EL DÍA DEL TRASGU

Milio Rodríguez Cueto

Va ya pa quince años, Bernardín del Ricuetu arregló un traxe de Papá

Noel, punxo oreyes falses de Mr. Spock, pintó un furacu na mano
izquierda con corchu quemao, encasquetóse un gorretu coloráu y baxó pa
Perendi a facer el trasgu al Domingu de Pascua. Escorrió a les moces de
la villa, llantó-yos pataes en culu a los neños y, a les muyeres y a los
paisanos sentaos na terraza del Tuertu Virolu, na plaza'l Gochu, revolvió-
yos el xelu del vermú col deu. Anduvo d'un llau pal otru de la villa
pegando blincos de saltimbanqui, llasparderu, revoltosu y aventáu. La
cosa cayó en gracia.

Al otru añu, pela mesma fecha, Bernardín del Ricuetu repitió, y al terceru,
siempre pegando blincos de saltimbanqui, siempre llasparderu, revoltosu y aventáu.

Al cuartu y al quintu, echó perres en contratar gaiteru y tamboriteru que lu acompañaron peles
cais, de cortexu.

Al sestu, acercándose la Pascua, convocáronlu a la casa conceyu.

-Vamos subvencionate -anunció-y Marcos Segón, conceyal de Fiestes.

-¿Subvencioname? ¿Pa qué? ¿Qué falta tengo de subvención? -torció'l focicu Bernardín-. Pa lo
que cuesta la música, págolo yo.

-Nun seas fatu -el conceyal llevantó una mano n'alto, como'l maestru que se despera col
alumnu retrasáu-. ¡Si lleves el traje fechu farrapos! Vamos pagate unu nuevu, y muncho más
guapu qu'esa mierda de payasu, y ponete la banda de gaites d'acompañamientu, y tamién vamos
imprimir carteles con una foto tuya...

¡Ai, Nardo! ¿Desde cuándo un trasgu negocia col poder? Pero, en fin, ¿pa qué vamos quexanos
equí, nin entemecer sermón moralista ningún que dea de sí al cuentu y lu dexe floxu, pingón?
L'asuntu fue que Bernardín picó nel anzuelu de la vanidá y aceptó.

Aquel añu sestu, el trasgu presentóse remocicáu nes víes públiques perendines. La municipalidá
trazó-y un circuitu, convenientemente anunciáu nos medios de comunicación locales, y púnxo-
y un séquitu de xanes que tiraben carambelos a los neños espectantes nes ceres. Bernardín
pegó blincos de saltimbanqui per metá la cai, llasparderu, revoltosu y aventáu, anque ensin
meter el deu nel vermú de naide nin pegar pataes en culu. L'acontecimientu fue un ésitu. Llegó
xente de fuera y corrieron la sidra y el cabritu con patates.

Al séptimu añu, llamaron otra vez al trasgu a la casa conceyu.

-Estábamos pensando que quedaría bien que desfilara una trasga contigo -comentó-y la
conceyala de polítiques d'igualdá, sentada al llau del de Fiestes.

Nardo llevantó una ceya:

-Pero... si nun hai trasgues.

El día del trasgu

1
-¡Coño, tampoco hay trasgos, no te jode! -encrespóse la conceyala, que nun daba créditu a
aquella argumentación infantil.
Bernardín gachó la oreya (la de verdá y la de Mr. Spock) y, al Domingu de Pascua, salió
llevando cinco pasos detrás una trasga guapetona, vestida con sayes y mandil de gnoma
xermánica, sonriente y reposada, cola que cualquiera podía ver que les relaciones maritales
yeren enforma improbables. El trasgu pegó blincos per metá la cai, gayoleru, y, cola supuesta
andándo-y al llombu, tal paecía que lu llevaba llindiáu del chigre pa casa.

Al añu octavu, la conceyala de Polítiques d'Igualdá tenía un pero que poner:

-Quedó mui feo lo del año pasado, con la trasga desfilando detrás, relegada. Fue humillante.
Este año, el desfile lo abrirá ella y tú irás detrás. Será un signo de igualdad entre sexos.

-Pero, ¿cómo va ser signu d'igualdá, si voi yo detrás? ¡Amás, el trasgu soi yo!

-¿Tienes algún problema? -púnxose-y gafa la conceyala.

-Y vamos cambiate la trasga -amestó'l conceyal de mocedá, que traía la so aportación-. La del
añu pasáu taba mui flaca y nun convién que desfilen muyeres flaques, que depués inducen a les
críes a l'anorexia. La d'esti añu va ser una trasga con talla de muyer de verdá.

Aquel Domingu de Pascua, Bernardín blincó más que nunca pa que la xente lu pudiere ver
venir tres de la trasgona antianoréxica. De toles maneres, encarando l'adversidá, desfiló lo más
contentu posible, ensin traicionar l'espíritu revolvín de la raza mítica.

Al añu novenu, desfiló la trasgona antianoréxica, y, detrás, el trasgu musulmán (ocurrencia de la

conceyala d'iniciatives de solidaridá internacional), barbón y sescudiendo una bandera palestina.
Terceru, Bernardín llevantaba con desgana les rodiyes, forzando una sonrisa.

