedwe kukufunda iincwadi. Bendiye ndifunde iincwadi kanye ezi abanye
bangazifundanga ze ndibalalise ngazo. Ethubeni ngoku ndavela ndathanda ukubalisa kwakhula isiphiwo
sam sokubalisa. Kukho umfo owakhe wathi kum xa ndibalisa mandicinge ngalo mthetho we science othi
For every action there is an equal but opposite reaction. Le nto umntu ayiqhelileyo uyichaze ngenye
indlela. Ndandisenza kanye loo nto yaye abantu babevakalelwa kamnandi gqitha bathi bokugqiba bacinge
nzulu.
MADODA NDLAKUSE: Ikhona imiceli-mngeni okanye amagingxingingxi othe wadibana nayo
ebomini?
MONDE NGONYAMA: Mininzi kakhulu. (A) Uxanduva lokuqala kukucenga abantu babe nokholo
kwimisebenzi yethu. (B) Kukucenga iArtists zixhase imisebenzi yezinye iArtists. (C) Kukubacela abepolitiko
ukuba baxhase inkcubeko, hayi ukuba bayidelele.
MADODA NDLAKUSE: Uvakelelwa njani ngobuhlobo obukhoyo phakathi kwe Kotaz ne Opera
House?
MONDE NGONYAMA: IKotaz yenye yeminxeba ebalulekileyo nendizimisele ukuyixhasa kangangoko
ndinakho njengo Mphathi wase Opera House, ize ifikelele kwinqanaba lokuba yamkelwe ngabanthu beli
phondo. Bamele bazi ukuba iKotaz ngumnxeba wemibono nezimvo zabo kwezenkcubeko kweliphondo.
IPOLTIKI NMHA
INTLUTHA
YONA
MASIYINCAME
Mpumi Cilibe
Ipolitiki namhla
Ngumhlaba wamaqaba
Sonke torho siyakwazi oko
Ungangena apho
Yazi mhlophe ulahla
Ubomi bakho
Lona luzakuswela usapho
Ngumhlaba wamanyoluka
Angenamdla kwezesikolo
Isininzi sabo siqhutya yindlala
Yiyani esikolweni maqhawe
Iselithuba ungafunda nawe
Aliphucuki ilizwe lilawulwa liqaba.
UMNTU
Mpumi Cilibe
Umntu ufana nqwa nofudo
Kon esikubonayo ngaye luphahla
Ubu yena bakhe ubungcwabile
Uveza izinyo ange uyahleka
Kanti ngaphakathi ububuhlungu benyoka
Uthetha naye ukhuphele wophele
Aze yena asale enqwala
Ange uyavumelana nawe.
ZAKUFIKA INGCINGA
Mpumi Cilibe
Ngenene ezi ngcinga
Zindifaka engxakinikazi
Andiphindi ndibuthi rhwe zakufika
Zihlasela zingatsho ukujika
Nditsho ndiphakame ndiphuthum usiba
Maxa wumbi zindiphathel iintshaba
Kanti andinqweni ukuzenz izothe.
Mpumi Cilibe
Masilibaleni ngomhlaba wethu
Masilibale ngelizwe lethu
Sithengisene sithengisiwe
Oo-Anglo bazithengile iinkokheli zethu
Intlutha yona masiyincame
Ayidla mpela impahla amadlagusha
Asifudusa ngemipu emihlabeni yethu
Namhla siyi loo mipha ichutywe
Yalahlwa, iimpula zikaLujaca
Bamdudula kakubi uNgqika
Phezu kwe Nxuba bawohlutha
Nalowo umhlaba, kanti namhla
Besiba sikhululekile nje kaloku
Sakuthethana notshaba malunga
Nembuyekezo, zibuyiselwe kuKesare
Ezakhe ukuze kulawule uxolo
Kodwa ngoku sibona bemumatha bodwa
Aba singa-nkokheli belizwe lethu
Wahlawuliswa iwaka lonke leenkomo
UNgqika ngaloo mini ziimantyi zakwamLungu
Wakha wayiva phi inkundla egweba
Ngoloo hlobo; anisaboni ukuba kukungcola
Oko okusafun ukulungiswa nanamhla?
Vumani bantu, sithengisiwe sithengisene!
Zimkil iinkomo magwalandini!
ITSILI
Douglas Ntuli
Kwisithili saseFolfanteni, kwifamakazi yomlungu owayengqwabalala kubasebenzi bakhe kumi intaphane
yemizi yabasebenzi abasebenzela lomlungu uNgwamza, abanye bathi Gwagwazwa. IBhulu eli lalingena-
