Documentos de Académico
Documentos de Profesional
Documentos de Cultura
Al otru añu, pela mesma fecha, Bernardín del Ricuetu repitió, y al terceru,
siempre pegando blincos de saltimbanqui, siempre llasparderu, revoltosu y aventáu.
Al cuartu y al quintu, echó perres en contratar gaiteru y tamboriteru que lu acompañaron peles
cais, de cortexu.
-¿Subvencioname? ¿Pa qué? ¿Qué falta tengo de subvención? -torció'l focicu Bernardín-. Pa lo
que cuesta la música, págolo yo.
-Nun seas fatu -el conceyal llevantó una mano n'alto, como'l maestru que se despera col
alumnu retrasáu-. ¡Si lleves el traje fechu farrapos! Vamos pagate unu nuevu, y muncho más
guapu qu'esa mierda de payasu, y ponete la banda de gaites d'acompañamientu, y tamién vamos
imprimir carteles con una foto tuya...
¡Ai, Nardo! ¿Desde cuándo un trasgu negocia col poder? Pero, en fin, ¿pa qué vamos quexanos
equí, nin entemecer sermón moralista ningún que dea de sí al cuentu y lu dexe floxu, pingón?
L'asuntu fue que Bernardín picó nel anzuelu de la vanidá y aceptó.
Aquel añu sestu, el trasgu presentóse remocicáu nes víes públiques perendines. La municipalidá
trazó-y un circuitu, convenientemente anunciáu nos medios de comunicación locales, y púnxo-
y un séquitu de xanes que tiraben carambelos a los neños espectantes nes ceres. Bernardín
pegó blincos de saltimbanqui per metá la cai, llasparderu, revoltosu y aventáu, anque ensin
meter el deu nel vermú de naide nin pegar pataes en culu. L'acontecimientu fue un ésitu. Llegó
xente de fuera y corrieron la sidra y el cabritu con patates.
-Estábamos pensando que quedaría bien que desfilara una trasga contigo -comentó-y la
conceyala de polítiques d'igualdá, sentada al llau del de Fiestes.
-Quedó mui feo lo del año pasado, con la trasga desfilando detrás, relegada. Fue humillante.
Este año, el desfile lo abrirá ella y tú irás detrás. Será un signo de igualdad entre sexos.
-Pero, ¿cómo va ser signu d'igualdá, si voi yo detrás? ¡Amás, el trasgu soi yo!
-Y vamos cambiate la trasga -amestó'l conceyal de mocedá, que traía la so aportación-. La del
añu pasáu taba mui flaca y nun convién que desfilen muyeres flaques, que depués inducen a les
críes a l'anorexia. La d'esti añu va ser una trasga con talla de muyer de verdá.
Aquel Domingu de Pascua, Bernardín blincó más que nunca pa que la xente lu pudiere ver
venir tres de la trasgona antianoréxica. De toles maneres, encarando l'adversidá, desfiló lo más
contentu posible, ensin traicionar l'espíritu revolvín de la raza mítica.
Al añu décimu, desfiló la trasgona antianoréxica, y detrás el trasgu musulmán, y detrás el trasgu
discapacitáu, faciendo eses, cola siella de ruedes, d'un llau pal otru de la cai. Cerrando la
marcha, Nardo saludaba al públicu.
-Dios, qué mala pinta esi trasgu del final -comentaben los turistes llegaos d'otros conceyos
asturianos, que nun sabíen quién yera Bernardín.
-¡Qué vergüenza! ¡Qué chapuza! ¡Así querrán atraer el turismo! -refervía un visitante madrileñu
y padre de les neñes agredíes, colando con elles a rastres pente'l xentíu.
Presentóse volao la Policía Municipal y, garrando a Bernardín pelos sobacos, sacáronlu del
desfile colos pies colgando y sentáronlu nun bancu del parque, a esperar una ambulancia.
-Nun sé... -murmuriaba él, alendando con munchu trabayu-. Veo como unos puntinos
brillantes...
Un grupu de conceyales pasó per delantre'l bancu ensin velu, discutiendo meyores:
-¡Qué va! Ye un ataque d'ansiedá. Tienlos mio ma cada dos por tres.
L'equipu del Samur llegó corriendo pel parque: el desfile nun dexaba pasar l'ambulancia.
Tumbáronlu na camilla y arramplaron con él.
«¿Y el gorretu coloráu?», diose cuenta Bernardín de que nun lu llevaba. Retorcióse pa mirar
p'atrás: quedaba abandonáu en bancu. Los guajes de los patines echáron-y mano y liscaron con
él, veloces.
Cerró los güeyos, pero los puntinos brillantes seguíen ehí, bailando contra'l telón interior de los
párpagos, pegando blincos de saltimbanqui, llasparderos, revoltosos y aventaos.