Al añu décimu, desfiló la trasgona antianoréxica, y detrás el trasgu musulmán, y detrás el trasgu
discapacitáu, faciendo eses, cola siella de ruedes, d'un llau pal otru de la cai. Cerrando la
marcha, Nardo saludaba al públicu.

Al añu décimu primeru, desfilaron la trasgona antianoréxica, y detrás el trasgu musulmán, y

detrás el trasgu discapacitáu, y detrás los trasgos homosexuales y les trasgues lesbianes, caún y
caúna de la mano de la so pareya, dando exemplu de tolerancia. L'últimu, Bernardín facía, de
vez en cuando, un xestu de saludu cola cabeza al críu que tenía la gracia de tira-y confeti.

Al añu décimu segundu, desfilaron la trasgona antianoréxica, y detrás el trasgu musulmán, y

detrás el trasgu discapacitáu, y detrás los homotrasgos y les lesbotrasgues, y detrás el trasgu
antibotellón, exemplu pa la chavalería, sescudiendo n'alto botellinos d'agua mineral (el cartel
d'esi añu pagólu la marca de les botelles en cuestión). Al final, Bernardín facía la ruta cola vista
gacha, espetada na puntera de les coricies.
Al añu décimu terceru, desfilaron la trasgona antianoréxica, y detrás el trasgu musulmán, y
detrás el trasgu discapacitáu, y detrás los homotrasgos y les lesbotrasgues, y detrás el trasgu
antibotellón, y detrás el trasgu llibre de nicotina, abriendo los brazos desaxeradamente pa
inhalar aire puro colos pulmones sanísimos de los mitos del monte (asina lo espresó, en xunta
previa, el conceyal de Mediu Ambiente y polítiques sanitaries). A la cola, Nardo arrastraba
penosamente los calcaños.
Esti añu, el décimu cuartu, desfilaron la trasgona antianoréxica, y detrás el trasgu musulmán, y
detrás el trasgu discapacitáu, y detrás los homotrasgos y les lesbotrasgues, y detrás el trasgu
antibotellón, y detrás el trasgu llibre de nicotina, y detrás el trasgu de la dieta mediterrania, con

El día del trasgu

2
una goxa llena d'hortalices, fruta y aceite d'oliva. Nardo cerraba'l desfile a bien de metros del
atléticu trasgu de la dieta mediterrania, dando pasiquinos inseguros, falsos, como si-y fallaren
les piernes.

-Dios, qué mala pinta esi trasgu del final -comentaben los turistes llegaos d'otros conceyos
asturianos, que nun sabíen quién yera Bernardín.

-Debe ser el trasgu yonqui.

Al da-y la vuelta a la plaza'l Gochu, Bernardín zapicó colos propios pies y cayó pa enriba unes
críes qu'inflaben globos solidarios repartíos poles xanes inmigrantes.
-¡Ay, papi! ¡Que me aplasta el trasgo!

El públicu apuróse a rescatar a les neñines d'embaxo aquel fantoche sospechosu.

-¡Qué vergüenza! ¡Qué chapuza! ¡Así querrán atraer el turismo! -refervía un visitante madrileñu
y padre de les neñes agredíes, colando con elles a rastres pente'l xentíu.

Presentóse volao la Policía Municipal y, garrando a Bernardín pelos sobacos, sacáronlu del
desfile colos pies colgando y sentáronlu nun bancu del parque, a esperar una ambulancia.

-¿Tas bien, Nardo?

-Nun sé... -murmuriaba él, alendando con munchu trabayu-. Veo como unos puntinos
brillantes...

Un grupu de conceyales pasó per delantre'l bancu ensin velu, discutiendo meyores:

-Echo en falta un trasgu de la tercera edad.

-Una trasga de la tercera edad, mejor...

Los municipales dáben-y aire a Nardo col gorretu coloráu:

-Y, si tas mal, ¿cómo se t'ocurre salir nel desfile?

-¡Coño... soi el trasgu...!

Dos guajes en patines sí lu vieron y paráronse delantre, apuntando pa él descaradamente con

un deu:

-Mira, el trasgu ta palmando.

-¡Qué va! Ye un ataque d'ansiedá. Tienlos mio ma cada dos por tres.

L'equipu del Samur llegó corriendo pel parque: el desfile nun dexaba pasar l'ambulancia.
Tumbáronlu na camilla y arramplaron con él.

«¿Y el gorretu coloráu?», diose cuenta Bernardín de que nun lu llevaba. Retorcióse pa mirar
p'atrás: quedaba abandonáu en bancu. Los guajes de los patines echáron-y mano y liscaron con
él, veloces.

-El gorretu... -marmurió.

El día del trasgu

3
La Banda de Gaites arreventó, de golpe, a tocar l'Asturies, patria querida. Les fueyes de los
pláganos respigáronse del sustu y más d'una desmayóse pal suelu.

-¡Mira, mira, un trasgu nudista! -sintió Bernardo que berraben.

-Y too esto... ye obra mía... -ximió.

Cerró los güeyos, pero los puntinos brillantes seguíen ehí, bailando contra'l telón interior de los
párpagos, pegando blincos de saltimbanqui, llasparderos, revoltosos y aventaos.

El día del trasgu

4