sisini komdala nomncinci osebenza kuye, ukufa kuye sisipantowu, imvubu emagxeni, ezimbanjeni,
ingakumbi ongaphangelanga, egula engaguli.
Kude kufuphi apha singabalula umzi waseMajwarheni, eMatshezini, naseMakwayini. Kanye kusemva
kokuphela kwexesha lesivuno setshikiri, amadoda nabafazi bangoongqikane, akukho nto yakwenza,
nemalana ebisetyenzelwe torhwana iphelile.
Kungentsasa yehlobo, into kaQaqa noDongwe zibize izinja zazo zijongisa kwahlathi-khulu, zisiya kuzingela.
Kodwa ke le mini zange ifane nezinye, amadodana abuye nembande yesikhova. Yayisuka idubuleke im-
punzi etyholweni izishiya izibhulela isaka izinja.
Ufaf olude into kamaQaqa, into eyayingalinganwa sihlangu nabhulukhwe, ixesha elininzi yayisoloko izithe
mpa ngotshotsh ufe wedyasi. Zazinzulu kwaye zinkulu iipokotho zale dyasi, usana oluneminyaka emini
lungangena luphelele. Bathi bakungafumani nto endle baya ngqo kanye ezantsi komzi kaTshezi,
kwiliwa-kazi elalinetsili elingazange lachukunyiswa mntu. Lalinzulu iliwa eli, lirhangqwe zizihlahla
zomqaqoba onameva anobungozi. Kumazantsi eli liwa kunesizibakazi esinzulu, othi xa usijonga ubengathi
utsalwa ngumnatha.
Into kaQaqa noDongwe zihlanganise amaqhinga ukwenzela ukuba bakwazi ukuphakula itsili. Indlu yelitsili
yayisembindini weliwa, kunzima kakhulu ukufikelela kulo. Kwakushinyene kakhulu phezu kweli liwa, kwaye
nezirhubuluzayo zinganqabanga kuba le ndawo yayithandwa kakhulu naziimbila. Icebo lalilinye,
kukudibanisa iminxeba kuze kubotshelelwe nasezimbanjeni lowo uzakuthotywa eliweni.
Ufafa olude uQaqa wazichonga wathi nguye ozakuhla eliweni, uzilungisile izixhobo zokuphakula, ndibala
ntoni: ilaphu lokuqhumisa, isigqumatheli sokuphakula, kunye nesingxobo sokufaka ubusi namatyhumza.
Phambi kokuba ahlele eliweni intambo le yomnxeba ikhe yaphinda-phindwa ukubhijelwa kwisikhondo
somthi kumntla weliwa. Qaphela ke mlesi umnxeba lo asinto yomeleleyo kuyaphi. Owona msebenzi wawo
kukubopha nje inyanda yeenkuni ezingenabunzima buyaphi.
Yaqala inkathazo ngokuthi uDongwe achukumise indlu yoonomanxazane ababethe chu indlu yabo kwesi
sigodo. Nankoo esisantanta bezenzela bona oonomanxazane esikhumbeni sendoda. Kuthe kanti
ngelixesha besengxakini, nazo izinja ziye zavusa incanda noxam ngaxesha linye phezu kweliwa.
Ayizisokolisanga incanda, iye ngqo kumfo kaDongwe. Nantsoo iziphosa phakathi kwemilenze, ishiya
ezoontsiba zingcangcazela emilenzeni nasemathangeni.
Ngalo lonke elixesha uQaqa selejinga eliweni, ilaphu selilephuza amadangatye, ehlela
ngasemngxunyeni wetsili. Uxam ukholwa ngamantintinti, naye lo zange azisokolise, wazaneka eziphosa
phofu kweso siziba sasizolile, silindele esalo ixhoba. Ngelingeni urheme lo ude wajinga kanye phambi
komngxuma wetsili. Zazizolile nazo iinyosi kambe zisenza imisebenzi yazo yemihla-ngemihla. Naboo
oonogada bezolile belinde nayiphina into engachukumisa ukudla kwazo. UQaqa lo sisigantsontso sendoda,
into enezoso, endingayiqikelela phaya kudidi lwanzima xa ndiyithelekisa kwezamanqindi. Umnxeba wona
wawusele ucekethekile, ungaqhawuka nanini na kukusindwa sesisigantsontso, wena wakhe wambona
udyaki edlala ujingi, ebheka ngapha-nangapha eliweni.
Nanko uphopho uqhusheka elo laphu, kanye emlonyeni womngxuma. Izinja zazikhwina futhi-futhi kumantla
eliwa, zijonge umnini wazo, zinosizi ke kambe. Awu! Yehl intlekela madoda, kuphume ookhala babathathu,
bashiya ngezoomvila, entloko, empumlweni, esilevini, baphinda babuyela emngxunyeni. Liqalile idabi
ngoku, liphumile ibubu leenyosi lijolise nakuyiphina into eshukumayo kumantla eliwa. Zivuthulule izinja,
lihleli itsili ezindlebeni, phantsi komsila wenja, emehlweni, njalo-njalo. Zaphaphathek izinja zishiya eloo
sizana lingenabani lijinga eliweni.
Yakhwaza ikhwazile indoda ifuna uncedo nakubanina, kodwa iliwa lalisuka lihlokome. Ibubu lenyosi
lakhetha ukuza kuhlala kanye apha phantsi kwesilevu, phofu lingahlelanga nje lishiya uvila neentlungu.
Ngelingeni ude waqhawuka umnxeba kukuxhuzula kwale ndedeba, yaxela ukhetshe esukela ixhoba ukuya
kutshona esizibeni.
Akubanga lula kwesi siziba, eyona nto yayisenza ubunzima ngutshotsh ufe lo wayemnxibile. Zesuka zazala
ezoo pokotho ngamanzi, zimtsalela ezantsi, kwade kwanzima nokufumana ithuba lokurhogola umoya.
Ngeli thuba itsili lalise liphume lonke emngxunyeni, lindada phezu kwamanzi, lilinde into ka-nkosi eza
kuthi thu emanzini. Wayesithi akuvela ngentloko emanzini lisuke lizenzele lona itsili kobo buso babuse
butyumfu-tyumfu kukudumba.
Esi siziba likhaya loxam lo bebekhe bamswantsulisa kumantla esiziba. Naye uxam lo
wayengaziyekelanga phantsi kwamanzi. Wayewujwila ewujwilile umsila wakhe kwezoo ntsinga zale
ndoda, andithethi ngamaqatha ayede axobuka kukubhexeshwa sisilo samanzi. Wayengasazi nokuba
uphina umfo kaQaqa, ukubona nokuphefumla kwakuxele ithamsanqa kuye.
Kwathi kanti engasabonakali nje uDongwe uye kuhlaba umkhosi kwalapha efama. Akhawuleza afika
amadoda, neNgwamza ngokwayo, beze kuhlangula eli dela-kufa. Ibhutsi zakhe nebhulukhwe zazisele
zikhululwe ngamanzi. Enye into eyamsokolisayo kukuthi kanti ngexesha bekuzingelwa, yena ebequbula
imivundla isalele ezikhundleni zayo, aze ayihlohle kweezo pokotho zedyasi yakhe, phofu ke efihlela
ugxa wakhe.
Walayishwa evenini yomlungu, wabalekiselwa kwagqirha. Kwaba njalo ukufa kwaalo nkosi
ingenabhongo ngetsili leenyosi.
AMAGQABANTSHINTSHI NGABABHALI
PHUMELELO ANTONY:
Ngumbhali wamabali amafutshane, neenoveli kunye nemibongo. Ubhala ngesiXhosa kunye nesiNgesi.
Uzalelwe eTinarha wakhulule khona nemfundo yakhe wayenza kwalapho. Ufume inqanaba leBAED
ebutishaleni eVista Dyunivesiti. Une ncwadi ezimbini azipapasheleyo ngaphantsi kwegama lakhe
Isimbonono (2009) kunye Lo Mgqakwe (2010).
NOMPUMEZO BUZANI:
Ngumbhali ophum izandla apha eBhayi nonendumasi. U-Nompumezo Buzani lo uzalwa eDikeni
nangona ikhaya lakhe sewalimisa apha eBhayi. Ngokwentsebenzo yaseMlungwini uNompumezo
ungumongikazi kwisibhedlele esikwalapha eMaBhayini. Kanti kwisandla sakhe sasekhohlo uphathiswe
ucwambu lwemihobe, amabali amafutshane, imidlalo yeqonga, nemidlalwana yoonomathotholo
noomabonwa-kude.
MBONGISI DYANTYI:
Lo mfana uselula uzalwa kwiphondo laseNtshona Koloni. Ufunde wayityekeza kuba selephuma
kuqeqesho lwee-Honours in Philosohy phantsi kweDyunivesiti yase Witwatersrand. Sithetha nje
ungumfundi kwakho eRhodes University apho atyebisa khona isakhono sakhe sokubhala kwicandelo
le-Masters in Creative Writing, eRhini.
FUNDILE MAJOLA:
UFundile Majola lo yinzalelwane yelokishi iNew Brighton, eBhayi, indla-lifa yamaKhomazi. Urheme ke
lithanda-zwe elizingcayo ngeelwimi zeenkobe zeli lizwe, futhi ke unamava afikelela kwishumi leminyaka
esebenza ngazo: ebhala, ehlela, eguqulela, futhi ke ukhe wanguye nonondaba. Kungoku nje unkabi
uqeqeshelwa ukuba ngumbhali ophum izandla kwinqanaba loompondo-zihlanjiwe kwiDyunivesithi
iRhodes, eRhini, phantsi kwecandelo amakhumsha alibiza ngokuthi yi-Masters in Creative Writing.
JESSICA MBANGENI:
Uninzi lwabafundi uJessica Mbangeni lumazi kunomathotholo naphayana kumabonwa-kude. Ngumbhali
ogqibeleleyo lo kwanomdlali weqonga owaziwayo ehlabathini lonke. Uvele kwimiboniso bhanya-bhaya
emininzi wasasaza nakwiintengiso eziliqela kunomathotholo. Yimbongi yosiba neyomthonyane.
Kwiminyakana nje emingaphi edlulileyo ukhe wavela pha kwi-Poetry Africa, eThekwini.
MZUVUKILE MANXIWA:
U-Mzuvukile kaManxiwa, nguMpinga uMawawa, uBholokoshe uNt omntwana, kulaa mhlaba
waseMampondomiseni; eMvumelwano kuQumbu. Ufihle intloko Kwa-Zakhele eBhayi. Amabanga akhe
aphantsi uwafunde eMvumelwano J.S.S. ukusukela kwincwadi yokuqala ukuya kwibanga lesine.
Ukusukela kwibanga lesithandathu ufunde e-Ilungelo H.P.S. apha eBhayi. Uqale ukuzibona ukuba
uyaluthanda uluncwadi ngakumbi izibongo xa efunda eTamsanqa S.S.S. ekwalapha eBhayi. Waye
waxela ukhwekhwe exhwilini ngokuthi nca kuSimphiwe Vikilahle ebese kukudala etshila kweli qonga.
VICTOR MGUZULWA:
U-Victor Mguzulwa, uMzangwa uzalwe Phesheya kweNciba kwindawo ebisakwaziwa nje ngeTranskei,
kwisiThili saseNqamakwe, kwilali yakuMtebele. Ufunde eMtebele High School naseLukhanyisweni
College of Commerce. Ngumbhali wemibongo namabali ngolwimi lwesiXhosa. Uhlala KwaZakhele
eBhayi.
DOUGLAS NTULI
U-Douglas Ntuli uzalelwe kwidolophana yaseMnyameni, Alexandria kweezofama zingqonge le
dolophana. Amabanga aphantsi uwafunde eDebera Primary School, waza waya kufunda kwisikolo
semfundo ephakamileyo eBhayi, kwisikolo saseNdzondelelo eZwide. Ukuphumelela kwakhe ibanga
leshumi ngowe 1985 waya kufunda kwiziko eliqeqeshela ubutitshala iCape College, kanti sevela
kufunda nase Vista University, eBhayi. Ngowe 1991 umfo kaNtuli uqalise ukuhlohla kwisikolo semfundo
ephakamileyo ePhaphamani High School, eTinarha, wadlulela eNcedo High School, waya kuwa kumzi
waseMfesane High. Kulapho esaxelenga khona nanamhlanje.

Kotaz Cultural Edition Volume 5 Number 3

Cargado por

Información del documento

Título original

Derechos de autor

Formatos disponibles

Compartir este documento

Compartir o incrustar documentos

Opciones para compartir

¿Le pareció útil este documento?

¿Este contenido es inapropiado?

Copyright:

Formatos disponibles

Kotaz Cultural Edition Volume 5 Number 3

Cargado por

Copyright:

Formatos disponibles

Kotaz Cultural Edtion Volume 5 Number 3 1

Kotaz Cultural Edition Volume 5 Number 3

También podría gustarte